دیموكراسى عراقى له‌ ئه‌زموون ده‌سه‌یل سه‌روه‌خوه‌ى

شفق نيوز

چواره‌مى له‌ژیر ناونیشان(ده‌سه‌یل سه‌روه‌خوه‌یى)ئشاره‌ت وه‌ ئه‌وه‌ كردگه‌و ئویشیگ: نیه‌وگ سه‌روه‌خوه‌یى قه‌یریگ  له‌ ده‌سه‌یل ئه‌راى دروس بكریه‌یگ  و له‌وانه‌یش كۆمسیۆن باڵاى سه‌روه‌خوه‌یى هه‌ڵوژاردنه‌یل و لوجنه‌ى ده‌سپاكى و بانك مه‌ركه‌زى و ده‌سه‌یل تر، ئه‌وه‌ له‌ى حاڵه‌ته‌ بڕیار دادگاى باڵا تیه‌یگ  ك له‌18ى كانوون دویه‌م ئیسه‌ داواى ئه‌وه‌ ئه‌كا ئه‌و ده‌سه‌ یا لوجنه‌یل سه‌روه‌خوه‌ییه‌ ك ئشاره‌ت وه‌پیان كریا له‌ده‌ستوور عراقى راسه‌وخۆ په‌یوه‌س بوونه‌ سه‌رۆكایه‌تى وه‌زیره‌یله‌وه‌ نه‌ك وه‌ سه‌رۆكایه‌تى ئه‌نجوومه‌ن نوێنه‌ره‌یله‌وه‌، ك ئه‌ویش له‌بان داواكارى هات ئه‌را دیارداین په‌یوه‌ندى ده‌سه‌یل له‌ نویسینگه‌ى سه‌رۆكایه‌تى وه‌زیره‌یل ك خریا وه‌رده‌م دادگاى یه‌كێتى له‌ 2 كانوون یه‌كم گوزه‌یشت.

نوێنه‌ر لیست عراقیه‌ حامد متڵه‌گ ئه‌را شه‌فه‌ق له‌باوه‌ت ئه‌وه‌ك حكوومه‌ت و قه‌واره‌یل سیاسى وه‌رپرسن له‌بان ئه‌و گرفت و كیشه‌یله‌ ك عراق وه‌پیا په‌ڕیگه‌وه‌ ئویشیگ: حكوومه‌ت ئه‌وه‌سه‌ ك سه‌رۆك وه‌زیره‌یل و سه‌ركرده‌ى قه‌واره‌یل سیاسى ئه‌نجام ئه‌و گرفته‌یله‌ بگرنه‌ مل ك عراق وه‌پیا په‌ڕیگه‌وه‌، ئه‌ویش وه‌ ئشاره‌تكردن ئه‌را ئه‌و بڕیاره‌ ك ئه‌نجوومه‌ن دادگاى باڵا ده‌ریكرد وه‌ به‌سانن ده‌سه‌یل سه‌روه‌خوه‌ییه‌وه‌ راسه‌وخۆ وه‌ سه‌رۆكایه‌تى ئه‌نجوومه‌ن وه‌زیره‌یله‌وه‌.

حامد موتڵه‌ك ئه‌و بڕیاره‌ وه‌ خودكیشاننه‌وه‌یگ  له‌ دیموكراسى و ریككه‌فتنه‌یل ناونى قه‌واره‌یل سیاسى داناو داواى ئه‌وه‌یش كرد ك وه‌رگرى یا دیفاع بكریه‌یگ  له‌ داب و نه‌ریته‌یل دیموكراسى و هه‌ڵه‌په‌ڵه‌ بكریه‌یگ  له‌ داناین قانوونیگ  ئه‌را ریكخستن كاروبار ده‌سه‌یل سه‌روه‌خوه‌یى و به‌ساننیان وه‌ په‌رله‌مانه‌وه‌. وه‌ل ئه‌وه‌یشا وتیاگ: ئه‌نجوومه‌ن نوێنه‌ره‌یل نوێنه‌ر شه‌رعى ئیراده‌ى ملله‌ت عراقه‌و له‌هه‌مان وه‌خت وه‌رپرسه‌ له‌ مقه‌یه‌تیكردن ئه‌و ئه‌مانه‌ته‌ ك ملله‌ت داسه‌ى پى و سه‌روه‌خوه‌یى ئى ده‌سه‌یلیشه‌ گووشه‌یگ بنه‌ڕه‌تیه‌ له‌ دیموكراسى. وه‌ل ئه‌وه‌یشا وه‌رپرس بانك مه‌ركه‌زى عراقى مزهر محه‌مه‌د ساڵح زویتر ئاگادار كریا له‌ده‌خاڵه‌تكردن سه‌روه‌خوه‌یى بانك، وه‌ ئه‌وه‌ك مه‌ترسى هه‌س له‌باوه‌ت بڕیار دادگاى یه‌كێتى ئى دویاخره‌ له‌ مه‌سه‌له‌ى به‌سانن قه‌یریگ له‌ ده‌سه‌یل سه‌روه‌خوه‌ى راسه‌وخۆ وه‌ سه‌رۆكایه‌تى حكوومه‌ته‌وه‌، ك داواى ئه‌وه‌ كریا بڕیاریگ  ئاشكرا ده‌ربكریه‌یگ  له‌باوه‌ت په‌یوه‌سكردن یا سه‌روه‌خوه‌ییكردن ئه‌و ده‌سه‌ یا هه‌یئاته‌وه‌.

قسه‌كه‌ر وه‌ناو ئه‌نجوومه‌ن دادگاى باڵا عه‌بدولستار به‌یره‌قدار ئویشیگ: بڕیاره‌یل دادگاى یه‌كێتى باڵا مقه‌یه‌تیكریاگه‌ له‌لایه‌ن گشت ده‌سڵاته‌یله‌وه‌و نیه‌وگ هویچ بڕیاریگه‌ لاوریه‌یگ  یا دادگاگه‌ بشیویه‌یگ  و كه‌سه‌یل تر دامه‌زریه‌ن، وه‌ل ئه‌وه‌یشا ناوبریاگ ئشاره‌ت وه‌ ئه‌وه‌یش كرد ك هه‌ر لایه‌نیگ  وه‌گووره‌ى به‌رژه‌وه‌ندى حزبى یا كه‌سایه‌تى خوه‌یه‌وه‌ نوڕیگه‌ ئه‌و بڕیاره‌وه‌ ك له‌لایه‌ن دادگاى ناوبریاگه‌وه‌ ده‌رچوود.

له‌لایه‌ن خوه‌یه‌وه‌، فه‌ره‌ج حه‌یده‌رى سه‌رۆك ده‌سه‌ى باڵاى سه‌روه‌خوه‌یى هه‌ڵوژاردنه‌یل ئه‌را شه‌فه‌ق له‌باوه‌ت سه‌روه‌خوه‌یى ده‌سه‌یل ئشاره‌ت وه‌ ئه‌وه‌ كرد، ك ده‌ستوور عراقى جه‌خت له‌بان سه‌روه‌خوه‌یى ده‌سه‌یل(الهیئات) كردگه‌ ك خوازیگ  په‌یوه‌س بكریه‌یگه‌ ئه‌نجوومه‌ن وه‌زیره‌یله‌وه‌، وه‌لى ئه‌گه‌ر له‌بان ده‌سڵات جى وه‌جیكردن بووگ ئه‌وه‌ چه‌واشه‌ى ده‌ستووره‌و سه‌روه‌خوه‌یى خوه‌ى له‌ده‌سده‌یگ. وه‌ل ئه‌وه‌یشا مه‌حموود عوسمان ئه‌ندام په‌رله‌مان له‌بان لیست هاوپه‌یمانى كوردستانى هه‌مان راى دیریگ و ئویشیگ: نیه‌وگ ده‌سه‌یل سه‌روه‌خوه‌یى په‌یوه‌س بكریه‌نه‌ ده‌سڵاته‌یل جى وه‌جیكاره‌وه‌.