با گشت رووژيگ بكه‌يمنه‌ رووژيگ ئه‌را رووشنهويرى كورد فه‌يلى له‌ ماڵه‌يلمان

شفق نيوز

بيجگه‌ رووشنهويرى گشت گرووپيگ ئنسانى، وه‌ل ئه‌وه‌يشا رووشنهويرييگ تر ئنسانى گشتى هه‌س ك گشت شيوازه‌يل رووشنهويرى ئه‌گرێده‌و ئه‌را گشت كه‌سيگ، ك ئه‌ويش جووره‌يل ره‌فتار هاوبه‌شه‌ ك ئاده‌ميزاد هووكاره‌ى ئه‌دێ بيجگه‌ رووشنهويريه‌ تايبه‌تيه‌گه‌ى خوه‌ى، له‌وانه‌يش وه‌كارهاوردن زووان جوور وسه‌يله‌يگ په‌يوه‌ندى و دابه‌شبوين ئاده‌ميزاد له‌بان بنه‌ماى ته‌مه‌ن و پيشه‌و ره‌گه‌ز(نير و ما)و ژنخوازين و زوڕيه‌ت جوور وه‌سيله‌ى وه‌رده‌وامبوين گرووپه‌يل ئنسانى و باوه‌ڕ و مه‌زه‌وه‌يل ئايينى و وه‌خاك سپاردن مردگ و يادكردنيان له‌ بوونه‌يل دياريكرياگ.

رووشنهويرى وه‌سيله‌يگه‌ له‌ وه‌سيله‌يل مه‌ندنه‌وه‌ى مه‌ردمان ئنسانى، ك هه‌رچه‌نى په‌ره‌ ئه‌سينێد و وه‌رده‌واميش ئالشت ئه‌دێ و تيكه‌ڵ رووشنهويريه‌يل تر ئه‌دێ، وه‌تايبه‌ت رووشنهويرى وڵاته‌يل هاوسا.

گرينگترين گووشه‌يگ له‌ گووشه‌يل رووشنهويرى، ئه‌و زووانه‌سه‌ ك مه‌ردم قسه‌ وه‌پى ئه‌كه‌ن و ئه‌يه‌رنه‌ى كار، يه‌يش بيجگه‌ نويسانن ئه‌و زووانه‌. گشت زووانه‌يل قسه‌ وه‌پيان ئه‌كريه‌ێد، وه‌لى گشتيان نويسانن نيه‌و ئه‌را نويسانن وه‌كار نايه‌ريه‌ن، ئمجا زووانه‌يليگ هه‌ن نويسانن ديرن.

زووان، جوور ئه‌وه‌گ باسى كرديم بنه‌ماى رووشنهويرى گشت مه‌ردمانيگه‌و وه‌رگريكه‌ره‌ له‌ ناسنامه‌گه‌ى، زووان يه‌كيگه‌ له‌و چشته‌يله‌ ك مناڵ هووكاره‌ى بوون له‌ناو ماڵه‌يل خوه‌يان و ده‌س ئه‌كه‌نه‌ قسه‌كردن، داڵگيش وه‌ پله‌ى يه‌كه‌م نه‌خش يه‌كلاكه‌ر و گه‌ورايگ ديرێد له‌ مه‌سه‌له‌ى يايگرتن مناڵه‌گه‌ى ئه‌را وه‌كارهاوردن زووان، چوينكه‌ دريژترين وه‌خته‌يليگ ها وه‌ليانا له‌ ساڵه‌يل يه‌كه‌م ته‌مه‌نيان، ك هه‌ر وه‌و خاتريشه‌ ئويشن"زووان داڵگ"، "لغة الام" modersmål"، "mother tongue...هتد، يه‌يش له‌ گشت زووانه‌يل، ئمجا هه‌ر وه‌و خاتريشه‌ فريه‌ گرينگه‌ ك گشت رووژيگ بكه‌يمنه‌ رووژيگ ئه‌را رووشنهويرى كوردى فه‌يلى له‌ ماڵه‌يلمان.

رووشنهويرى كوردى فه‌يلى

رووشنهويرى كوردى فه‌يلى رووشنهويرييگ واڵاو وازه‌ و كاريگه‌رى له‌ وه‌ رووشنهويريه‌يل تر، وه‌تايبه‌ت هاوساو كاريگه‌ره‌ له‌تى. رووشنهويرى كوردى فه‌يلى رووشنهويرييگ زرنگ و زينگ دايناميكيه‌ و وه‌رده‌واميش په‌ره‌ ئه‌سينێد و كاريگه‌ر ئه‌دێ وه‌ رووشنهويريه‌يل تر له‌ نيشتمان و له‌ غوربه‌ت و جار له‌يوا هه‌س وه‌بى ئيراده‌و جارجاريش وه‌ ئدراكه، وه‌ل ئه‌وه‌يشا رووشنهويرى كوردى فه‌يلى رووشنهويرييگه‌ دوير له‌ گرژى و تونڕه‌وى.

ئه‌و شوونه‌وار خراوه‌ ك له‌ ئاكام كووچ وه‌پيكردن و ده‌ركردن زووره‌ملى په‌يا بوى

مه‌ويسى و ده‌رده‌سه‌رى و مه‌ينه‌تيه‌يل كووچكردن و دويره‌وخستن زووره‌ملى و چويچيان و له‌ده‌سداين جگه‌رگووشه‌يل و له‌ناوبردن زيندانيه‌يل و زه‌فتكردن ماڵ و موڵك و به‌ڵگه‌يل فه‌رمى، گشت ئه‌يانه‌ شوونه‌وار هيشته‌جى له‌بان رووشنهويرى كوردى فه‌يلى، ئمجا بڕيگ له‌ليان جوور نموونه‌ باس ئه‌كه‌يم.

له‌وه‌ختيگ ك كورده‌يل فه‌يلى وه‌خشين ديرن وه‌ل مه‌ردمان تر، وه‌لى وه‌ل ئه‌وه‌يشا دوينيم تونڕه‌و و وه‌رده‌وامن له‌ ناكووكى له‌ناونى خوه‌يان، ئمڕوو دوينيم فريه‌يگ له‌ليان خوه‌ى نايه‌ده‌ ده‌س واقع و ته‌نانه‌ت تاڕاده‌يگ وه‌رگرى له‌ مافه‌يل زه‌فتكرياگ خوه‌يانيش ناكه‌ن، ك له‌ى باوه‌ته‌و هه‌رچه‌نى هه‌وڵ دريا، وه‌لى تويه‌نريا كه‌متر له‌ 800 ئمزا گرده‌و بكريه‌ێد ئه‌را پيشكه‌شكردن داواكارييگ ئه‌را نه‌ته‌وه‌يل يه‌كگرتگ و ريكخرياگه‌يل تر ناوده‌وڵه‌تى وه‌خاتر گه‌ردين له‌شوون ئه‌و 20 هه‌زار جايه‌ڵ جوانه‌يلمانه‌ ك بيسه‌روشوون كريانه‌ ك سه‌رۆك وه‌زيره‌يل وه‌رين له‌ لێدوانيگ باسى كرد و له‌ناونى 5000 و 15000 كه‌سه‌يل تر ك مه‌زه‌نه‌ى كردنه‌.

دى وه‌و خاتريشه‌ فريه‌يگ له‌ليان تواناى هويچ جموجويليگ نه‌يرن و رووح ده‌سه‌جه‌مى له‌لايان فريه‌ كزه‌و بوى و گيان ته‌كڕه‌وى زاڵ بويه‌ بانيان و ئه‌نانه‌يتيان فيشتره‌و بوى، يه‌يش وه‌ چه‌واشه‌ى باوگ و باپيره‌يلمان ك بنيات خوه‌ندنگاى فه‌يليه‌ وه‌ جه‌م نان و ته‌نانه‌ت ئه‌وسايش ئه‌و توانا جوور ئيسه‌ نه‌وى.

يه‌كێتى ديموكرات كورد فه‌يلى