گڕه‌ى(گه‌رمه‌سێر)مان باوه‌ش (ئێڵاخ) توایگ

شفق نيوز

خوه‌شى و شادى ملله‌تیگ ژیرده‌سه‌و ئاشتیخواز كه‌فته‌ ده‌س دڕنده‌ترین كه‌سه‌یل بان گووشه‌ى زه‌وى، نائومیدى و ئاواره‌یى بویه‌ به‌ش كورده‌یل، كیمیاواران و ئه‌نفال و گرتن و كوشتن قوربانیه‌یل فره‌یگ له‌لى كه‌فته‌وه‌، شاره‌یلمان ته‌عریب كریا، شوناسنامه‌و ماڵ و موڵكمان زه‌فت كریا، ده‌سكارى ئاو وخاك و كلتوورمان كردن، نه‌خشه‌ى ئیڵاخ و گه‌رمه‌سیرمان ئاڵشت كردن، وه‌لى نه‌تویه‌نستن دڵه‌یلمان ته‌عریب بكه‌ن، سه‌بر فره‌یگ  كردیم تا ده‌روازه‌یگ له‌ڕویمان واز بوى و هه‌ناسه‌یگ خوه‌شى كیشایمه‌ دڵ.

راسه‌ به‌شیگ له‌خاك كوردستان ئازاده‌و ژیان ئارام له‌تى به‌رقه‌راره‌و خاوه‌ن حكوومه‌ت و په‌رله‌مان و دام و ده‌زگاى خوه‌مانیم، ك یه‌یش ده‌سكه‌فت گه‌ورایگه‌، وه‌لى له‌هه‌مان وه‌خت ئه‌وه‌یش له‌هویر نیه‌وه‌یم ك ناوچه‌یلیگ دیریم داوڕیانه‌ له‌كوردستان و هیمان چه‌وه‌ڕى ئه‌وه‌ كه‌ن بانه‌وه‌ ئه‌را باوه‌ش كوردستان و تائیسه‌یش مه‌ردم زوورم ئه‌و ناوچه‌یله‌ له‌شوونه‌یل تر ناوڕاس و باشوور عراق ژیه‌ن و دڵیان وه‌ مادده‌ى (140) خوه‌شه‌ ك له‌ئاینده‌ى نزیكیگ جى وه‌جى بكریه‌یگ و چاره‌نویس ناوچه‌یلیان دیارى بكریه‌یگ جویر خانه‌قى و مه‌نه‌لى تا به‌دره‌و جه‌سان ك خاك ڕه‌سه‌ن كورده‌یله‌و مه‌ردمه‌گه‌ى زوڵم و زوور فره‌یگ  له‌لیان كریاو تائیسه‌یش به‌شیگ  له‌زه‌وى و زاریان عه‌ره‌ب داگیرى كردگه‌.

راسه‌ له‌لایگه‌وه‌ كیشه‌ى كورده‌یل فه‌یلى له‌دادگاى باڵاى تاوانه‌یل بڕیار خاسیگ  له‌بانى دریاو حوكم له‌بان تاوانباره‌یل دریاو تاڕاده‌یگ مایه‌ى ڕه‌زامه‌نى فه‌یلیه‌یل بوى، وه‌لى وه‌ل ئه‌وه‌یشا گڕه‌ى (گه‌رمه‌سیر)مان باوه‌ش (ئێڵاخ) توایگ و توایم گشت ناوچه‌یل داوڕیاگمان بانه‌وه‌ ئه‌را باوه‌ش دایگ ك ئه‌ویش كوردستانه‌. گه‌رمه‌سیر خاك وه‌رفراون پڕ له‌پیت و به‌ره‌كه‌تیگ دیریگ، بیجگه‌ ئه‌وه‌یش مه‌نه‌لى تا به‌دره‌و جه‌سان ك كه‌فته‌سه‌ بان پاریزگاى دیاله‌ ڕوى وه‌ر یا مه‌ساحه‌گه‌ى(10236كم2)و حه‌یفه‌ بفه‌وتیه‌یگ، چوینكه‌ له‌ناونى خانه‌قى تادویا مه‌رز كوردستان له‌گه‌رمه‌سیر بیجگه‌ چه‌ن قه‌زاو ناحیه‌یگ له‌هه‌مان وه‌خت(287)ئاواییش گرته‌سه‌ خوه‌ى و گشتى خاك گه‌رمه‌سیر كوردستانه‌گه‌مانه‌.