كاراكردن گفت ئه‌نجوومه‌ن وه‌زیره‌یل له‌باوه‌ت كیشه‌ى كورد فه‌یلى

شفق نيوز

له‌ تاوانباره‌یل له‌وانه‌ك تاوان ئه‌نجام دانه‌ دژ ڕوڵه‌یل كورد فه‌یلى، ئه‌و تاوانه‌یله‌ ك رژیم دكتاتۆرى رمیاگ ئه‌نجامیدا وه‌ تاوان له‌ناوبردن وه‌جه‌م دریا قه‌ڵه‌م. ئمجا ئه‌و تاوانه‌یل ترسناك و ریكخریاگه‌یله‌ ك ڕه‌سیه‌ هه‌زاره‌ها له‌ڕوڵه‌یل عراق له‌كورده‌یل فه‌یلى وه‌ مه‌رام له‌ناوبردن ئى پیكهاته‌ى گرینگ  یاموهم و خه‌باتكه‌ر و به‌شداره‌ له‌ بنیاتناین عراق تازه‌و خه‌بات جموجویل سیاسى و كوشتن ڕوڵه‌یلیان له‌ تاقیگاى كیمیاوى و جى وه‌جیكردن سزاى له‌سێداره‌داین وه‌ هه‌ق بڕیگ  له‌لیان و بیجگه‌ ئه‌وه‌یش شاردنه‌وه‌ى ته‌رمه‌یلیان و شوونگومكردن قه‌وره‌یلیان و كاركردن له‌بان دویره‌وخستن مه‌ردمانیگ  له‌لیان وه‌ره‌و شوونه‌یل تر ك ژیانیان سه‌خت و سته‌م كریا له‌ بیاوانه‌یل باشوور وه‌مه‌هانه‌ى له‌ناوبردن و سزاداین لاشه‌یى و ده‌روینى قه‌یریگ  تر له‌لیان و كووچ وه‌پیكردن زووره‌ملى، ئه‌یه‌ بیجگه‌ سه‌ندنه‌وه‌ى شوناسنامه‌ له‌لیان و زه‌فتكردن ماڵ و موڵكیان وه‌ شیوه‌یگ  ك هویچ حكوومه‌تیگ  زویتر له‌یوا نه‌كردویگ  وه‌ جووریگ  نا ده‌ستورى و نا قانوونى.

له‌وه‌ختیگیش سه‌دام ڕمیاو ده‌سڵاتى نه‌مه‌ند، كورده‌یل فه‌یلى چه‌وه‌ڕى ئه‌وه‌ بوین یه‌كیگ  هویریان بكا له‌و حزبه‌یل سیاسى و كه‌سایه‌تیه‌یله‌ ك سه‌ركردایه‌تى ژیان سیاسى كه‌ن له‌عراق تازه‌، دى ئه‌و قه‌وڵه‌یله‌ هه‌ر دوباره‌وه‌ كریاو بڕیگ  له‌لیان سووز خوه‌یان نیشاندان وه‌ل كیشه‌گه‌یانا، وه‌لى فره‌یگ  له‌لیان له‌هویره‌و بردنه‌یان له‌وه‌ختیگ  ره‌سینه‌ ده‌سڵات و فره‌یگیش له‌كورده‌یل فه‌یلى هه‌ر له‌وڵاته‌یل تر جویر په‌نابه‌ر مه‌ندن له‌ژیر چادر تا ڕووژ ئمڕوو وه‌بى شوناسنامه‌. دى وه‌ى جووره‌ كورده‌یل فه‌یلى نه‌ڕه‌سینه‌ هه‌قه‌یلیان ك هه‌رچه‌نى قاپى دادگایه‌یل و ده‌زگایه‌یل ڕه‌سمى گردن له‌وه‌ر ئسپاتبوین هاووڵاتیبوینیان وه‌ڕه‌سمى و ئسپات ئه‌و هه‌قه‌یلیانه‌ ك ده‌سڵات سه‌دام تاڵانى كرد و برده‌ى، وه‌لى هه‌ر بى فایده‌ بوى جویر ئه‌وه‌ك خوه‌یان وه‌ ڕه‌زاى خوه‌یان ماڵه‌یلیان فرووشتوین و كه‌س ناته‌ ته‌نگیانه‌وه‌. ئه‌وه‌ بوى كورده‌یل فه‌یلى هه‌ر وه‌رده‌وام بوین له‌ بان داواكردن هه‌قه‌یلیان و دادگاى باڵاى تاوانه‌یل ئه‌و تاوانه‌یله‌ ده‌رخست ك ده‌رهه‌ق وه‌ى چینه‌ ئه‌نجام دریاویگ  ك تاریفى وه‌ له‌ناوبردن وه‌جه‌م كرد، ئمجا وه‌ گووره‌ى ئه‌وه‌یشه‌ ئه‌نجوومه‌ن وه‌زیره‌یل عراقى بڕیاریگ  ده‌ركرد له‌ژیر شماره‌(426) له‌تاریخ 8 / 12 / 2010 وه‌ ئه‌وه‌ك ئه‌نجوومه‌ن ناوبریاگ گشت ئه‌و بڕیار و چشته‌یل خراوه‌ له‌بانیان لاوه‌یگ  ك رژیم رمیاگ وه‌ هه‌قیان ده‌ریكرد و تائیسه‌یش وه‌رده‌وام بوى جویر مه‌سه‌له‌ى شوناسنامه‌و زه‌فتكردن ماڵ و موڵك و هه‌قه‌یل تر. هه‌ر له‌وه‌ر ئه‌وه‌یش دوینیم ئه‌و گفت و قه‌وڵ ئه‌نجوومه‌ن وه‌زیره‌یله‌ چووگه‌ قوناغ تازه‌یگه‌وه‌ له‌ حوكمكردن عراق و بایه‌سه‌ كارا یا ته‌فعیل بكریه‌یگ ، چوینكه‌ هه‌ڵویستیگ  نیشتمانى و تاریخیه‌ ئه‌را حكوومه‌ت له‌ى مه‌یدانه‌وه‌.