شەنگ یوسفی و سەنگ سندی

شفق نيوز

  گشتمان زانیم ک ئەرک نویسەر ئەوەسە ک پابەند بوود وە مەرجەیل رووشنھویری و مەرز پیشەیی و ئنسانیەت نەشکنید لەوەختیگ ک ھویر لە نویسانن باوەتیگ ئەکا، تەنانەت گشت پیشەکاریگ ، نەک ھەر تەنیا نویسەر و رووژنامەنویس، وەلی دیارە دەرفەت ئازادی و نەوین چەودیری خاسیگ لەبان بەرھەم نویسەرەیل فرەجا بویەسە مایەی بی حورمەتی و ریز نەگرتن لە مەردم وەرانوەر، ک یەیش خوەی لە خوەی نەریت سەقەتیگەو لەدەسداین متمانەس لەلای بەشیگ لە پیکھاتەیل کوومەڵگای ئنسانی.

ئادەمیزاد رووشنھویر و خاوەن قەڵەم راسکانی، نەبایەد بیھوودە پەلامار ئەی و ئەو بیەیدو خوەی لە ڕز تومەتبارەیل بوینیدەو، ھەر وەو خاتریشە دوینیم وەرپرسیارێتی و ئەرک رووژنامەنویس ئەوەسە شیەوکردن و پەیجووری وەل یەکە یەکەی ئەو وشەیل خوەیا بکا ک داوەزنیدەی بان لاپەڕە رووژنامەو گووڤار و سایتەیل ئەلکترۆنی، چوینکە دویاخر ھەر خوەی وە تەنیا بایەسە باج ئەو قسەیل ناجوورە بیەید ک بی حورمەتی خوەی لەتی نیشانداگە.

وەرجە ماوەیگ کابرایگ وەناو نویسەر باوەتیگ لە رووژنامەی تەئاخی بڵاوەو کرد لەتاریخ ٥- ١٢ - ٢٠١٣، ک جی داخە دەمدریژی فریەیگ کردە بان کوردەیل فەیلی و لەتی دڵڕەقی خوەی دەرخست وەرانوەر ئی پیکھاتەی زوڵملیکریاگە ک خوەیشی یەکیگە لەلیان، ئنجا لە ئاکام ئەو رەفتار ناپوختە رەخنەیل فریەیگ روی لەلی کرد و ناڕەزایەتی فریەیگیش دەرھەقی ئاشکرا کریا، چوینکە کوردەیل فەیلی ھەرچەنی تەرفتوینەو ھیمان تائیسە یەکھەڵویست نەوینە، وەلی وەل ئەوەیشا رووح کوردایەتی لەلایان ھەرمەندگەو دریژە دەنە ئەو خەباتە ک ساڵەیل دویر و دریژیگ وە تەمای ئەوە بوین لەسای وچانیگ بیەن و ھەناسەی ئوخەی ھەڵکیشن، وەلی دویرەوخستن و فەرامووشکردن ئی پیکھاتەی رەسەنە لە مەیدان سیاسەت و نوێنەرایەتی کردەوەیگ نائنسانی و پشتکردنە لەو راسیە ک خوازیار ھویچ بەڵگەیگ نیە.

لە ئاکام بڵاوکردنەوەی ئیچنە باوەتیگ ناوەجی، ھس کەسایەتیەیل و رووشنھویرەیل کورد فەیلی کەفتە رەخنەگرتن و دەرخستن ناڕەزایەتی لەوەرانوەر ئەو شەنگ یوسفیە ک نارەی سینگ روڵەیل پیکھاتەگەی خوەی و لەلایەن کەسایەتییگ ناودار فەیلیەو جوور ویژنگیگ تاریف کریا ک وەر خوەر فەیلیەیل ناگرید.

یەیش لەوەختیگ دویای نویسانن و بڵاوکردنەوەی ئەو باوەت سەقەتە، مامۆستا بەدرخان سندی وەگشت ریز و حورمەتیگەو سەنگ خوەی گەوراتر کردو رەخنەی تونیگ لەو نویسەرە گرت و تەنانەت باس لەوەیش کرد ک ھویچ وەختیگ لەی جوورە باوەتەیلیگ بڵاو ناکا وە سفەت ئەوەک سەرنویسەر رووژنامەی ناوبریاگە، ھەر وەو خاتریشە وت: نویسەر راسکانی ئەوەسە ک حورمەت ناو خوەی قەڵەمەگەی بگریدو دویر بوود لە قسەیل ناپوخت و ناپەسەن، چوینکە نویسانن وەرپرسیارێتیە.

بەڵی بیگومان شەنگ پڕ لە بارویت یوسفی و سەنگ پڕ لە حورمەت سندی، ھەر یەکیگ لەلیان ھەڵویستیگە ئەرا بانان، چوینکە ئەوەک ھس وە وەرپرسیارێتی و ئنسانیەت بکا بایەسە ھەمیشە ھەڵویستی ئنسانی بوود.

جەماڵ ئەرکەوازی