كورده‌یل فه‌یلى هانه ده‌یشت(كه‌وان)؟!
دویاى زیاتر له 30 ساڵ هیمان هاووڵاتیه‌یل كورد فه‌یلى له‌وه‌رده‌م دادگایه‌یل كیشمه‌كیش موڵكدارى وسیانه تا ئسپات ئه‌وه بكا ك خاوه‌ن هه‌قه‌و له‌وه‌رده‌م ده‌زگایه‌یل ناسنامه ئه‌را ئسپاتكردن عراقیه‌ت خوه‌ى ك فره‌جار ناڕه‌حه‌ت كریه‌ن و مانگه‌یل فره‌یگ دریژه دیرێد، وه‌لى بایه‌سه بوى له‌بان حكوومه‌ت گشت ماڵ و موڵگه‌یل زه‌فتكریاگ وه‌گووره‌ى بریار جیوه‌جى كریاگ گورجیگ بیاتاده خاوه‌نه‌یلیان، ئنجا دیاره حكوومه‌ت تازه زیاتر مقه‌یه‌تى له‌وانه‌ك ئه‌كا ك هه‌ق مه‌ردم خوادنه‌و ماڵ و موڵك مه‌ردمان تر داگیر كردنه، ك هه‌رچه‌نى بریار هاوردنه‌وه‌ى ئه‌و زه‌فتكردنه له‌لایه‌ن دادگاو په‌رله‌مان و ئه‌نجوومه‌ن وه‌زیره‌یلیش دریاگه‌و بیجگه ده‌رچگن ده‌یه‌ها كتاو له‌و باوه‌ته‌و، وه‌لى له‌ڕاسى هویچ بریاریگ وه‌خاتر ئى مه‌سه‌له هیمان جیوه‌جى نه‌ویه.
كورده‌یل فه‌یلى ئمڕوو له‌شوون ده‌یه‌ها ساڵ مه‌ینه‌تى و ده‌روه‌ده‌رى چمانى بیگانه‌ن له‌وڵات خوه‌یان، له‌ى وڵاته ك قوربانى له‌وه‌ر خاترى دان و خزمه‌تى كردن و جایه‌ڵه‌یلیان له‌تى بى سه‌روشوون بوى.
ئه‌وه‌سه ئمڕوو خاوه‌ن بڕیاره‌یل داواى ده‌ور زیاتر له‌لیان كه‌ن له‌عراق تازه جوور ئه‌وه‌ك بویشید ته‌نیا قوربانى بیه‌ن و هویچ تر. كورده‌یل فه‌یلى ده‌ور بنه‌ڕه‌تییگ داشتنه ئه‌را گشت حزبه‌یل خاوه‌ن ده‌سڵات، ك دیاره ئمڕوو توان ئه‌و ده‌وره له‌هویره‌و بووه‌ن و هه‌ر له‌وه‌ر ئه‌وه‌یش هه‌قه‌یلیان تائیسه گومه، ئنجا غه‌ڵه‌ت گه‌ورایش ها له‌ورا كورده‌یل فه‌یلى قه‌واره‌ى تایبه‌تیگ وه‌خوه‌یان دروس نه‌كردنه‌و قورسایى خوه‌یان خستنه‌سه ناو ئه‌و حزبه‌یله‌و هه‌ر له‌وه‌ر ئه‌وه‌یش خه‌وه‌یلیان ناته‌دى.
وه‌ل ئه‌وه‌یشا دوینیم مه‌ردمان فره‌یگ داواى هه‌قه‌یل كورد فه‌یلى كه‌ن وه‌گووره‌ى ئه‌و زوڵمه ك له‌لیان كریا، وه‌لى تیه‌یمنه پاى هساو دوینیم كورده‌یل فه‌یلى هانه ده‌یشت كه‌وان، ك له‌ى حاڵه‌ته بایه‌سه ئه‌وه بزانن ك ئه‌ركه‌یل فره‌یگ ها وه‌رده‌میان و هه‌وڵ زیاتر بیه‌ن ئه‌را هاوردنه‌وه‌ى هه‌قه‌یلیان.
سه‌ڵاح شمشیر ئه‌لبه‌درى
ج
