په‌ره‌ وه‌پيداين ميديايى

عه‌بدولزه‌هره‌ تاڵه‌قانى

شه‌فه‌ق نيوز/ چوين ئه‌تويه‌نيم په‌ره‌ بيه‌يمنه‌ ره‌سانن و ئه‌و هووكاره‌يله‌ چه‌ن ك وه‌گووره‌يان تويه‌نريه‌ێد په‌ره‌ وه‌ى كه‌رت گرينگ بدريه‌ێدو گه‌شه‌ وه‌پى بيه‌يم تا خزمه‌ت وه‌ قوناغه‌گه‌ بڕه‌سنێد، وه‌ل زيايبوين هه‌وه‌جه‌ ئه‌را ره‌سانن پيشه‌يى كارا ك ته‌كنۆلۆجياى تازه‌ بارێده‌ كار و په‌يام خاس بڕه‌سنێد له‌وه‌ر بنياتناين كۆمه‌ڵگاو ده‌وڵه‌ت، ك ئايا ئى گوزارشه‌ چشتيگ فه‌رزكرياگه‌؟ يا راسييگ ئاشكراو ماناداره‌؟ ك له‌بان بنه‌ماگه‌ى به‌رنامه‌يل مه‌شقكارى و گه‌شه‌كارى دانريه‌ێد ئه‌را سه‌ركه‌فتن وه‌ توانايه‌يل ئه‌و كادره‌يله‌ و زيايبوين مه‌هاره‌تيان، يا مه‌سه‌له‌گه‌ جياوازه‌؟

 

په‌ره‌وه‌پيداين ميديايى ماناى ئه‌و چشته‌سه‌ ك په‌يوه‌سه‌ وه‌پى جوور تيكه‌ڵكردن ره‌سانن وه‌ گه‌شه‌داين، ئه‌ويش وه‌ جووريگ ك بدێده‌ هاوبه‌شيگ بنه‌ڕه‌تى، ك يه‌يش رۆڵ راسكانيه‌ ئه‌را ره‌سانن و ناوه‌ند عراق ئه‌را په‌ره‌وه‌پيداين ميديايى كار له‌بانى ئه‌كا ك ده‌يان نه‌دوه‌ى تايبه‌تمه‌ند ساز كرد و له‌تى ميواندارى وه‌رپرسه‌يل ئه‌كريه‌ێد ئه‌را باسكردن له‌بان باوه‌تيگ دياريكرياگ وه‌ل گفتگوو ك ئاكامه‌گه‌ى چاره‌سه‌ر سه‌ركه‌فتگ داشتوود ئه‌را كيشه‌يل فريه‌يگ ك ده‌زگايه‌يل ده‌وڵه‌ت وه‌پيانه‌و ناڵنن.

 

كيشه‌ى كاره‌با يه‌كيگه‌ له‌و كيشه‌يل گه‌ورا ك هاته‌سه‌ تويش عراق، يه‌يش هه‌رچه‌نى سه‌رده‌ميه‌و له‌ پاشمه‌نده‌ى رژيم ديكتاتۆريه‌، وه‌لێ وه‌ل ئه‌وه‌يشا ڕى خوه‌ى په‌ى نه‌كردگه‌ ئه‌را چاره‌سه‌ر ك هه‌رچه‌نى دارايى فريه‌يگيش ئه‌راى ته‌رخان كريا وه‌ل ده‌سه‌وه‌ركردن هووكاره‌يل سه‌ركه‌فتن.

 

ئمجا ئه‌و ناوه‌نده‌ ميواندارى ئه‌ندازيار قاسم ئه‌لفه‌هداوى وه‌زير كاره‌با كرد وه‌ل نازم ئه‌لساعدى سه‌رۆك ليژنه‌ى خزمه‌تگوزاريه‌يل له‌ ئه‌نجومه‌ن نوێنه‌ره‌يل ئه‌را باسكردن له‌بان هه‌ڵكه‌فت كاره‌باو پرسياره‌يليگ له‌باره‌ى پلانه‌يل ئيسه‌و ئاينده‌، وه‌و خاتريشه‌ وه‌زير باس له‌ خه‌مينى وزاره‌ته‌گه‌ى كرد و باس له‌ خه‌م هاووڵاتيه‌يل نه‌كرد ك ناڵنن وه‌ده‌س كه‌مى كاره‌باو باسه‌گه‌ى خوه‌ى له‌ شه‌فافيه‌ت نيشاندا وه‌ئاماده‌بوين بريگ له‌ گه‌ورا ره‌ساننكاره‌يل عراقى ك گووش له‌لى گرتن و پرسيار له‌لى كرديان و پرسيار له‌بان به‌رهه‌م و دابه‌شكردن و بڕيان كاره‌باو هووكاره‌يل راسكانى ئى قه‌يرانه‌و وه‌رده‌وامبوينى له‌لى كرديان وه‌ل چاره‌سه‌ره‌يليگ ك وزاره‌ته‌گه‌ كار له‌بانى بكا ئه‌را جيوه‌جيكردن پشبه‌سانن وه‌ خوه‌ى و پرسيار ئه‌وه‌يش له‌ليان كرديان چاره‌نويس پرووژه‌يل وه‌به‌رهاوردن له‌ كه‌رت كاره‌با و پولداين پيشه‌كى و ئاماده‌كردن وه‌رده‌وام له‌ بڕيگ شوون و ناوچه‌يل و كرايه‌ى كاره‌با و شماره‌يل فه‌له‌كى له‌ بڕيگ ليست ك وزاره‌ته‌گه‌  دوياخست له‌ وه‌كارهاوردن وزه‌ى پاك و دويره‌وخستن ويستگه‌يل ئه‌تۆمى له‌ى مه‌سه‌له‌يله ‌ره‌سيه‌ چه‌؟

 

ئى پرسياره‌يل و زياتريش خريا وه‌رده‌م وه‌زير تايبه‌تمه‌ند ك هه‌وڵ ئه‌وه‌ دا قه‌ناعه‌ت وه‌ ئاماده‌بويه‌يل بارێد ك تاوسان ئاينده‌ كاره‌با خاستره‌و ئه‌دێ، وه‌لێ كاره‌با له‌ وه‌خت ئاماده‌بوين وه‌زير كوشياوه‌ و شه‌رمه‌زار له‌لى نه‌وى و له‌ كه‌سه‌يل تريش.

 

گه‌شت كاره‌با له‌ تاوسان و زمسان يه‌كيگه‌ له‌و قه‌يرانه‌يله‌ ك ئه‌ياده‌ تويش عراق، وه‌زير ئاماژه‌ وه‌ ئه‌وه‌ كرد ك وزاره‌ته‌گه‌ى هه‌وڵ زيايكردن به‌رهه‌م ئه‌ياد وه‌ل كۆنترۆڵ وه‌كاربردنى و جه‌خت له‌وه‌ كرد ك ته‌نيا 40% له‌ به‌رهه‌م وه‌شيوه‌ى دروسيگ ره‌سێد و 60% وه‌تاڵان بريه‌ێد و يه‌يش هووكاره‌يل فريه‌يگ ديرێد، وه‌لێ ريژه‌ى گه‌ورا وه‌بوونه‌ى ئه‌وه‌سه‌ ك ته‌جاوز ئه‌كريه‌ێد له‌بان تووڕه‌يل كاره‌با.

 

يه‌يش بيجگه‌ هووكاره‌يل تر له‌وانه‌يش نه‌مه‌ند كاره‌با له‌وه‌خت جيوازكردن وزه‌، وه‌ل ئه‌وه‌يشا وه‌زير ئشاره‌تيش وه‌و سه‌ختيه‌يله‌ كرد ك ئه‌يه‌نه‌ تويش وزاره‌ته‌گه‌ له‌ بارودوخيگ ك دياريكردن دارايى له‌له‌تى گومه‌ وه‌ل ويرانكاريه‌يل داعش ئه‌را بان ويستگه‌يل به‌رهه‌م و دابه‌شكردن و خه‌ته‌يل جيوازكردن وزه‌و ئاشكراى يه‌يش كرد ك داعشيه‌يل(82)تاور جيوازكردن وزه‌ له‌ رومادى ويران كردنه‌ و له‌ خزمه‌ت ده‌رچينه‌و دو ويستگه‌يش ويران كردنه‌.

 

قسه‌يل وه‌زير نا باوه‌ڕيه‌و ئه‌ويش يه‌كه‌م كه‌س و دويا كه‌سيگ نيه‌، زويتريش ناوه‌نده‌گه‌ ميواندارى عه‌لى عه‌لاق پاريزگار بانك ناوه‌ندى عراقى كرد ك ئه‌ويش باس له‌ دو سياسه‌ت دارايى و نه‌ختى كرد، بيجگه‌ ئه‌وه‌يش ميواندارى سه‌ركرده‌ى فه‌رمانده‌يى به‌غدا كرد ئه‌را قسه‌كردن له‌بان پلانه‌يل ئاسايشى ئه‌را پايته‌خت. يه‌يش ماناى ئه‌وه‌سه‌ ك په‌ره‌وه‌پيداين ميديايى هه‌وڵ ئه‌را گفتگوو و تيكه‌ڵبوين و ته‌كامول ئه‌ياد له‌ناونى ده‌زگايه‌يل ده‌وڵه‌ت و كۆمه‌ڵگاى مه‌رده‌نى ئه‌را بنياتناين عراق تازه‌.

عه‌بدولزه‌هره‌ تاڵه‌قانى