هویره‌و كردن له‌سه‌رده‌م تفه‌نگ

شفق نيوز

ئه‌وه‌ك ئیسه‌ له‌ عراق گوزه‌رێد باریگه‌ ئه‌را ماڵئاوایى له‌ هه‌ر چركه‌ سه‌عاتیگ ك ئاده‌میزاد له‌تى هویره‌و بكا، له‌و چركه‌ ك تفه‌نگه‌یل قسه‌ كه‌ن و كه‌س گووش له‌ قه‌ڵه‌مه‌یل ناگرید.

 

بار له‌ناكاو ئه‌و باره‌سه‌ ئه‌را مه‌رگ هه‌ر هه‌وڵیگ مه‌ده‌نى و هه‌ر پرووسه‌یگ هویره‌وكردن، له‌ بار له‌ناكاو هه‌ر پرووژه‌یگ ئه‌را وه‌ مه‌ده‌نیكردن كوومه‌ڵگا ماڵئاوایى ئه‌كاو تفه‌نگ له‌جیاى قسه‌ ئه‌كاو بایه‌سه‌ خوه‌مان ئه‌را مه‌رگه‌سات تفه‌نگ ئاماده‌ بكه‌یم.

 

له‌ بار له‌ناكاو هس وه‌ دو رویداگ كریه‌ید: یه‌كه‌میان له‌بار له‌ناكاو هویره‌وكردن مرید، ئنجا ئه‌گه‌ر هات و هویره‌وكردنیش مرد كاره‌سات گه‌ورا روى ده‌ید، یه‌یش ماناى ئه‌وه‌سه‌ سه‌رده‌م مه‌رگ هویره‌وكردن و قه‌ڵه‌مه‌، له‌یرا (هیز) حوكم وه‌ كوومه‌ڵگا ئه‌كا نه‌ك هویره‌وكردن.

 

ئه‌و وه‌خته‌ ك هیز حوكم كرد، دى هویره‌وكردن خوه‌ى كیشیده‌و، ئنجا ئه‌و وه‌ختیشه‌ هویره‌و كردن و هه‌ر پرووسه‌یگ ئه‌را هویره‌وكردن و چاره‌سه‌ركردن كیشه‌یلمان له‌ڕوى  مه‌نتق و گفتوگوو كه‌فیده‌ بار نه‌وین جوور ئى بار ئیسه‌مانه‌ ك خه‌ریكه‌ ئه‌وه‌ك له‌ماوه‌ى هه‌یشتا ساڵ گوزه‌یشت هاوردیمنه‌سه‌ى ده‌س جاریگتر خوه‌ى دوباره‌وه‌ ئه‌كا له‌ مه‌سه‌له‌ى چه‌ك و خوین، دى ئه‌و ئاره‌زووه‌یله‌ ك داشتیمنه‌ى ئه‌را ئه‌وه‌ك وڵات بووده‌ شوونیگ ئه‌را هویره‌وكردن و پرووژه‌ى گه‌وراو ماڵئاوایى له‌ جه‌نگ تفه‌نگ ، بووده‌ خه‌یاڵ و نمایش سه‌ربازى و شوونله‌ق پرووژه‌ى مه‌ده‌نى و رووشنهویرى ئه‌كا.

 

دویه‌میش ئه‌وه‌سه‌ ك تاریخ ئیمه‌ تاریخیگه‌ ئه‌را باڵاده‌سى تفه‌نگ و له‌ى حاڵه‌تیشه‌ هویره‌وكردن مرید، ئنجا له‌ى جووره‌ سه‌رده‌میگ ك سوپا وه‌ خوه‌ى و چه‌كیه‌و هاتنه‌سه‌ بانمان زه‌ره‌د وه‌پیمان ره‌ساننه‌و به‌ڵكوو زه‌ره‌د فره‌ كوشنده‌یش له‌ قه‌ڵه‌م و هویره‌وكردنیش دانه‌.

 

ئیمه‌ وه‌هه‌ر جووریگ ته‌ماشاى بكه‌یم، بار له‌ناكاو جوور بار جه‌نگ و باڵاده‌سى تفه‌نگ ، باریگه‌ ئه‌را مه‌رگ هویره‌وكردن، دى ئه‌وه‌ك هس وه‌پى كریه‌ید چشتیگه‌ له‌ى باوه‌ته‌، وه‌لى بایه‌سه‌ ئه‌وه‌یش بزانیم ك ئیمه‌ هه‌میشه‌ مه‌ترسى سوپا ها له‌بانمان، هه‌ر له‌وه‌ر ئه‌وه‌یش گرینگه‌ خوه‌مان ئه‌را هه‌ر رویداگیگ ئاماده‌ بكه‌یم. رویداگیگ ك ئه‌گه‌ر ئه‌وه‌ دیرید گشت پرووسه‌یگ و گشت هه‌وڵیگ ئه‌را پرووژه‌ى گه‌ورا له‌ناو ئى جه‌وه‌ڵه‌یله‌ بكوشید، چوینكه‌ وه‌رده‌وام له‌تاریخ ئیمه‌ بیاوان گرفت گه‌ورا بویه‌ له‌وه‌رده‌م جه‌وه‌ڵ.

 

وه‌هه‌رحاڵ ئه‌را ئه‌وه‌ك جاریگتر مه‌ترسى نه‌ود له‌بانمان له‌ جه‌وه‌ڵه‌یل، بایه‌سه‌ شیه‌وكردن خوه‌مان ئه‌را بیاوان و ئه‌قڵیه‌ت بیاوانى ئاڵشت بكه‌یم.

 

عه‌زیز ره‌ووف

 

ج ا