نه‌فت..هه‌رێم كوردستان ئه‌وه‌سیده‌ جه‌هانه‌و

شفق نيوز

  بیگومان نه‌فت وه‌ یه‌كیگ له‌ كاڵایه‌یل فریه‌ گرینگ و سه‌ره‌كی دانریه‌ید له‌ زوورم وڵاته‌یل وه‌گشتی و ده‌وڵه‌ته‌یل نه‌فتی وه‌ تایبه‌ت، ئه‌ویش وه‌ گووره‌ی ئه‌وه‌ك هه‌رێم كوردستانیش وڵاتیگ نه‌فتیه‌ وه‌ ڕیژه‌ی فریه‌یگ ، ئنجا یه‌یش له‌یوا ئه‌كا ك نه‌فت نه‌خش گرینگیگ داشتوود له‌ پرووسه‌ی گه‌شه‌سه‌ندن و ئاشناكردن مه‌سه‌له‌ی ره‌وای كورد و په‌یوه‌سكردنی وه‌ نه‌خشه‌ی سیاسی جه‌هان و ئاشناكردن هه‌رێم كوردستان جوور وازیزانیگ ناوده‌وڵه‌تی له‌پاڵ ئه‌كته‌ره‌یل تر ناوده‌وڵه‌تی.

وه‌ی جووره‌ نه‌فت بووده‌ خاڵ گرینگیگ له‌ پرووسه‌ی وه‌ره‌ونوابردن كیشه‌ی كورد له‌ جه‌هان، له‌ڕی كاركردن كومپانیایه‌یل وه‌به‌رهاوه‌ر ناودار نه‌فت له‌ جه‌هان جوور شیڤرۆن، دی ئێن ئۆ، گینێڵ ئینیرجی، تاقا، مائه‌رێكس ئۆیڵ، ئیكسۆن موبیل و گازپۆرم و چه‌نه‌ها كومپانیای تر ناودار له‌بان ئاست جه‌هان.

وه‌لی ئه‌وه‌ك له‌یرا دیاره‌ له‌باوه‌ت سامان نه‌فت له‌ هه‌رێم كوردستان مایه‌ی ئومیده‌ ئه‌را گشت مه‌ردم كوردستان ئه‌وه‌سه‌ ك وه‌ گووره‌ی راپۆرت ئاژانس وزه‌ی جه‌هانی، یه‌ده‌گ نه‌فت هه‌رێم كوردستان وه‌ فیشتر له‌ 45 ملیار به‌رمیل نه‌فت مه‌زه‌نه‌ كریه‌ید، ك رووژنامه‌ی فاینشاڵ تایمز بریتانییش جه‌خت له‌بان ئی ریژه‌ی یه‌ده‌گ نه‌فته‌ كردگه‌ له‌ هه‌رێم كوردستان، ئه‌ویش وه‌و راده‌ ك هه‌رێم كوردستان له‌روی یه‌ده‌گ نه‌فته‌و له‌بان ئاست جه‌هان وه‌ پله‌ی هه‌یشته‌م ئه‌یاد.

وه‌گووره‌ی ئه‌و ریككه‌فتننه‌یله‌ ك له‌ ناونی هه‌رێم كوردستان و توركیا ئمزا كریانه‌، هه‌رێم كوردستان توانای ئه‌وه‌ دیرید رووژانه‌ 300هه‌زار به‌رمیله‌ نه‌فت ره‌وانه‌ی بازاڕ وزه‌ی جه‌هانی بكاو له‌ ئاینده‌یش ئه‌و ریژه‌ به‌رزتره‌و بكا.

سامان نه‌فت له‌ هه‌رێم كوردستان ئه‌وه‌ ئویشیده‌ پیمان ك رووژ له‌ دویای رووژ نه‌فت پایه‌ی هه‌رێم كوردستان بته‌وتر ئه‌كا له‌ مه‌یدان ناوده‌وڵه‌تی و په‌یوه‌سكردنی وه‌ ده‌وڵه‌ته‌یل جه‌هان، چوینكه‌ وه‌ گووره‌ی شیه‌وكردنه‌یل بوار نه‌فت هه‌رێم كوردستان ریژه‌ی یه‌ده‌گه‌ نه‌فتیه‌گه‌ی وه‌ره‌و به‌رزه‌وبوین چوود، ك یه‌یش جووریگ له‌ وه‌یه‌كه‌و به‌سانن یا په‌یوه‌سكردن ناونی هه‌رێم كوردستان و ده‌وڵه‌ته‌یل جه‌هان له‌لی ئه‌كه‌فیده‌و.

ته‌حسین عه‌بدوڵڵا

ج. أ