كووچ مه‌له‌يل‌ له‌ رووسياوه‌ ئه‌را كوردستان

شفق نيوز

شوونه‌يل فريه‌يگ له‌ كوردستان ساڵانه‌ ئه‌دێده‌ لانه‌ی مه‌له‌يل كووچكه‌ر و دياره‌ دارستان شه‌ناغه‌ له‌ خوه‌رئاوای شار دوبزيش جوور شوونيگ گه‌شتياری ئه‌را هاووڵاتيه‌يل وه‌ تايبه‌ت له‌ وه‌رز وه‌هار سه‌ردانی ئه‌كريه‌يد وه‌و خاتره‌ ك سروشتيگ خوه‌ش و ئارام ديريد و پڕه‌ له‌ دار و دره‌خت سه‌وز و ئاژه‌ڵ جوراوجوور و چه‌م و ئاويگ پڕ ديمه‌ن ودڵڕفن، ك هه‌ر له‌وه‌ر ئه‌وه‌يش دوينيم ساڵانه‌ مه‌له‌يل كووچ ئه‌رای ئه‌كه‌ن و له‌تی ئه‌را ماوه‌يگ جيگير بوون.

ئی دارستانه‌ له‌ساڵ شه‌سه‌يل سه‌ده‌ی وه‌رين دامه‌زرياگه‌و شوونيگيش له‌ ناوڕاسی دروس كرياگه‌ ئه‌را ئاسكه‌يل و سه‌رچه‌وه‌ی ئاويش له‌تی گوزه‌ر ئه‌كاو ته‌نانه‌ت وه‌ گووره‌ی قسه‌ی گه‌شتياره‌يليش ئه‌وه‌ ده‌ركه‌فيد ك شماره‌يگ وه‌رازيش له‌تی ژيه‌يد.

مه‌ردم ئی ناوچه‌ باس له‌وه‌ ئه‌كه‌ن ك ساڵانه‌ له‌ دويادويای مانگ ١١ و سه‌ره‌تای مانگ ١٢ گشت ساڵيگ چه‌ن جووره‌ باڵنده‌يگ جه‌وه‌ڵی كووچ ئه‌را ئی شوونه‌ ئه‌كه‌ن و له‌ رووسياوه‌ ئه‌يه‌ن، وه‌لی جی داخه‌ راوچيه‌يل فريه‌جار راويان ئه‌كه‌ن و ڕی وه‌و مه‌له‌يله‌ نايه‌ن وه‌ ئاسووده‌و ئارام بژيه‌ن، وه‌ل ئه‌وه‌يشا ده‌ركه‌فتگه‌ ك مێژوو باڵه‌وگرتنيانيش له‌بان باڵيان نويسياگه‌و بڕيگيش له‌ليان باڵنده‌ی ماڵيه‌.

له‌يرا ئه‌تويه‌نيم بويشيم ك ديمه‌ن مه‌يلكيش و كه‌ش وهه‌واو ژينگه‌ی هه‌رێم كوردستان نه‌خش گرينگ وگه‌ورايگ ديريد ئه‌را له‌خوه‌يگرتن مه‌له‌يل كووچكه‌ر، چوينكه‌ ژينگه‌ی ته‌ندروس و ئاو وهه‌وای سازگار مه‌رج بنه‌ڕه‌تی مه‌يلكيشان مه‌له‌يله‌ ئه‌را گوزه‌ركردن وه‌سه‌ربردن وه‌خته‌يليگ له‌و شوون و ناوچه‌يله‌ ك كووچ ئه‌رای ئه‌كه‌ن له‌ هه‌ر شوون و ماوايگ له‌ی هه‌رێم كوردستانه‌.

سه‌رهه‌نگ عه‌لی

ج . أ