كی وه‌ وژدانه‌وه‌ نوڕيگه‌ كورده‌يل فه‌يلی و زه‌خمه‌يليان ساڕيژ كه‌يگ ؟

شفق نيوز

وه‌خت مه‌ينه‌تيه‌يل فره‌يگيش له‌وه‌خت ده‌روه‌ده‌ركردنيان له‌ساڵ ١٩٨٠و هه‌ر له‌ی باوه‌ته‌وه‌ ده‌يه‌ها به‌رنامه‌ له‌ژير ناونيشان ده‌روه‌ده‌ری و ماڵويرانی كورده‌يل فه‌يلی كه‌فته‌سه‌ وه‌رچه‌ومان ، وه‌ل ئه‌وه‌يشا نوڕستنمان ئه‌را ئه‌و دانيشتنه‌يل دادگاييكردن تايبه‌ته‌ ك له‌تی دادگايی ئه‌وتاوانباره‌يل كريا ك زوڵم و زوور ده‌رهه‌ق وه‌ كورده‌يل فه‌يلی كردنه‌ ، ئه‌و تاوانه‌يله‌ ك وه‌تاوان دژئنسانيه‌ت له‌قه‌ڵه‌م دريه‌ن و هويچ ئاده‌ميزاديگ ئاسايی ئه‌و كرده‌وه‌يله‌ ئه‌نجام نيه‌يگ ته‌نيا تاوانباره‌يل نه‌ون ك هويچ وژدان و ره‌حميگ ئنسانی نه‌ياشتن ، ئه‌وانه‌ پياگه‌يل به‌عس سه‌دامی بوين ك پيكهاتوين له‌ قه‌يريگ وه‌حش و دڕنده‌و ده‌سكردنه‌ كوشتن و گرتن و جيوازكردن خيزانه‌يل كورد فه‌يلی و له‌زندانه‌يل گرديانه‌وكردن و ئه‌وه‌ك جايه‌ڵ جوان بوی بی سه‌روشوونيان كرياو ژن و مناڵيانيش ئاواره‌ی ده‌يشت وڵات كرياو دويره‌و خريان وه‌ره‌و مه‌رز ئيران .

پياگه‌يل به‌عس ئه‌وه‌ ئه‌خڵاقيان بوی دژ ملله‌ت عراق و گشت ريگه‌يل نائنسانی په‌يڕه‌و كرديان ، ئمجا له‌شوون ئه‌وه‌ك رووڵه‌يل كورد فه‌يلی له‌خيزانه‌يليان جياوه‌ كريا ، ئه‌وه‌ بوی له‌زندانه‌يل (ئه‌بو غرێب) زندانی كريان و دويای به‌دبه‌ختی و مامڵه‌كردنيگ وه‌حشيانه‌ وه‌ليانا له‌لايه‌ن وه‌رپرسه‌يل زندانه‌وه‌ وه‌بی هويچ تاوانيگ ، نه‌يشتن هويچ ريكخرياگيگ ئنسانی سه‌ردان كورده‌يل فه‌يلی بكه‌يگ ، تا ره‌سيه‌ ئه‌و راده‌ له‌ژير ئه‌و زوڵم وزوور ناهه‌قه‌ ده‌سكردنه‌ هاوارو دروشم يا شعاره‌يليگ له‌دژ رژيم به‌عس به‌رزه‌و كردن و گشتيان وه‌يه‌ك ده‌نگ قسه‌ وه‌به‌عس كرديان ، ئمجا له‌بان ئه‌وه‌ رژيم گووڕ وه‌گووڕ فه‌رمان جيوازكردنيان دا ئه‌را زندان (باستيل) ك ناسرياگه‌ وه‌ زندان ( نگره‌ سه‌ڵمان) ك دويرترين بياوانه‌ له‌ سه‌ماوه‌ ، ئه‌ويش له‌وه‌ر ئه‌وه‌ك له‌وه‌رچه‌و ريكخرياگه‌يل ئنسانی و هه‌قه‌يل ئاده‌ميزاد نه‌يليگه‌يان و دويريانه‌و بخه‌يگ ، له‌هه‌مان وه‌خت نيه‌ت ئه‌وه‌ داشت گشتيان بكوشيگ ، بيگومان ماوه‌يگ وه‌پی نه‌چی له‌و زندانه‌و له‌يوا وه‌پيان هات شوونه‌وار نه‌خوه‌شی جووراوجوور له‌له‌شيان دياردا ، ئه‌ويش وه‌سه‌به‌ب ئه‌وه‌ك مادده‌ی ژه‌هراوی خستنه‌ ناو خواردنه‌وه‌ ئه‌ڕايان و له‌ليانيش بوی چه‌ك كيمياوی وه‌پيان تاقيه‌و كردن و شماره‌ی فره‌يگ وه‌و سه‌به‌به‌وه‌ كوشياو ته‌رمه‌يل پاك و بيگه‌رديان شارياوه‌ له‌وه‌ر ئه‌وه‌ك ئه‌و تاوانه‌يل گه‌ورا ئاشكرا نه‌وگ و كه‌س وه‌پيان نه‌زانيگ .

بيجگه‌ ئه‌وه‌يش هه‌رچی ماڵ وموڵكه‌يليانه‌ وه‌ته‌واوی داگيركرياو هه‌رچی داشتن بريا ، ئه‌يه‌ بيجگه‌ دوكان و كارخانه‌و كومپانياو دوكانه‌يل بازرگانی له‌ بازاڕ شۆرجه‌و گشتی دابه‌ش كريا له‌بان كه‌س وكارو پياگه‌يل رژيم رمياگ به‌عس ، ته‌نانه‌ت ئه‌و پويليشه‌ ك له‌بانكه‌يل حكوومی داشتنه‌ی نه‌يشتن هويچ له‌لی بووه‌ن وه‌بڕياريگ له‌ خود سه‌دامه‌وه‌ . ئه‌يه‌ بوی به‌دبه‌ختی و ده‌رده‌سه‌ری كورده‌يل فه‌يلی ك گشت عراقيه‌يل ئی راسيه‌ زانن و له‌هه‌مان وه‌خت وه‌قانوونی توومار كرياگه‌ له‌لای ريكخرياگه‌يل ئنسانی و خاچ قرمز (صليب الاحمر) ، وه‌ل ئه‌وه‌يشا گشت ئه‌و كاره‌سات و به‌دبه‌ختيه‌ ك هاته‌ بانيان له‌و ساڵه‌يل دويرودريژه‌و له‌و غه‌ريبيه‌و له‌و زندانه‌يل رژيمه‌و ئه‌و هه‌مگه‌ ناڕه‌حه‌تيه‌ ك وه‌سه‌ريان هات هيمان له‌خوه‌شه‌ويسی كورده‌يل فه‌يلی كه‌مه‌و نه‌كرد ئه‌را ولله‌ت و وڵاته‌گه‌يان ك خاك باوگ و باپيره‌يليانه‌ ، ئايا وه‌رپرسيگ حكوومی هه‌س نه‌زانيگ له‌و كاره‌سات كورده‌يل فه‌يليه‌و نه‌زانيگ ئه‌را چه‌ هيمان ئی شه‌ريحه‌ زوڵم له‌ليكرياگه‌و هه‌قی خورياگه‌ ؟ ئايا هه‌ق له‌باندان نه‌يرن ئه‌ی برايه‌يل له‌حكوومه‌ت و په‌رله‌مان ك لايگ له‌ برايه‌يلدان له‌كورده‌يل فه‌يلی بكه‌ينه‌وه‌و ئه‌و بنبڕ ئه‌و به‌دبه‌ختی و مه‌ينه‌تيه‌ بكه‌ين و گشت ئه‌و ماڵ وموڵكه‌يليانه‌ بارينه‌وه‌ تا مه‌ويس نه‌ون له‌بان خاك په‌يغه‌مبه‌ره‌يل و خاك ئيمامه‌يل له‌ی عراقه‌ .