دامه‌زرانن حكوومه‌ت بویه‌ قه‌زانه‌گه‌ى بالویل

شفق نيوز

عراق ئه‌گه‌ر وه‌ڕاسى و له‌نیه‌ت پاكه‌وه‌ مه‌یل دامه‌زرانن حكوومه‌ت تازه‌ بیاشتان و كووتایى وه‌جه‌نگ  و مرافه‌و ده‌مه‌قاڵ ناونى خوه‌یان و حزبه‌یلیان باوردان و كیشمه‌كیش نه‌كردان له‌بان نه‌ختینه‌و ده‌سڵات باڵا ، یا له‌وسا تائیسه‌ هه‌ر ئمڕوو سوو وه‌ملله‌ت عراق كه‌ن و هیمان ده‌رئه‌نجام خاسیگ  له‌وه‌زعه‌گه‌ نه‌كه‌فته‌سه‌وه‌و مه‌ردمیش وه‌ل ئه‌و هه‌مگه‌ مه‌ترسى و ته‌قینه‌وه‌و كاره‌سات ڕووژانه‌ ك ڕویده‌یگ  ، چه‌وه‌ڕى ئه‌وه‌ كه‌ن حكوومه‌ت خزمه‌تكاریگ  دامه‌زریه‌یگ  تا به‌شكه‌م سه‌رفراز و ئاسووده‌ بوون ، وه‌لى له‌یوا دیاره‌ مه‌سه‌له‌ى دامه‌زرانن ئى حكوومه‌ته‌ مه‌نده‌سه‌ بان مه‌یل و مه‌رام ده‌ره‌كیه‌یل و هه‌ر بایه‌سه‌ چه‌وه‌ڕى بكریه‌یگ  تا بزانى كه‌ى توان دامه‌زریه‌یگ.

ئیمه‌ حاشا له‌وه‌ نیه‌كه‌یم ك وه‌ دڵنیایه‌وه‌ ئویشیم ده‌س ده‌ره‌كى نه‌خش كاریگه‌ره‌ له‌دروسكردن كیشه‌و گرفت له‌ناونى عراقیه‌یل و بویه‌سه‌ هووكار ناسه‌قامگیرى وه‌زع وڵات و جیاوازى ناونى لایه‌نه‌یل ، وه‌لى له‌هه‌مان وه‌خت خود وه‌رپرسه‌یل و سه‌ركرده‌یل عراقیش ده‌ور زیاتریگ  دیرن له‌و كیشمه‌كیش و ناكووكیه‌ ك ڕووژانه‌ كه‌فیگه‌ وه‌رچه‌و ، بیگومان یه‌یش هیلیگ  پرووسه‌ى دیموكراسى وه‌ره‌و دویا بچووگ و پیشكه‌فتن خاسیگ  وه‌ده‌س نایگ  له‌گشت لایگه‌وه‌ ، چوینكه‌ ئه‌وان تویه‌نن وه‌گشتیانه‌وه‌ به‌رژه‌وه‌ندى ملله‌ت له‌وه‌رچه‌و بگرن وه‌رجه‌ به‌رژه‌وه‌ندیه‌یل خوه‌یان ، وه‌لى ئى كاره‌ سته‌مه‌ ئه‌ڕایان و نیه‌توان ئه‌یاكه‌یان مل بچه‌منیگ  ئه‌را ئه‌واكه‌یان هه‌رچه‌نى ملله‌تیش ته‌نگیان بووگ . جویر ئه‌وه‌ك ئاشكراو دیاره‌ مه‌سه‌له‌ى دامه‌زرانن حكوومه‌ت مینیگه‌ بان لایه‌نه‌یل عه‌ره‌ب نه‌ك كورد ، چوینكه‌ كورد هه‌ر له‌وه‌خته‌یل رمیان رژیم به‌عسه‌وه‌ تا ڕووژ ئمڕوو داواكاریه‌یلى خریاسه‌ ڕوى ئه‌را گشت هه‌قه‌یلى و هویچ وه‌ختیگ  ئامانجى ئه‌وه‌ نه‌ویه‌ حكوومه‌ت بته‌ویگ  له‌ى عراقه‌ سه‌ر نه‌گریگ  یا شیواى شیو بكه‌فیگه‌ وڵات و هه‌میشه‌ لایه‌ن خه‌یر و ئاشتى بویه‌ له‌ناونى گشت ئه‌و لایه‌نه‌یله‌ ك كیشه‌و گرفت داشتنه‌ ، ئمجا ئمڕوو ئه‌گه‌ر بایگ  و كوردیش داواى ئه‌و هه‌قه‌یل خوه‌یه‌ بكا هویچ ئه‌ڵڵاجه‌ویگ  له‌تى نیه‌و كوردیش جویر هه‌ر نه‌ته‌وه‌یگ  تر به‌ش خوه‌ى دیریگ  ، وه‌لى ئه‌و به‌شه‌ ك توایگه‌ى هه‌ر له‌بنه‌ڕه‌ته‌وه‌ هه‌ق خوه‌ى بویه‌و داگیر كریاگه‌ له‌لایه‌ن سته‌مكار و داگیركه‌ره‌یله‌وه‌ ، ئیسه‌یش كورد نه‌ویه‌سه‌ وه‌ربه‌س له‌دامه‌زرانن كوومه‌ت چه‌وه‌ڕیكریاگ ئه‌گه‌ر لایه‌نه‌یل تر ناو عراق وه‌دڵ پاك و بیگه‌ردیگه‌وه‌ ته‌ماشاى به‌رژه‌وه‌ندى گشتى وه‌رجه‌ به‌رژه‌وه‌ندیه‌یل تایبه‌ت خوه‌یان بكه‌ن ، وه‌لى له‌یوا دیاره‌ ئى خه‌ویره‌ ئاو فره‌یگ  كیشیگ  ، چوینكه‌ دامه‌زرانن حكوومه‌ت له‌ عراق كیشمه‌كیش فره‌یگ  داشت . ئه‌را نموونه‌ : له‌ بریتانیا كه‌متر له‌ مانگیگ  حكوومه‌ت دامه‌زریا ، له‌وه‌ر ئه‌وه‌ باوه‌ڕ ته‌واویگ  داشتن وه‌ مه‌سه‌له‌ى دیموكراسى و ژیان هاوبه‌ش ، وه‌لى له‌عراق گشت كاریگ  چه‌واشه‌ى وڵاته‌یل تر دونیاس ، هه‌ر له‌وه‌ر ئه‌وه‌یش ئویشیم دامه‌زرانن حكوومه‌ت له‌لیمان بویه‌ قه‌زانه‌گه‌ى بالویل و چه‌وه‌ڕى كه‌یم بایگه‌ كوڵ.