كورد فه‌یلى یه‌كم قوربانیه‌یل چه‌ك كیمیاوى بوین

شفق نيوز

"فرانس ڤان ئانرات" بڕیار بوى له‌ ڕووژ 31 كانون دویم گوزه‌یشته‌ نیشتنیگ گریه‌بیاتاد ئه‌را له‌یه‌كه‌وداین مه‌سه‌له‌ى قه‌ره‌بووكردن قوربانیه‌یل چه‌ك كیمیاوى له‌ هه‌ردوگ شار هه‌ڵه‌بجه‌ى عیراقى و سه‌ره‌ده‌شت ئیرانى.

ئه‌و سه‌رچاوه‌یله‌ له‌ سه‌ر زووان هه‌ردوگ شكاتكه‌ر (عه‌لى ره‌حیم) له‌ شار سه‌ره‌ده‌شت ئیرانى و ئه‌ندام لق ڕووژهه‌ڵات(كوردستان ئیران) له‌ ڕیكخریاى كوردۆساید، و هونه‌رمه‌ند (دانیا عه‌لى) له‌ شار هه‌ڵه‌بجه‌ى له‌ هه‌رێم كوردستان عیراق، دادگاگه‌ ئى كه‌یسه‌ ده‌یده‌ یه‌كا ئه‌را قه‌ره‌بووكردن قوربانیه‌یل چه‌ك كیمیاوى.

له‌ى ماوه‌ چه‌ن كه‌سایه‌تییگ كورد فه‌یلى له‌بان ئه‌وه‌ جه‌خت كه‌ن ك كورده‌یل فه‌یلى ڕیز یه‌كم بوین له‌ قوربانیه‌یل ئه‌و چه‌كه‌یل كیمیاویه‌ ك ڕژیم وه‌رین دژ وه‌كورد و نه‌یاره‌یلى وه‌كارى هاورد و هه‌ر له‌یوا له‌ جه‌نگ عیراق – ئیرانیش وه‌كارى هاورد، ئه‌و سه‌رچاوه‌یله‌ ئه‌وه‌یشه‌ ئاشكراكردن ك ڕژیم وه‌رین په‌یكه‌ر یا جه‌سته‌ى جایڵ وجوانه‌یل كورده‌یل فه‌یلى ك له‌ زندانه‌یل به‌ندى كریاوین كرده‌یانه‌ تاقیگه‌(مختبر) ئه‌را تاقیه‌وكردن چه‌كه‌یل كیمیاوى و له‌ ئاكامیشا هه‌زاران له‌ى جایڵ جوانه‌یل فه‌یلى بى تاوانه‌ بوینه‌ قوربانى.

عادل موراد سه‌رۆك ده‌سه‌ى وه‌شوونكه‌فتن كێشه‌یل كورده‌یل فه‌یلى له‌ نویسینگه‌ى سه‌رۆكایه‌تى كۆمار له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ئاشكراكرد ك :" ئه‌و زانیاریه‌یله‌ ك هانه‌ ژیر ده‌سمان له‌باوه‌ت ماوه‌ى ده‌سگیركردن جایڵ جوانه‌یل كورد فه‌یلى، ك كه‌سوكار و خێزانه‌یلیان ته‌سفیر كریان، ئه‌وه‌ ئاشكراكه‌ید ك له‌ زندانه‌یل جیاجیا بریان ئه‌را زندان نوگره‌سه‌ڵمان له‌ ساڵه‌یل 81 و 82 تا 84 سه‌ده‌ى وه‌رین و له‌و ماوه‌ ڕژیم دیكتاتۆرى هه‌وڵ دیاد له‌ جه‌نگ عیراق-ئیران چه‌كه‌یل كیمیاوى و چه‌كه‌یل ژه‌هراوى تاقیه‌و بكه‌ید تا له‌ جه‌نگه‌گه‌ دژ وه‌ ئیران وه‌كارى بارید".

عادل موراد ئه‌وه‌یشه‌ ڕووشنه‌وكرد ك :"ڕژیم وه‌رین وه‌ مه‌هانه‌ى نه‌قڵكردنیان ئه‌را زندانه‌یلیگتر، وه‌چه‌ن كاروانیگ یه‌ك له‌ شوون یه‌ك، جایڵ وجوانه‌یل بردیاد ئه‌را ئه‌و ناوچه‌یله‌ ك تاقیگه‌ى پیشخستن چه‌ك كیمیاوى له‌تیان بوى، له‌و سه‌رده‌میشه‌ دكتۆریگ كورد سه‌رپه‌رشتى كردیاده‌ بان ئاو له‌ پارێزگاى سه‌ماوه‌ و له‌بان ئه‌وه‌ جه‌خت كرد ك ئه‌و كورده‌یل فه‌یلیه‌ ك له‌ نوگره‌سه‌لمانه‌و بریان، ئه‌را ئه‌زموون چه‌ك كیمیاوى وه‌كاریان هاوردیان ودویاخر له‌ قه‌ورسانه‌یلیگ ده‌سه‌جه‌مى له‌ ناوچه‌ى عه‌رعه‌ر له‌ نزیك مه‌رز سعودیه‌،خاكیان كردیاد".

صادق مه‌سعودى پارێزه‌ر له‌ ده‌سه‌ى وه‌رگریكردن له‌ كه‌یس كورده‌یل فه‌یلى له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ڕووشنه‌وكرد ك :"ئه‌و شایه‌ته‌یله‌ ك ئه‌را دادگا باڵاى تاوان تایبه‌ت وه‌تاوانه‌یل سه‌ران ڕژیم وه‌رین دژ وه‌ كورده‌یل فه‌یلى چڕیان، له‌ شایه‌تیداینیان له‌بان ئه‌وه‌ جه‌ختكردن ك ڕووڵه‌یل به‌ندكریایان له‌و سه‌رده‌مه‌ تویش ئه‌زموونه‌یل چه‌ك كیمیاوى هاوریان له‌ تاقیگه‌یلیگ سه‌ربازى و شه‌هید كریان و تا ئیسه‌یش ته‌رمه‌یلیان بى نوین كریانه‌".

له‌ لاى خوه‌یه‌و قازى و قائمقام هه‌ڵه‌بجه‌ گۆران ئه‌دهه‌م له‌ په‌یوه‌ندییگى وه‌ل ماڵپه‌ر شه‌فه‌ق ئه‌و تاوانه‌یله‌ ك ده‌رهه‌ق كورده‌یل فه‌یلى ئه‌نجام دریان وه‌ "سه‌ره‌تاى هه‌ڵمه‌ته‌یل جینۆساید ملله‌ت كورد" شماره‌ كرد.

گۆران ئه‌دهه‌م ئه‌وه‌یشه‌ ئاشكراكرد ك :"به‌ڵگه‌نامه‌و دوكیومێنته‌یل فره‌یگ  خریا وه‌رده‌س دادگاى باڵاى تاوان تایبه‌ت وه‌كورده‌یل فه‌یلى ئه‌وه‌ چه‌سپانن ك ڕژیم وه‌رین جایڵ وجوانه‌یل كورده‌یل فه‌یلى له‌ تاقیگه‌یل پیشخستن چه‌ك كیمیاوى وه‌كارهاورد".

گۆران داوا له‌ كه‌سوكار قوربانیه‌یل ئه‌زموونه‌یل كیمیاوى كرد له‌ دادگاى (لاهاى) شكات بكه‌ن و ئه‌و به‌ڵگه‌نامه‌یله‌ ك ها وه‌ده‌سیانه‌و پیشكه‌شى وه‌و دادگا بكه‌ن و داواى قه‌ره‌بوو بكه‌ن له‌و كۆمپانیایه‌یله‌ ك ماده‌یل كیمیاوى دانه‌ ڕژیم وه‌رین".

 

هه‌ڵه‌وگردانن: ماجد سوره‌مێرى