به‌ياننامه‌ی ١١ی ئادار و چشتيگ له‌ مێژوو

شفق نيوز

ناوچه‌ی كوردستان دويای ئه‌وه‌ك تويش بوردمانكردن و ئابڵوقه‌ هات وه‌ل پشتگووشخستن تونيگ له‌لايه‌ن حكوومه‌ته‌يل يه‌ك له‌شوون يه‌ك عراق، ئی گامه‌ له‌لايه‌ن رژيم به‌عسه‌و مه‌راميگ بوی ك له‌ی ريككه‌فتنه‌ خوازيار ئه‌وه‌ بوی ده‌سڵات بگريده‌ بان گشت ناوچه‌يل عراق له‌بان بنه‌مای داين خوه‌يموختاری وه‌ ملله‌ت كورد وه‌ ئه‌وه‌ك تا ماوه‌ی چوار ساڵ ڕی وشوون ئی مه‌سه‌له‌ ته‌مام بدێ و بڕه‌سيده‌ ئه‌و خوه‌يموختاريه‌.

رژيم به‌عس ئامانجی ئه‌وه‌ بوی وه‌ی كاره‌ ره‌زامه‌نی ئه‌و ملله‌ته‌ بارنه‌ ده‌س ك خوسه‌يان له‌ به‌عسيه‌يل هات وه‌ بوونه‌ی مێژوو سيه‌ی خويناويان له‌ كوده‌تای ١٩٦٣ و بيجگه‌ ئه‌وه‌يش مه‌ترسی له‌ مه‌ندن حاڵه‌ت جه‌نگ له‌ كوردستان ك هه‌ڕه‌شه‌ له‌ رمانن حكوومه‌ت به‌عسی كردياد.

دويای ئی ريككه‌فتنه‌ مه‌ردم فريه‌ خوه‌شاڵ بوين، چوينكه‌ لاپه‌ڕه‌ی تازه‌يگ له‌ په‌يوه‌نديه‌يل واز كريا له‌ناونی رووڵه‌يل ملله‌ت عراق، چوينكه‌ وه‌ لايه‌ن كه‌ميگيشه‌و مافه‌يل نه‌ته‌وه‌يی ماف گشتلايگ بوی ك زه‌مانه‌ت بكريه‌يد، وه‌لی نياز حكوومه‌ت پاك نه‌وی و ئه‌و ريككه‌فتنه‌ ته‌كتيك و خه‌ڵه‌تانن بوی له‌لايه‌ن رژيمه‌و وه‌خاتر ئه‌وه‌ك ده‌سڵات بگريده‌ بان گشت عراق.

ئه‌وه‌ بوی دويای ماوه‌ی كه‌ميگ رژيم ده‌سكرده‌ داناين پلان ئه‌را شيوانن ئی ريككه‌فتن و به‌تاڵكردنی له‌ مه‌رجه‌يلی، ك وه‌و خاتريشه‌ ده‌زگايه‌يل كوشتارگه‌ی ده‌سكرده‌ زنجيره‌ كوشتتنيگ له‌ ڕز كادره‌يل پارت ديموكرات كوردستان، ك له‌و سه‌رده‌ميشه‌ نازم گزار پياو ده‌سڵاتدار ئه‌و حكوومه‌ته‌ بوی ك دويای هه‌وڵ كوده‌تايگ له‌بان به‌كر و سه‌دام كوشيا.

رژيم به‌عس هه‌وڵ هاوپه‌يمانێتی دا وه‌ل بڕيگ له‌ حزبه‌يل و دوياخريش قه‌ڵبه‌و بوی له‌و حزبه‌يليشه‌و نه‌ڕه‌سيه‌ ئاكام و له‌شوون ئه‌وه‌يش هه‌وڵ كوشتن سه‌ركرده‌ی نه‌مر مه‌لا مسته‌فای بارزانی دا له‌ حاجی ئۆمه‌ران له‌ڕی بڕيگ پياوه‌يل ئايينی ك له‌ به‌غداوه‌ كلكريان.

ئمجا دويای شكه‌ست ئه‌و هه‌وڵه‌يله‌ گرژی كه‌فته‌ په‌يوه‌نديه‌يل و رژيم له‌ تازه‌وه‌ ده‌سكرده‌ جه‌نگ گشتگير و شار و شاروچكه‌و ئاوايی و كويه‌يل كوردستان جه‌نگ سه‌ختيگ وه‌خوه‌يه‌و دی و رژيم به‌عس له‌تی گشت جووره‌ چه‌ك قورسيگ هاورده‌ كار و ئه‌را نزيكه‌ی يه‌ك ساڵ ئه‌و جه‌نگه‌ وه‌رده‌وام بوی.

حكوومه‌ت به‌عس هه‌نای نه‌تويه‌نست ئه‌و جه‌نگه‌ وه‌ به‌رژه‌وه‌ندی خوه‌ی يه‌كلاوه‌ بكا، سه‌دام گوڕ وه‌گووڕ له‌ ساڵ ١٩٧٥ چيه‌ڕا جه‌زاير ئه‌را به‌شداريكردن له‌ دانيشتن سه‌ران وڵاته‌يل بيلايه‌ن"عدم الأنحياز" و له‌ورا داوا له‌ "هه‌واری بومديه‌ن" سه‌رۆك ئه‌وسای جه‌زايری كرد خوه‌ی و شای ئيران بنه‌يده‌ يه‌كه‌و وه‌خاتر بڕين ده‌سميه‌ت له‌ ملله‌ت كورد، ك له‌وه‌رانوه‌ر ئه‌و كاريشه‌ سه‌دام ئاماده‌ بوی ده‌س له‌ نيمه‌ی شه‌تولعه‌ره‌ب هه‌ڵگرد ئه‌را ئيران و ئه‌وه‌ بوی ك وه‌ڕاسی ئه‌و ريككه‌فتنه‌ ئه‌نجام گرت و هه‌ردوگ حكوومه‌ت ئيران وعراق ئمزای كردن و ناوی نريا ريككه‌فتن جه‌زاير.

دويای ئه‌وه‌يش شای ئيران فه‌رمان به‌سانن مه‌رزه‌يل دا وه‌ل كوردستان و داوا له‌ كورد كرد ده‌س له‌ جه‌نگ هه‌ڵگريدو مه‌ردم كورديش ئاواره‌ بوين و له‌ ئۆردگايه‌يل ئيران نيشته‌جی كريان و ئه‌و ريككه‌فتن خراوه‌ هووكار راسه‌وخۆ بوی ئه‌را به‌رپابوين جه‌نگيش وه‌ل ئيران له‌ ساڵ ١٩٨٠ دويای ئه‌وه‌ك سه‌دام ئه‌و دگان وه‌و ريككه‌فتنه‌ نه‌ناو هه‌وڵ هاوردنه‌وه‌ی ئه‌و نيمه‌ی شه‌تولعه‌ره‌به‌ دا ك له‌ ريككه‌فتننامه‌ی جه‌زاير داره‌ی ئيران، ك ئه‌و جه‌نگيشه‌ سه‌دان هه‌زار رووڵه‌يل عراقی له‌تی بوينه‌ قوربانی و هه‌ر ئه‌و جه‌نگيشه‌ هووكاريگ تريش بوی ئه‌را داگيركردن كوه‌يت، ك بودجه‌ی عراق داوه‌زين فريه‌يگ هاته‌ بانی، ئمجا رژيم سه‌دام له‌و جه‌نگه‌يله‌ چه‌ك كيمياوی له‌ هه‌ڵه‌بجه‌و كاره‌ساته‌يل ئه‌نفاليش هاورده‌ كار بيجگه‌ ويرانكردن هه‌زاران ئاوايی و ناچاركردن مه‌ردمه‌گه‌ی ئه‌را كووچكردن وه‌ره‌و باشوور و ناوڕاس عراق له‌ هه‌وڵيگ ئه‌را كپه‌وكردن شووڕشيل كوردستانی و ئاڵشتكردن هه‌ڵكه‌فت جوگرافی و مه‌ردمی له‌ كوردستان.

دی له‌كام ئه‌و جه‌نگه‌يل وه‌رده‌وامه‌ سه‌دام شماره‌يگ په‌يمانه‌يی له‌ تاوان تومار كرد دژ ملله‌ت عراق، دی له‌ساڵ ١٩٩١ ملله‌ت كورد ده‌سكرده‌ راپه‌ڕين و له‌و ساڵه‌ وه‌ دوياوه‌ مه‌ردم كورد هس وه‌ ئاسايش كرد و ناوچه‌گه‌يان ئاوه‌دانه‌و بوی و كوردستان بويه‌ لانه‌يگ ئه‌را گشت ئه‌وانه‌ك له‌ترس ترۆر واين و تائيسه‌يش وه‌رده‌وامه‌، ك وه‌و خاتريشه‌ ئويشيم: ملله‌ت كورد شايسته‌ی ئازادی و كه‌رامه‌ته‌ ئه‌را ئه‌و قوربانيه‌يله‌ ك پێشكه‌شی كرد و ئه‌را وه‌يه‌كه‌وژيانی وه‌ل پيكهاته‌يل تر ك وه‌ليا وه‌خوه‌شی و ته‌نگی ژيانه‌ وه‌خاتر وه‌رگری له‌ ئازادی و دادگه‌ری و مافه‌يل نه‌ته‌وه‌يی و مێژوويش وه‌گشت شانازييگه‌و باس خه‌بات ملله‌ت كوردستان ئه‌كاو نه‌فره‌ت ئه‌كا له‌ سه‌دام و ئه‌و تاوانباره‌يله‌ ك بوينه‌ هووكار گشت ئی كاره‌ساته‌يله‌ له‌ ماوه‌ی ٣٥ ساڵ فه‌رمانڕه‌وايی به‌عسيه‌يل.

قه‌يسه‌ر ئه‌لسناتی

ج . أ