حكوومه‌ت ڕازیكردن لایه‌نه‌یل سیاسى

شفق نيوز

هه‌ڵكیشان و خه‌یاڵ ئه‌وه‌ كردن مه‌سه‌له‌ى دامه‌زرانن حكوومه‌ت ریڕه‌و خاسیگ گرته‌وه‌ر و گشت پیكهاته‌و لایه‌نه‌یل سیاسى عراق وه‌ جوانى و بى كه‌م وكوڕیه‌وه‌ به‌شدارن له‌تى و له‌بان بنه‌ماى مقه‌یه‌تیكردن له‌ به‌رژه‌وه‌ندیه‌یل باڵاى نیشتمانى و قه‌ره‌بووكردن ئه‌و گوزه‌یشته‌ى ترسناكه‌ ك ملله‌ت عراق و پرووسه‌ى سیاسى له‌عراق برد وه‌ره‌و كنار مه‌رگ. وه‌لى ئه‌وه‌ك ئه‌را هاووڵاتى ده‌ركه‌فت وه‌گووره‌ى ئاشكراكردن ئه‌و دامه‌زرانن وزاره‌ته‌یل تازه‌، ئه‌ویش ئه‌و سسى و بى متمانه‌ییه‌سه‌ ك كه‌فته‌ ناونى لایه‌نه‌یل سیاسى و ناو خود قه‌واره‌یل سیاسى ك حكوومه‌تیگ له‌لى كه‌فته‌وه‌ له‌بان مه‌یل سیاسى ئه‌را قه‌واره‌و به‌شبوین سیاسى و به‌شه‌به‌شایه‌تى حزبى و قه‌واره‌یى و تایفى و ڕه‌گه‌زى و له‌هه‌مان وه‌خت هه‌ڵوژانن سه‌رۆك وه‌زیره‌یل له‌بان هساو شماره‌یى و بیجگه‌ زیایبوین شماره‌ى وزاره‌ته‌یل ئه‌را شماره‌ى ئه‌ڵڵاجه‌ویگ پڕ له‌گومان ك (42) وزاره‌ته‌و نیمه‌ى له‌لیان كارا نین و گشت ئه‌و وزاره‌ته‌یلیشه‌ له‌وه‌ر خاتر رازیكردن لایه‌ن و قه‌وراه‌یل سیاسیه‌ تا به‌ش گشت لایه‌نیگ یه‌كسان بووگ وه‌ل پوسته‌یلا، وه‌ ئه‌وه‌یش نسبه‌ى خاسیگ كه‌فیگه‌ پیان له‌پویل عراقیه‌یل و به‌سه‌ ئه‌را زگ تیركردنیان وه‌بان ماڵ ملله‌ته‌وه‌.

گشتیان ئمزا كردن و له‌شوون ئه‌وه‌یش وه‌گووره‌ى ته‌سریحه‌یل نورى مالكى ك وتیاگ بایه‌سه‌ پیكهاوردن وزاره‌ته‌یل وه‌ئاست وه‌رپرسیاریه‌تى و روى وه‌ڕوى بوینه‌وه‌ى قوناغه‌یل ئاینده‌ بوون له‌ڕوى شاره‌زایى و توانایى زانستى و ئه‌كادیمیه‌وه‌، وه‌لى له‌یوا دیاره‌ ته‌نانه‌ت خود نورى مالكییش ك وه‌ته‌ماى ئه‌وه‌ بوى وزاره‌ته‌گه‌ى وه‌و ئاسته‌یله‌ بووگ، ئه‌وه‌ ده‌رنه‌چى جویر ئه‌وه‌ك تواسته‌ى، وه‌نا چوین بووگ كاندید وه‌زیریگ  بكاو تاوتوى یا مناقشات له‌بانى بكریه‌یگ و بڕه‌سیه‌یگه‌ ده‌رئه‌نجامیگ ره‌زامه‌نى له‌باوه‌تیه‌وه‌، وه‌لى قه‌واره‌گه‌ى له‌ دویاسه‌عات نوڕیگه‌ مه‌سه‌له‌گه‌ وه‌رجه‌ ئاشكراكردن وزاره‌ته‌گه‌ وه‌ئاڵشتكردن ئه‌و وه‌زیره‌ وه‌ وه‌زیریگ تر. ئایا وه‌زیر وه‌رگرى یا دیفاع وه‌رین بووگ وزاره‌تیگ هونه‌رى وه‌ك وزاره‌ت كاربا وه‌ربگریگ، ئایا ئه‌یه‌ ڕاسه‌، دى مالكى چوین بتویه‌نیگ ئى حكوومه‌ته‌ بووه‌یگه‌ ڕییه‌وه‌ ك هه‌ر له‌سه‌ره‌تاى دامه‌زراننیه‌وه‌ گرفت و كیشه‌ى هه‌ڵوژانن كه‌سایه‌تیه‌یل داشت؟

ئایا وزاره‌تیگ وه‌ى جووره‌ دامه‌زریه‌یگ، چوین تویه‌نیگ خزمه‌ت بڕه‌سنیگه‌ ملله‌تیگ  ك ناڵنیگ وه‌ده‌س جووره‌ها دویاكه‌فتن له‌ڕوى خزمه‌تگوزارى و گه‌شه‌كردن و بنیاتناینه‌وه‌؟ بیگومان ئى حكوومه‌ته‌ هویچ وه‌ختیگ له‌حكوومه‌ت وه‌رین خاستر نیه‌وگ له‌ كاره‌یلى و نیه‌تویه‌نیگ ڕوى وه‌ڕوى ئه‌ركه‌یل سه‌خت و هه‌وه‌جه‌ى هاووڵاتیه‌یل بووگه‌وه‌.

وه‌ى جووره‌ ژنه‌یلیش دویره‌و خریان و كریانه‌ قوربان پیاوه‌یل، بیجگه‌ ئه‌وه‌یش ئه‌و هه‌مگه‌ وزاره‌ته‌یله‌ ك دانریانه‌و شماره‌ى فره‌یگ دیرن، ته‌نیا وه‌تاڵانداین ماڵ ملله‌ته‌و ڕازیكردن لایه‌نه‌یل سیاسیه‌، یه‌یش له‌وه‌ختیگ ك مه‌ردمان فره‌یگ له‌ ملله‌ت عراق له‌ژیر خه‌ت فه‌قیرى ژیه‌ن و تویش هاتنه‌ وه‌ده‌س جووره‌ها نه‌خوه‌شى و ده‌رده‌سه‌ریه‌وه‌.