زه‌وى له‌بان مانگ، وه‌فه‌قیر چه‌؟

شفق نيوز

ئاده‌میزاد و خێزانه‌یل جوور یه‌ك نییه‌و جیاوازه‌. كه‌سه‌یلیگ له‌ناو باڵه‌خانه‌ى چه‌ن نهۆمى نیشتنه‌و ژیان وه‌كام دڵه‌یلیان ئه‌وه‌نه‌ سه‌ر، مه‌ردمانیگیش له‌ناو كه‌لاوه‌ كویه‌نه‌یگ شه‌وه‌یل وه‌ زگ ورسگ سه‌ره‌و نه‌ن، خێزانه‌یلیگ هه‌ن له‌خوه‌شییا خوازن باڵه‌و بگرن وه‌ره‌و ئاسمان و له‌بان مانگ جینشین بوون و مه‌ردمگیش هه‌ن تام خوه‌شى نه‌كردنه‌و یه‌ك وژه‌ خاك له‌ خوه‌یان شك ناوه‌ن له‌ ژیرماڵه‌ى ئه‌ى و ئه‌و نیشتنه‌، دى نازانیم چه‌رخ رووژگار وه‌ره‌و كاملا ئه‌واده‌مان و كى پشت وپه‌ناى فه‌قیره‌یله‌ بیجگه‌ خودا؟؟

 

وه‌رجه‌ ماوه‌یگ رووژنامه‌یگ دیم وه‌ده‌س كوڕه‌ جایه‌ڵیگ كارگه‌ر رووژانه‌و فه‌قیرحاڵ، ك دویاى خوه‌ندنه‌وه‌ى چه‌ن ده‌قه‌یگ هه‌ناسه‌ى قویلیگ هه‌ڵكیشاو جگاره‌یگ ده‌مداو چییه‌ ناو خه‌یاڵ قویلیگه‌و، منیش له‌لى پرسیم گیان خوه‌د مه‌مه‌ر هه‌ڵكیشان ئه‌و هه‌ناسه‌ى قویله‌ چه‌ بوى، دوجاره‌ هه‌ناسیگ تر هه‌ڵكیشاو وت: مه‌ردمانیگ زه‌وى له‌بان مانگ سینن و مه‌ردمانیگش هه‌ن وژه‌یگ خاك له‌خوه‌یان نه‌یرن، تمه‌ز ئه‌یه‌ هه‌واڵیگ ئاژانس ئه‌نادۆل خوه‌نستگه‌سه‌و ك له‌تى ئاماژه‌ وه‌ ئه‌وه‌ كردگه‌ 100 هاووڵاتى تورك له‌ڕێ ماڵپه‌ڕێگ تایبه‌ته‌و زه‌وى له‌بان مانگ سه‌ندنه‌، ك ئى ماڵپه‌ڕه‌ گشت مانگیگ 100 پارچه‌ زه‌وى له‌بان مانگ ئاماده‌ ئه‌كا ئه‌را فرووشتن ك هه‌ر پارچه‌یگیان رویوه‌ره‌گه‌ى 4 دۆنمه‌و نرخه‌گه‌ى 99 لیره‌ى توركیه‌ ك ئه‌كاده‌ نزیكه‌ى 55 دۆلار و دویاى سه‌ندن زه‌ویه‌گه‌ به‌ڵگه‌نامه‌یگ وه‌پیان دریه‌ێدو شوون ئه‌و زه‌ویه‌یله‌و هه‌ق موڵكدارى زه‌ویه‌گه‌ ئه‌رایان دیارى ئه‌كا.

 

ئمجا وه‌ گووره‌ى ئاژانسه‌یل هه‌واڵ، ئه‌وه‌ ده‌ركه‌فتگه‌ ك تائیسه‌ نزیكه‌ى 2ملیۆن و 500هه‌زار كه‌س زه‌وى له‌بان مانگ سه‌ندنه‌ له‌ 172 وڵات له‌ جه‌هان و له‌وانه‌یش بڕیگ له‌ ناوداره‌یل جوور(تۆم كروز و پاریس هیلتۆن و شارۆن ستون و جۆرج بۆش و رۆمان ابراموفیتش و...هتد).

 

وه‌لى ئیمه‌ ئویشیم ئایا دونیا ئه‌وه‌ تیه‌رزێد داخ ئه‌ڕاى بكیشیم و دادبیداد ئه‌ڕا چشتیگ بكه‌یم ك تا سه‌ر نییه‌و نادێده‌ موڵك كه‌س؟ زه‌وى له‌بان مانگ وه‌ فه‌قیر چه‌... بان مانگ و بان زه‌وى هه‌ر دارنده‌ وه‌پى شاده‌و نه‌داریش شه‌وه‌كى تا ئیواره‌ مه‌گه‌ر هه‌ر تكه‌پا بیاد و پویل كراماڵ ده‌ربكاو ژیانیگ بژى مه‌مر داشتوود.

 

ج.ا