ئیمه‌ى كورد هه‌رچى وه‌سه‌رمان باێد كرده‌وه‌ى خوه‌مانه‌!

شفق نيوز

نیشتمانمان جویر میوانیگ دریایمه‌ قه‌ڵه‌م، وڵاتمان داگیر كریاو هه‌ر بڕیگمان كه‌فته‌ژیرده‌س ده‌وڵه‌تیگ دوشمن و سته‌مكار، ك وه‌هویچ شیوه‌یگ ده‌وڵه‌ته‌یل گه‌وراهیز پشتگیرى له‌ى ملله‌ته‌ نه‌كردنه‌و نه‌تواسنه‌ كورد بڕه‌سیگه‌ سه‌روه‌خوه‌یى. ئه‌وه‌ بوى چه‌ن جاریگ له‌سایه‌ى شووڕشه‌یل ئومیدو ئه‌زموون سه‌روه‌خوه‌یى ره‌سیه‌ كنار جى وه‌جیكردن، وه‌لى گورز كوشنده‌ له‌لى كار كردو نه‌یشتن وه‌هویچ شیوه‌یگ ئه‌نجام بگریگ ، ئه‌را نموونه‌: حكوومه‌ت شێخ مه‌حموود وه‌ ده‌سایش ده‌ره‌كى بویه‌ مایه‌ى دژایه‌تیكردن ئنگلیز و جیگیر نه‌وى، كوومار مه‌هابادیش له‌خوه‌رهه‌ڵات كوردستان هه‌ر له‌سه‌ره‌تاوه‌ جوانه‌مه‌رگ كریا وه‌ ده‌سایش یه‌كێتى سۆڤێت جاران، دویاى ئه‌وه‌یش مه‌سه‌له‌ى خودموختارى له‌ ساڵه‌یل هه‌فتاى سه‌ده‌ى وه‌رین بویه‌ قوربان پلان به‌عسیه‌یل، دى وه‌ى جووره‌ ملله‌ت كورد هه‌میشه‌ له‌هه‌وڵ و ته‌قلا بویه‌ ئه‌را خاتر سه‌روه‌خوه‌یى و ژیان ئازادانه‌ له‌ناو خاك و نیشتمان خوه‌ى.

مه‌به‌س سه‌ره‌كیمان له‌ى باوه‌ته‌ ئه‌وه‌سه‌، ئیمه‌ى كورد هه‌رچى وه‌سه‌رمان بایگ ، گشتى له‌كرده‌وه‌ى خوه‌مانه‌وه‌ ئه‌نجام گریگ، چوینكه‌ فره‌یگ له‌لیمان ماناى سه‌روه‌خوه‌یى نیه‌زانیگ و تام ئى سه‌روه‌خوه‌ییه‌ نه‌زانن چه‌نیگ خوه‌شه‌و قه‌درداره‌ له‌گشت دونیا. وه‌ل ئه‌وه‌یشا ملله‌ت كورد وه‌گشتى له‌هه‌ر چوار پارچه‌ى كوردستان جویر كرانشینن له‌ناو خاك داگیركریاگ خوه‌یان و ته‌نیا ئى به‌ش باشوور خوه‌مانه‌ نه‌وگ ك شایه‌ت ئومید سه‌روه‌خوه‌یى له‌لى بكه‌فیگه‌وه‌ ئه‌گه‌ر بایگ و دڵ له‌هاناى دڵ پاك و بیگه‌رد بووگ و گشت حزب ولایه‌نه‌یل وه‌ دید كوردانه‌وه‌ ته‌ماشاى مه‌سه‌له‌گه‌ بكه‌ن و له‌وه‌ر خاتر به‌رژه‌وه‌ندى خوه‌یان ملله‌ت نه‌كه‌نه‌ قوربانى و ژیرده‌سه‌، وه‌نا پارچه‌یل تر كوردستان ئه‌وانیش كیشمه‌كیش گه‌ورایگ ها شوونیان و دیار نیه‌ چ وه‌ختیگ روى له‌ئازادى بكه‌ن.

ئنجا مه‌سه‌له‌ له‌یرا ئه‌وه‌سه‌:

1- به‌رژه‌وه‌ندى تاكه‌كه‌سى 2- گه‌ورایى و ته‌خت و ده‌سڵات 3- جیاوازیكردن له‌ناونى چینه‌یل كومه‌ڵگاو...هتد، گشت ئه‌یانه‌ له‌یوا كردگه‌ هویر نه‌ته‌وایه‌تى و مه‌سه‌له‌ى سه‌روه‌خوه‌یى كزه‌و بووگ و جموجویل وه‌پى نه‌دریه‌یگ، ك یه‌یش ئومید و ئاره‌زوو داگیركه‌ره‌یل و شۆڤێنیه‌یله‌و له‌ڕاسى یه‌یش كاره‌سات و رویداگ ناخوه‌شیگه‌و دوشمنه‌یلیمان وه‌پى زاڵ بوون و ده‌سیان چوو گریگ جویر ئه‌وه‌ك په‌ند عه‌ره‌بى ئویشیگ (مصائب قوم عند قوم فوائد).

بیگومان هه‌ر ناكووكى و كیشمه‌كیشیگ له‌ناونى هیز ولایه‌نه‌یل، مایه‌ى كزه‌وبوین و نه‌جمیان جموجویل كورده‌ له‌گشت مه‌یدانیگه‌وه‌. ئیمه‌ى كورد له‌وڵاته‌یل ئۆرپا وه‌ رووشنهویر و فه‌رهه‌نگدار دریایه‌مه‌سه‌ قه‌ڵه‌م، وه‌لى له‌ناو خود خوه‌مان ئه‌یاكه‌مان دگان وه‌ ئه‌واكه‌یا نیه‌نه‌یگ و هه‌میشه‌ بڕیگ ها له‌هویر شكانن بڕیگ تر و خزمه‌ت كیشه‌گه‌مان كریاسه‌ قوربان به‌رژه‌وه‌ندى و خودپه‌رسى. یا دوینید قه‌ڵه‌مداریگ ك وه‌ ناو رووشنهویره‌، ئه‌وه‌نه‌ زانیگ بنویسیگ و ناونیتگ بوڕیگ و عه‌یب ملله‌ته‌گه‌ى بخه‌یگه‌ ده‌یشت، دى نیه‌زانیگ وه‌و قه‌ڵه‌مه‌ قسه‌ى خه‌یر بنویسیگ و باس جوان و باوه‌تیانه‌ بخه‌یگه‌ رووژنامه‌و سایته‌یل ئه‌لكترۆنى و له‌خوه‌یا ئازایى كردگه‌ وه‌و كاره‌یلیه‌. دى وه‌هه‌رحاڵ ئیمه‌ى كورد حه‌یفه‌ نه‌زانیم سه‌روه‌خوه‌یى و نیشتمان ماناى چه‌ ده‌یگ ئه‌را ئه‌را ئیمه‌ى سته‌مدیده‌و زوڵملیكریاگ.

 

ج. عه‌لى میرى