نه‌ورووز باكوور

شفق نيوز

هه‌ر له‌وه‌ر ئه‌وه‌يش ك له‌لايه‌ن ده‌وڵه‌ته‌و هه‌ميشه‌ چه‌ودێرى كريايم ئه‌را ئه‌وه‌گ نه‌تويه‌نيم جه‌شن نه‌ورووز پيرووز بكه‌يم، ئمجا له‌ناو شاره‌يل ئه‌و جه‌شن نه‌ته‌وه‌ييه‌ وه‌ دزييه‌و پيرووز كريا و فريه‌يش وه‌ كه‌مى بڕيگ مه‌ردم گرده‌و بويان و ئاگر كرديانه‌و. وه‌لێ له‌ناو ئاوايه‌يل جوور شار نه‌وى، له‌ورا فيشتر نه‌ورووز پيرووز كرياو فيشتر هاتيانه‌ پيرى ئه‌و جه‌شن نه‌ته‌وه‌ييه‌و، هووكاره‌گه‌يشى ئاشكراس، چوينكه‌ ده‌وڵه‌ت نه‌تويه‌نستياد چه‌وديرى ئه‌و هه‌زاران ئاوايه‌يله‌ بكاو ته‌نيا چه‌و خستياده‌ بان شاره‌يل.

ئمجا دوياى ئه‌وه‌گ له‌ باشوور كوردستان حكومه‌تيگ كوردى دامه‌زريا و كورد تا ڕاده‌يگ هه‌واى ئازادى هه‌ڵمژين، له‌ناو توركيايش ئه‌و سه‌ركرده‌و پارته‌يله‌ ك وه‌رده‌وام دژايه‌تى كورد كرديان و ئايدۆلۆژياى ناسيۆناليست و ره‌گه‌زپه‌رسى به‌رزه‌و كردوين وه‌ره‌و كزه‌وبوين چين، دى له‌و وه‌خته‌و كورد تويه‌نست له‌ناو توركيا وه‌بى ترس باس له‌ وجوود خوه‌ى بكاو جه‌شن نه‌ورووز و ئاگر نه‌ورووزيش خوه‌شتر له‌ جاران كرياوه‌، وه‌لێ دوباره‌ كورد جوور ته‌حه‌دايگ سياسى نه‌ورووز هاورده‌ كار.

سه‌رده‌م مناڵێم له‌ليم بترازيه‌ێد، ئيمه‌ هه‌ميشه‌ هه‌ناى ك ياد نه‌ورووز كرديايم جوور وه‌رپرچدانه‌وه‌يگ سياسى وه‌كارى هاورديمه‌، راسيه‌گه‌يشى هه‌ر له‌يواسه‌، هه‌ر له‌ رووژ په‌يابوين نه‌ورووز، ئه‌و جه‌شنه‌ وه‌ سه‌ركه‌فتنيگ سياسى شماريه‌ێد له‌بان زاڵمه‌يل، وه‌لێ نادێ ئه‌وه‌يش له‌ هويرمان بچێد ك ناكريه‌ێد ئيسه‌ ئه‌و ياده‌ وه‌ سياسى بكريه‌ێد، چوينكه‌ هه‌ناى ك ئويشێد جه‌شن ماناى خوه‌شى و شادى و گه‌شت و سه‌يرانه‌، دى ناكريه‌ێد خوه‌شى ئه‌و جه‌شن نه‌ته‌وه‌ييه‌ وه‌ سياسى بكريه‌ێد و بووريه‌ێد وه‌ره‌و كرده‌وه‌يگ تون وتيژى.

ئيمه‌ جوور كورد له‌ باكوور، ئه‌را ماوه‌ى چه‌ندين ساڵه‌ هه‌ناى ياد نه‌ورووز كرديمنه‌، وه‌ جووش و خرووش فريه‌يگه‌و درووشم جوراوجوور دژ ده‌سڵات توركيا به‌رزه‌و كرديمنه‌ ك ئه‌وسا ئه‌وان وه‌ دڕنده‌ترين شيوه‌ روى وه‌ڕوى ئيمه‌ بويانه‌و، هه‌ر وه‌و خاتريشه‌ وه‌ هويرم ناتگه‌ جه‌شن نه‌ورووز وه‌شيوه‌يگ خوه‌شى و شادى كرياوێد، يا ده‌س مناڵه‌يلمان گرتويمن و سه‌يران وه‌تام و له‌زه‌تيگ ئه‌نجام داويم، به‌ڵكوو هه‌ميشه‌ نه‌ورووز وه‌كار هاورديمنه‌ ئه‌را روى وه‌ڕوى بوينه‌وه‌ى دوشمن، ك ئه‌وسا هه‌وه‌جه‌ كردياد وه‌و جووره‌ بدێ.

ئوميده‌وارم و داواكارم دى ئيمه‌يش جوور خه‌ڵك هه‌رێم كوردستان، له‌ياد جه‌شن نه‌ته‌وه‌يى نه‌ورووز وه‌ خوه‌شى و شادى و هه‌ڵپه‌ڕكه‌وه‌ ئه‌و ياده‌ بكه‌يم، نه‌ك وه‌ ترس و دڵه‌ڕاوه‌كى پيشوازى له‌ نه‌ورووز كورده‌يل بكه‌يم.

ئه‌رجال شيمشه‌ك