هه‌ڵه‌يل دوباره‌كرياگ فه‌يلى و نموونه‌ى يارسانى

شفق نيوز

له‌ هه‌ڵوژاردنه‌يل ئى دوياخره‌ له‌ ێران وه‌تايبه‌ت له‌ شار ئسلام ئاباد سه‌ر وه‌ پاريزگاى كرماشان كوردستانى، ئوميده‌يليگ هه‌س ك شايه‌ت ئاماژه‌ وه‌ ئاكامه‌يلى بكه‌يم نه‌ك له‌ڕوى زه‌ره‌د و قانجاز، به‌ڵكوو له‌ گووشه‌ى چه‌سپانن وجوود و وه‌ده‌سهاوردن حورمه‌ت وه‌رانوه‌ر، چوينه‌ بار ئى شاره‌"ئسلام ئاباد"له‌ڕوى ديموگرافى و باوه‌ره‌يله‌و فريه‌جار جوور بار كورده‌يل فه‌يليه‌، ئى شاره‌ پيكهاتگه‌ له‌ مه‌ردمانيگ تيكه‌ڵ سه‌ر وه‌ ديانه‌ت ئه‌هلولهه‌ق"يارسان"و زوورمينه‌ى موسڵمان شيعه‌، ك هه‌ر له‌وه‌خت سه‌ركه‌فتنه‌يل شووڕش ئيرانى تائيسه‌ وه‌گووه‌رى ياسايه‌يل ئيران هويچ وه‌ختيگ دگان فه‌رمى وه‌ مافه‌يل مه‌ردم ديانه‌ت يارسانى نه‌كرياگه‌، ك ريژه‌يان وه‌ سه‌دان هه‌زار كه‌س مه‌زه‌نه‌ ئه‌كريه‌ێد و له‌ناوچه‌يل جياجيايگ وجوود ديرن، وه‌لێ وه‌ بوونه‌ى ريژه‌ى مه‌ردمى له‌ پاريزگاى كرماشان وه‌تايبه‌ت ئسلام ئاباد له‌گشت شاره‌يل تر فيشتره‌و له‌ى ساڵه‌يل دوياخريشه‌ ك هه‌رچه‌نى حكومه‌ت له‌ ته‌هران گشت هه‌وڵيگ دا ماف نوێنه‌رايه‌تى وه‌ كۆتا وه‌پيان نه‌يه‌ێد يا كانديديان له‌ ئه‌نجومه‌ن شورا په‌سه‌ن نه‌كا، وه‌لێ وه‌ به‌ڵگه‌يل تر له‌يوا دوينم ك سه‌ركرده‌يل تايفه‌گه‌ وه‌تايبه‌ت سه‌ى نه‌سره‌دين حه‌يده‌رى ك فيشتر ناوداريانه‌ وه‌ ئه‌زموون و داناييه‌و مامڵه‌ ئه‌كاو په‌ند وعبره‌ت فريه‌يگ وه‌رگرتگه‌و ئاگاداره‌ له‌وه‌گ لايه‌ن وه‌رانوه‌ر چه‌ ئه‌خوازێد و هه‌رچه‌نى ك كيشه‌و گرفت و مه‌ينه‌تيه‌يل سياسى سه‌ختيگيش‌ ئه‌ياده‌ تويش په‌يڕه‌وكه‌ره‌يل ئه‌و ديانه‌ته‌ ك به‌ڵنس كۆمه‌ڵايه‌تى نموونه‌ييگ ديرن له‌ جاده‌و يه‌يش له‌ى خاڵه‌يله‌ خوه‌ى ديونێده‌و:

يه‌كه‌م: جوور ئه‌وه‌گ ئه‌زانم له‌ پرووسه‌ى هه‌ڵوژاردن كانديده‌يل وه‌گشت جووريگ هه‌وڵ وه‌ده‌سهاوردن ده‌نگه‌يل ئه‌يه‌ن.

دويه‌م: له‌ هه‌ر پرووسه‌يگ سياسى ريككه‌فتن و هاوپه‌يمانێتى ئاشكراو نائاشكرا هه‌س.

سێيه‌م: هه‌ر حكومه‌تيش بيجگه‌ گشت پلانه‌يلى، وه‌ل ئه‌وه‌يشا پێوه‌ر به‌شداريكردن ده‌سنيشان سه‌ركه‌فتنى له‌ شكه‌ستى ئه‌كا.

ئمجا له‌ساى ئه‌و خاڵه‌يله‌ په‌يڕه‌وكاره‌يل يارسان و سه‌ركرده‌يليان وه‌ گووره‌ى ئه‌زموونه‌يل گوزه‌يشتيان و ئه‌و گامه‌يل له‌وه‌رگيرياگه‌ ك هه‌رچه‌نى كانديد ئه‌را تايفه‌گه‌ ديارى ناكريه‌ێد و بوينه‌سه‌ خايه‌ى گوبان له‌ هاوكيشه‌ى سه‌ركه‌فتن و شكه‌ست له‌ هه‌ڵوژاردنه‌يل، وه‌لێ وه‌ل ئه‌وه‌يشا ريژه‌ى موسڵمانه‌يل شيعه‌ فريه‌ له‌ په‌يڕه‌وه‌يل ئه‌و ديانه‌ت فيشتره‌، وه‌لێ وتار يه‌كگرتگ ئه‌وانه‌ جى ئه‌و فريه‌ييه‌ ئه‌گرێده‌و.

ئيمه‌ مه‌رام له‌وه‌ نه‌يريم باس له‌باره‌ى ئه‌وه‌ بكه‌يم كام له‌و كانديده‌يل ئه‌و هه‌ردوگ لاينه‌ سه‌ركه‌فتن وه‌ده‌س ئه‌يه‌رێد، به‌ڵكوو سه‌ركه‌فتگ راسكانى خاوه‌ن حورمه‌ت و به‌خشين شه‌رعيه‌‌ له‌لايه‌ن له‌لايه‌ن ئه‌هلولهه‌قه‌و، چوينكه‌ لايه‌ن تر ئه‌يه‌ن له‌ قاپيه‌يل په‌يڕه‌وكاره‌يل ئه‌و ديانه‌ته‌و ڕايان وه‌رئه‌گرن و دگان وه‌ قه‌واره‌و قورسييان ئه‌نه‌ن له‌ كومه‌ڵگا، ك ئه‌ويش وه‌ بوونه‌ى ئه‌وه‌گ گه‌ورا و بويچگيان گرده‌و بوينه‌ له‌ده‌ور سه‌ركرده‌گه‌يان و باوه‌ڕ وه‌ ئه‌وه‌ ديرن ك ئى مه‌سه‌له‌ ته‌نيا چاره‌سه‌ريگه‌ ئه‌را وجوود باقى مه‌ردمه‌گه‌يان، هه‌ر له‌وه‌ر ئه‌وه‌يش له‌ گوزه‌يشت و له‌ ئاينده‌يش ئى راسيه‌ زه‌مانه‌ته‌ وه‌ ئه‌وه‌گ هه‌ركه‌سيگ له‌ڕوى مامڵه‌كردنه‌و بايه‌سه‌ مامله‌ وه‌ گووره‌ى خواسته‌يليان وه‌ليانا بكاو نموونه‌يش له‌ى رويه‌و ئه‌وه‌سه‌ ك له‌ى هه‌ڵوژارنه‌يل دوياخره‌ ئه‌وه‌ بوى ك كه‌س سه‌ركه‌فتگ كانديد په‌يڕه‌وكار ديانه‌ته‌گه‌ نه‌وى، وه‌لێ عوزرخوايى ئاشكرايگ پيشكه‌شيان كرد وه‌ بوونه‌ى متمانه‌ وه‌رنه‌گرتنيان و ئوميده‌وار بوى له‌ ئاينده‌ ئه‌و مافه‌ وه‌ده‌س بارێد وه‌ ئه‌وه‌گ خاس زانێد ك ژيان سياسى ئاينده‌ى په‌يوه‌سه‌ وه‌ مه‌ردم ئه‌و ديانه‌ته‌ ئه‌گه‌ر له‌ حاڵه‌تيگ ته‌ماى ئه‌وه‌ داشتوود له‌ى بواره‌ وه‌رده‌وام بدێ.

عه‌لى حسێن فه‌يلى