به‌ياننامه‌ی ده‌زگای شه‌فه‌ق وه‌بوونه‌ی زنجیره‌ كاره‌ساته‌يل تیرۆریستی ئی دویاخره‌

شفق نيوز

تیرۆریسته‌یل خوینڕیژ وه‌هاوكاری دوژمنه‌یل ده‌ره‌كی هه‌ر ڕووژ شیوازیگ نوو ئه‌را شه‌هید كردن ڕووڵه‌یل بی گونای وڵاته‌گه‌مان و ویران كردن شارستانیه‌ت شاره‌یلمان وه‌كارتیه‌رن, تا شایه‌د ملله‌ته‌گه‌مان له‌ ده‌سكه‌فته‌یل سیاسی و ئابووری له‌شوون پرۆسه‌ى ئازادى و دیموكراسى بی به‌ش و نائومید بكه‌ن.

به‌ڵێ له‌ی ڕووژه‌یل دویاخره‌ نیشتمانه‌ ئه‌زیزه‌گه‌مان وه‌چه‌ن ته‌قینه‌وه‌ی ناجوانمه‌ردانه‌ و شه‌هید و زیه‌مداربوین ژماره‌یگ له‌ هاوڵاتیه‌یل ئه‌زیزمان داچه‌ڵكیا ك له‌ شار به‌له‌درووز دژ وه‌هاوزووانه‌یل كوردمان ده‌سوه‌پی كرد و ئیكه‌ش هاوڵاتیه‌یل مه‌سیحی له‌ وه‌خت نماز و دوعا له‌ كه‌نیسه‌ی (سه‌یده‌ت نجات) كردنه‌ ئامانج كووركوورانه‌ی خوه‌یان و دویه‌كه‌یش چه‌ن ناوچه‌یگ شار به‌غدا وه‌ زنجیره‌یگ ته‌قینه‌وه‌ وه‌خاك وخوین كیشان تا شایه‌د بتویه‌نن ملله‌ته‌گه‌مان له‌ ڕی ئازادی و دیمۆكراتی ك له‌ شوون ڕمیان ڕژیم دكتاتوری گردیه‌سه‌ی وه‌ر په‌شیمانه‌و بكه‌ن.

ئیمه‌ له‌ ده‌زگای ڕه‌سانن و ڕووشنهویری كورده‌یل فه‌یلی (شه‌فه‌ق) له‌ وه‌ختیگ ئاره‌زووی به‌هیشت به‌رین ئه‌را شه‌هیده‌یلمان و خاسه‌وبوین هه‌رچی زویتر ئه‌را زیه‌مداره‌یل كرده‌وه‌یل تروریستى ئی دویاخره‌ كه‌یمن، گه‌رمترین سه‌ره‌خوه‌شی خوه‌مان ئاراسه‌ی خیزانه‌یل تازیه‌بار له‌ مه‌رگ ئه‌زیزه‌یلیان كه‌یم و له‌هه‌مان وه‌ختیش پڕ وه‌ده‌م هاوار ناڕه‌زایه‌تی و ئدانه‌ كردن خوه‌مان دژ وه‌ی كرده‌وه‌یل نائنسانیه‌ ده‌ربڕیمن و له‌ هیزه‌یل ئاسایش و پۆلیس توایمن ك وه‌هوشیاری زیاتر و زه‌حمه‌ت فیشتر هاوزووانه‌یل ئه‌زیزمان له‌ هه‌ڕه‌شه‌ی تیروریسته‌یل بپاریزن و ته‌كتیكه‌یل دوژمن له‌ وه‌رچه‌و داشتوون ك ئمڕوو بازاڕه‌یل و حوسه‌ینیه‌یل و جامیه‌یل و كه‌نیسه‌یل و سه‌رجه‌م شوونه‌یل گرده‌و بوین مه‌ردم، كه‌نه‌ ئامانج ناجوانمه‌ردانه‌ی خوه‌یان و له‌ وڵاته‌یل هاوسایش توایمن له‌یه‌ زیاتر په‌نای ئایم كوژه‌یل و تیرۆریسته‌یل نه‌یه‌ن و ده‌س خوه‌یان وه‌خوین ئه‌زیزه‌یلمان قرمزه‌و نه‌كه‌ن.

ده‌زگای ڕه‌سانن و ڕووشنهویری كورده‌یل فه‌یلی (شه‌فه‌ق) له‌ هاوڵاتیه‌یل ئه‌زیز و هاوزووانه‌یل قه‌دردارمان داوا كه‌یگ ك  له‌ وه‌راوه‌ر پیلانه‌یل دوژمن ك هاته‌ما یه‌كیه‌تی بته‌و نیشتمانیمان بشیونیگ هووشیار و یه‌ك ده‌نگ بوون و هاوخه‌می خوه‌یان وه‌ل خیزانه‌یل داخدار عه‌ره‌ب و كورد و مه‌سیحی و سه‌رجه‌م عێراقیه‌یل نیشان بیه‌ن و له‌ هه‌مان وه‌ختیش له‌ هیزه‌یل سیاسی وڵات توایمن هه‌رچی زویتر كوتایی بارنه‌ ناكووكیه‌یل خوه‌یان له‌بان پۆست و ده‌سه‌ڵات و ده‌سپیشخه‌ری یا موباده‌ره‌گه‌ی سه‌روك بارزانی بكه‌نه‌ بنه‌وایگ ئه‌را دامه‌زرانن حكوومه‌ت هاوبه‌شی نیشتمانی تا ده‌زگایه‌یل حكوومه‌ت وه‌شیوه‌ی چڕوپڕتر له‌ جاران بتویه‌نن پاریزگاری له‌ گیان وماڵ هاوڵاتیه‌یل بكه‌ن.

 

ده‌زگای ڕه‌سانن و ڕووشنهویری كورده‌یل فه‌یلی (شه‌فه‌ق)

به‌غدا - 3/11/2010