بوجگوم و په‌لامارداین ده‌وڵه‌مه‌نه‌یل كورد له‌ واست

شفق نيوز

 

ئه‌وه‌ بوى بوه‌یهیه‌یل زاڵ بوینه‌ بان خه‌لافه‌ت عه‌باسى و ده‌سڵات له‌لیان سه‌ندن و ته‌نیا هه‌ق ئه‌وه‌ وه‌پیان دریا ك ناویان خه‌لیفه‌ بوود و له‌بان به‌رماڵ خه‌لافه‌ت دانیشن و رووژه‌یل جومعه‌ له‌وه‌خت خوتبه‌داین ناویان وه‌گه‌ورا باریه‌ید، ئمجا له‌و وه‌ختیشه‌ ك موعزئه‌لده‌وله‌ى بوه‌یهى وه‌ك سوڵتانیگ له‌به‌غدا جیگیر بوى كرده‌ى پایته‌خت و له‌و سه‌رده‌میشه‌ هه‌ریم واست به‌شیگ بوى له‌ كوردستان و ئێڵ و ئه‌شره‌ته‌یل كورد له‌ى شوونه‌یله‌ یه‌كجار فره‌ بوین و ئى هه‌رێم كووته‌ له‌وه‌خت خوه‌ى شوون ده‌وڵه‌مه‌نه‌یل كورد بویه‌و دز و جه‌رده‌یش هه‌میشه‌ هه‌وڵ تاڵانكردنیان دانه‌.

له‌ سه‌رده‌م خه‌لافه‌ت ئه‌لرازى عه‌باسى، "بوجگوم" ك له‌سه‌ره‌تا غوڵام "ئه‌بوو عه‌لى عارز ده‌یله‌م" وه‌زیر "ماكان" بوى، ماكان داوا له‌ ئه‌بو عه‌لى كردوی بكاده‌ى نه‌وكه‌ر تایبه‌ت خوه‌ى، وه‌لى له‌لاى ماكان نه‌مه‌ندوید و چیه‌لاى"مه‌رداوێژ"و شوون خوه‌ى خوه‌شكرد.

ئمجا وه‌نیاز پیشكه‌فتن ده‌س كرده‌ خیانه‌تكارى و له‌ڕى بڕیگ له‌سه‌ركرده‌ و فه‌رمانده‌یل "مه‌رداوێژ" كوشت و روى كرده‌ به‌غدا، ئمجا سه‌ركرده‌یل ده‌ورگردى رى وه‌پى نه‌یان و ناچار بوى و روى كرده‌ واست و له‌ورا بویه‌ سه‌رگه‌وراى به‌شیگ له‌هیزه‌گه‌ى "محه‌مه‌د كوڕ رائیق"و ناو خوه‌ى نا "بوجگوم رائیقى"و كه‌فته‌ جه‌نگه‌و وه‌ل "عه‌بدوڵڵا بریدى"و له‌شكره‌گه‌ى په‌زان، ئمجا دویاى ئه‌وه‌گ خیانه‌ت له‌ رائیق كرد و له‌شكریگ ریكخست و تواس خوه‌ى بكاده‌ سه‌رله‌شكر له‌ یه‌كیگ له‌هیزه‌یل خه‌لیفه‌ ، ئه‌وه‌ بوى ساڵ 326 ك – 937 ز رازى خه‌لیفه‌ى عه‌باسى مرد و " ئه‌لمته‌قى بیلا " له‌شوونى دانریا ، دى ئه‌وه‌ بوى بوجگوم هاورد و كرده‌ى سه‌رله‌شكر خوه‌ى و ساڵ 329 ك – 940 ز " توزون " كلكرد ئه‌را سه‌ركوتكردن " به‌ریدى " ك گوایا خه‌لیفه‌ هه‌ڵگه‌ردیاسه‌و، وه‌لى توزون له‌یه‌كم جه‌نگ شكیاو داواى ده‌سمیه‌ت له‌ بوجگوم كرد.

وه‌لى وه‌رج له‌وه‌ك بوجگوم بكه‌فیده‌ ڕى ئه‌را ده‌سمیه‌تداینى وه‌ره‌و واست، توزون ده‌سكرده‌ جه‌نگ دویم و سه‌ركه‌فت و هه‌واڵ سه‌ركه‌فتن خوه‌ى ره‌سانه‌ بوجگوم، ئمجا لایه‌نگره‌یل بوجگوم ك گشتیان جوور ئه‌و دز و جه‌رده‌ بوین داوا له‌لى كردن ئسراحه‌ت بكا و له‌ده‌ورگرد واست خوه‌ى خه‌ریك بكا وه‌ راو و شكار .

بوجگوم له‌وه‌ختیگ ره‌سیه‌ ده‌ورگرد ئاو گۆر ته‌ماشا كرد ده‌وڵه‌مه‌نه‌یل كورد له‌و ناوه‌ فریه‌ن، یه‌یش ته‌ماح گرته‌ى و په‌لامار كورده‌یل دا و تواس تاڵانیان بكا، هه‌ر وه‌و خاتریشه‌ وه‌ له‌شكریگه‌و روى له‌لیان كرد و كورده‌یلیش له‌تاو تاڵان خوه‌یان قوتار كردن و ئه‌ویش كه‌فته‌ شوونیان و یه‌كیگ له‌لیان كوشیا، وه‌لى جایه‌ڵیگ كورد موڵه‌ت وه‌پى نه‌یاو له‌لى هاته‌ ده‌س و له‌پشته‌و خه‌نجه‌ر له‌لى كیشاو دا له‌ته‌وق سه‌رى و كوشته‌ى ، ئى كاره‌ساته‌ رووژ 26 مانگ ره‌جه‌ب ساڵ "329 ك" رویدا .  

ئه‌حمه‌د خه‌لیل

ج . أ