ئایا ژیان عراقیه‌یل ژیان سه‌ده‌ى بیس و یه‌كه؟
ئه‌وه‌ك له‌خوه‌یان بپرسن ك ئایا راسه هانه ناو سه‌ده‌ى 21 و تائیسه‌یش هیمان گه‌ردنه شوون چشته‌یل نادیارا له‌چوارچیوه‌ى قه‌یرانه‌یل هه‌ناسه‌بڕ به‌تاڵ و ده‌رچگن له‌ده‌سى نه‌یاشتنه وه دریژایى ده‌یه‌ها ساڵ دویر ودریژ؟
جه‌هان شارستانى شانازى كه‌ن وه شووڕشه‌یل زانستى و ژیارى و ئیمه‌یش هیمان ناڵنیم وه ده‌س قه‌یران بى شوونى و پرووژه‌یل گه‌وراى درووكانى و هه‌ر باس له نه‌هیشتن فه‌قیرى كه‌ن و ڕوڵه‌یل جایه‌ڵ جوانمانیش دوینیمه‌نیان گه‌ردنه شوون جه‌مه‌وكردن قوتى به‌تاڵ له‌وه‌ر خاتر ده‌سكه‌فتن تیكه‌یگ نان، ك زوورمیان خوه‌ندگا وڵكردنه‌و له‌خه‌یاڵیگ وابردگ ژیه‌ن، وه‌ل ئه‌وه‌یشا ژنه‌فیم ك وزاره‌ته‌یل وه‌رپرس له‌بان وزه گشت رووژیگ مزگانى ویستگه یا محه‌ته‌یل تازه یا وه‌دیكردن ده‌یه‌ها چاڵه‌یل نه‌فتى ده‌نه پیمان و عراقیه‌یلیش ناڵنن وه‌ده‌س قه‌یران كاره‌باو گرفت و كیشه‌ى كاره‌باى ئه‌مپێرى ناحكوومى و ده‌سه ده‌سه ڕز به‌سن له‌وه‌ر خاتر وه‌رگرتن چه‌ن له‌تریگ نه‌فت چه‌رمگ له به‌نزینخانه‌یل تا خوه‌یان وه‌پى گه‌رمه‌و بكه‌ن و سه‌ردى زمسان له خوه‌یان و مناڵیان دویره‌و بخه‌ن.
عراق له سه‌ده‌ى 21 له وه‌زعیگ ژیه‌یگ ، ك وڵاته‌یل جه‌هان وه‌رجه نیم سه‌ده وه‌پیا گوزه‌ر كردنه جویر مه‌سه‌له‌ى كاره‌باو ئاو و هووكاره‌یل جیوازكردن و قه‌یران نیشته‌جى و چشته‌یل تر. ئمجا مه‌ردمانیگ هووكار ئى قه‌یرانه‌یله خه‌نه بان ئه‌وه‌ك وه‌زع عراق وه‌ى جووره چووگه‌وه ئه‌را سه‌رده‌م دكتاتۆریه‌ت و جه‌نگ و ئه‌و كاره‌ساته‌یله ك له رژیم به‌عسه‌وه مه‌نده‌جى، ئمجا هه‌رچه‌نى حاشا له‌وه نیه‌كریه‌یگ ، وه‌لى چشته‌یل تازه له كرده‌وه‌یل خراو له‌ى وه‌زع گشتى عراقه ڕه‌نگه‌وداو بویه حاڵه‌تیگ ك قورتاربوین له‌لى سته‌مه له‌ساڵه‌یل ئاینده‌ى نزیكیگ ، فره‌كه‌س مه‌سه‌له‌گه به‌نه‌وه ئه‌را حاڵه‌ت ئابوورى یا ئاسایش، وه‌لى دوینید گرینگترین ئه‌و هووكاره‌یل دویاكه‌فتنه چووگه‌وه ئه‌را كیشمه‌كیش ناونى قه‌واره‌یل سیاسى و سیاسه‌ت (پشت براگه‌د بگر چ زاڵم یا زوڵملیكریاگ بووگ).
ئى سیاسه‌ته ك بویه هووكار بووشایى یا فراغ سیاسى و شماره‌ى فره‌یگ له مه‌ردمان ناشاره‌زا ره‌سانه پله‌وپایه‌ى به‌رز و كار كرده بان قه‌یریگ له وزاره‌ته‌یل له‌ڕوى خراوى كاركردنه‌وه ك وه جووریگ لوجنه‌یل ده‌سپاكى و دادگایه‌یل بیتاقه‌ت بوى له چه‌ودیریكردنیان، ئه‌یه بیجگه تاڵانكردن و بردن و ته‌زویر شه‌رعى و ناشه‌رعى، ك شایه‌ت كه‌سه‌یلیگ بپرسن و بویشن ئى زاره‌وه یا مسته‌ڵح تازه چه‌یگه؟ ته‌زویر شه‌رعى ئه‌وه‌سه ك خاوه‌نه‌گه‌ى وه‌پى ره‌سیه به‌رزترین پله‌و پایه له ده‌وڵه‌ت وه‌و باوه‌ڕنامه یا شه‌هاده‌ى به‌رزه ك له‌بازاڕ مرێدى جه‌هانى دروسكریاو له‌گشت وڵات په‌خشه‌و بوى و هه‌ق دامه‌زرانن داسه خاوه‌نه‌یلیان و هه‌ر وه‌ختیگیش ئاشكرا كریا ئه‌وه كه‌فیگه وه‌ر وه‌خشین قانوونى لایه‌نه‌یل باڵا له ده‌وڵه‌ت.
چشته‌یل فره‌یگ هه‌س له دویاكه‌فتن و سه‌رپیچكارى له‌بان قانوون، ك گشت ئه‌یانه كاریگه‌رى كردنه‌سه بان ژیان رووژانه‌ى هاووڵاتیه‌یل، وه‌نا چوین ملهوڕى و زاڵبوین بڕیگ له هووزه‌یل له‌یه‌كه‌و دریه‌یگ له‌بان قانوون له مه‌سه‌له‌ى كوشتن و دزى و ڕواكانن، ك تاراده‌یگ ره‌سیه ئه‌وه‌ك ئه‌شایر سزاى پزیشكه‌یل بیه‌ن له‌حاڵه‌تیگ ئه‌گه‌ر هات و چاره‌سه‌ر زه‌خمداره‌یل به‌دڕه‌فتار نه‌كرد؟
گشت ئى باوه‌ته‌یل پڕ ژانه به‌ش گه‌ورایگه له مه‌ینه‌تى نه‌وه‌یل ك پا خستنه ناو ده‌یه‌ى دویه‌م سه‌ده‌ى 21 و ئومیده‌وارن هه‌ناسه‌یگ تازه‌ى ژیارى هه‌ڵكیشن وه‌بى ئه‌وه‌ك وه ته‌مه‌لویلان ساڵه‌یل تیه‌ریكى بخنكیه‌ن.
