نیسان و بژارده‌یل له‌وه‌رده‌س

شفق نيوز

 

نیسان ئمساڵیش له‌ نیسانه‌یل گوزه‌یسته‌ خاستر نه‌وى، چوینكه‌ بڕێگ خاسى و خراوى له‌تى ده‌ركه‌فت، هه‌رچه‌ن كه‌ش وهه‌واى خاسیگ و پڕ  واراناو داشت، وه‌لى هه‌ڵوێسته‌یل سیاسى كه‌میگ داشت و هویچ مسداقیه‌تیگ له‌تى نه‌وى له‌ جیوه‌جیكردن قه‌وڵ و بڕیاره‌یل و چشتیگ نه‌كه‌فته‌ وه‌رچه‌ومان له‌ هاوردنه‌وه‌ى هه‌قه‌یل زه‌فتكریاگ و قسه‌و رویداگه‌یل فره‌یگ دیم و ژنه‌فتیم و هویچ له‌لیان جیوه‌جى نه‌كریا له‌ئاست كوومه‌ڵگاى عراقى وه‌گشتى و كورده‌یل فه‌یلى وه‌تایبه‌ت.

 

وه‌ دید من بایه‌د له‌جیاى ئه‌وه‌ك براو خوه‌یشكه‌یل فه‌یلیمان ك ئه‌وقه‌ره‌ مه‌یل دیرن ئه‌را مه‌سه‌له‌ى مه‌زه‌وى و نه‌ته‌وه‌یى، ئه‌وقه‌ره‌یش گرنگى بیه‌نه‌ زینگه‌وكردن ئه‌و نه‌ریته‌یله‌ ك باوگ وباپیره‌یلمان شه‌كه‌ت بوین وه‌پیه‌و، ك ئه‌ویش نه‌ریته‌یل ژیانه‌و له‌ڕێ ئه‌و نه‌ریته‌یله‌و مامڵه‌ وه‌ل كوومه‌ڵگاى عراقى كردن وه‌گشت تایفه‌و ره‌گه‌ز و ریڕه‌ویگ فكرى و مه‌زه‌ویه‌و.

 

وه‌رجه‌ ئه‌وه‌ك گومان له‌ مسداقیه‌ت كه‌سه‌یل تر بكه‌یم له‌وه‌رانوه‌ر كێشه‌گه‌مان، بایه‌د نیسان ئاڵشت بكه‌یم ئه‌را سه‌رساڵ كوردى فه‌یلى و ریڕه‌و كاره‌گه‌مان بكه‌یمنه‌ به‌رنامه‌ وه‌گووره‌ى واقع و دویر له‌ كاریگه‌رى و باسه‌یل سیاسى، بایه‌د باس له‌ هاوردنه‌وه‌ى هه‌قه‌یلمان بكه‌یم له‌جیاى ئه‌و هه‌مگه‌ قسه‌یل دوباره‌ كریاگه‌و بایه‌د متمانه‌ باریمنه‌و ئه‌را ئاده‌میزاد فه‌یلى، چوینكه‌ كه‌سه‌یل تر فیشتر له‌وه‌ پێشكه‌ش ناكه‌ن ك پێشكه‌شى كردنه‌، ك یه‌یش نادێده‌ ده‌سپیچگ ئه‌را دریغیكردنمان له‌ وه‌رانوه‌ر كێشه‌گه‌مان له‌ڕوى ماددى و مه‌عنه‌ویه‌و.

 

وه‌باوه‌ڕم بایه‌د باوه‌ڕ وه‌ وجوود یه‌كسانى نه‌كه‌یم له‌ واقع مه‌یدان عراقى ك دابه‌ش كریاگه‌ له‌ناونى نه‌ته‌وه‌و مه‌زه‌و، ئمجا ئه‌گه‌ر كه‌مترین ئاستیگ له‌ یه‌كسانى له‌ وجوود بویاتاد، ئه‌وه‌ بایه‌د تویش ئى ئاژاوه‌و مه‌ینه‌تیه‌یله‌ ناتایم جوور ئه‌وه‌ك ئیسه‌ له‌عراق هه‌سه‌و ئى مه‌سه‌له‌ى ده‌سپیشخه‌ریه‌یل هه‌ڵوژاردنیشه‌ روى نه‌یا.

 

زینگه‌وكردن كیشه‌گه‌مان و كاراكردن نه‌خشه‌یل سیاسى و رووشنهویرى و كوومه‌ڵایه‌تیمان له‌و خاڵه‌و ده‌س وه‌پى ئه‌كا ك دوشمن وه‌ كووتاییهاتنمان تاریفى ئه‌كا! وه‌ل ئه‌وه‌یشا هه‌ڵكه‌فت حاڵ ئیسه‌مان له‌چوارچیوه‌ى ئه‌و یه‌كسانیه‌یل سیاسیى و كوومه‌ڵایه‌تیه‌ ته‌نیا له‌وه‌ر په‌یمانه‌ى زه‌ره‌د و قانجاز و ئه‌و هه‌وڵ و ئه‌زموونه‌یل گوزه‌یشته‌سه‌ ك داشتیمنه‌سه‌ى، ئنجا بایه‌سه‌ ته‌ماشاى گشت چشتیگ وه‌ گووره‌ى كیشه‌یل وه‌ختى نه‌كه‌یم له‌ڕى شیواز سیاسیه‌و، چوینكه‌ سیاسه‌ت جاجاریگ وه‌ ره‌حمه‌و تیكه‌ڵه‌ له‌ناونى ئومیدو نائومیدى.

 

هه‌ڵوژاردنه‌یل ئه‌نجوومه‌ن ئیسه‌ى پاریزگایه‌یل و سیستم كۆتا، نه‌خشه‌یگ ئه‌رامان دروس ئه‌كاو خه‌یده‌مانه‌ ناونى هه‌ڵوژاردن ئه‌وه‌ك ئایا وه‌رده‌وام بویمن له‌و قوربانیه‌یله‌ ك دایمنه‌ى وه‌خاتر چه‌سپانن باقى وجوودمان یا ئه‌وه‌ك ده‌سكه‌فتمان بوى له‌شوون رمیان رژیم تائیسه‌ بیه‌یمنه‌ى تاڵان؟!

 

ئیمه‌ ئمڕوو هه‌وه‌جه‌ وه‌ كاریزما نه‌یریم و هه‌وه‌جه‌ وه‌ حزب یا هووز و چشته‌یل تر له‌و شیوه‌ نه‌یریم له‌ساى ئى جووره‌ ناوه‌یلیگ ك ئمڕوو هه‌س له‌عراق ئه‌وقه‌ره‌ى ئه‌وه‌ك هه‌وه‌جه‌ وه‌ شكانن ئه‌و وه‌ربه‌سه‌یله‌ دیریم له‌ده‌روین خود خوه‌مان. ئمجا گشت رووژیگ سیه‌ نییه‌و گشت چشتیگیش ك دوینیمنه‌ى روى راسكانى نییه‌، هه‌ر له‌وه‌ر ئه‌وه‌یش وه‌خاتر ره‌سین وه‌ئامانج هه‌وه‌جه‌ وه‌ به‌رنامه‌یگ دیریم له‌ى واقعه‌ تا بتویه‌نیم هه‌وه‌جه‌یلمان وه‌پى باریمنه‌ ده‌س.

 

عه‌لى حسێن فه‌یلى

 

ج. ا