دیواره‌گه‌ى ناونى باشوور و خوه‌رئاواى كوردستان رمیا

شفق نيوز

  جارجاریگ ناچاریم بویم ئه‌گه‌ر ئه‌ماشاى رویداگه‌یل ئى دویاخر باشوور كوردستانه‌ ك ئیسه‌ له‌لایه‌ن ده‌سڵات كوردیه‌و بریه‌یده‌ رییه‌وه‌و ئه‌و كووچ وه‌جه‌مه‌ ك له‌ى دو ساڵ دویاخر و رووژه‌یلیگ وه‌رجه‌ ئیسه‌ى كورده‌یل خوه‌رئاواى كوردستان جوور رمیان دیواره‌گه‌ى به‌رلین نه‌كه‌یمن راسه‌ ئه‌ڵمانیا دو ده‌وڵه‌ت بوین و یه‌كه‌و گرتن، وه‌لى كوردستان دو به‌ش له‌تكریاگى بى ده‌سڵات و بى قه‌واره‌س، وه‌لى كوردیش جوور ئه‌ڵمانیه‌یل یه‌ك نه‌ته‌وه‌ن.

به‌شیگ له‌ كوردستان خوه‌رئاوا ئازاد كریاگه‌و كورد خوه‌ى له‌تى حوكم ئه‌كا، ئه‌و به‌شه‌گه‌ى تریشى داگیر كریاگه‌و به‌عس سورى هیمان له‌تى حوكمداره‌، ئنجا وه‌ل ئه‌و جه‌نگ و مراه‌و هه‌ڕه‌شه‌ى ده‌ره‌كى و ناوخوه‌ییشه‌، ده‌رفه‌تیگ تاریخى و تازه‌ له‌ كوردستان خوه‌رئاوا سه‌رهه‌ڵداگه‌، ك یه‌یش شایه‌ت هه‌م ئاسوو تازه‌یگ ئه‌را ده‌سڵات كوردى له‌ هه‌رێم كوردستان باریده‌ دى و هه‌میش سه‌رژان و كیشه‌.

له‌ ماوه‌ى ژه‌ن رووژه‌یلیگ وه‌رجه‌ ئیسه‌ فیشتر له‌ 30هه‌زار كورد بیتاوان له‌ترس مه‌رگ و ورسگى و جه‌نگ و فشار چه‌كداره‌یل خوه‌رئاواى كوردستان هیشتنه‌جى و هاتن وه‌ره‌و باشوور كوردستان، ك منستیاده‌ رمیان دیواره‌گه‌ى به‌رلین، چوینكه‌ ئى جه‌مڕه‌وى و كووچكردن هاووڵاتیه‌یله‌ ئه‌را ناوچه‌یگ ئارام و سه‌قامگیر یه‌كیگه‌ له‌ زه‌نگه‌یل مه‌ترسیدار ك تیه‌یده‌ تویش كوومه‌ڵگاى ناوده‌وڵه‌تى. هه‌ر له‌وه‌ر ئه‌وه‌یش بایه‌سه‌ كوومه‌ڵگاى ناوده‌وڵه‌تى ئاگادار ئه‌وه‌ بوود كورد نه‌كریه‌یده‌ خوه‌راك و ئاگردوى ئى جه‌نگ دریژماوه‌ له‌ سوریاو هه‌ق ئه‌وه‌سه‌ ك ئاگادار بوود له‌ناوچه‌گه‌ چه‌ رویده‌یدو جه‌نگ و ناكووكیه‌یل دویاى ئاڵشتكاریه‌یل چه‌ بوود و چاره‌سه‌رى واقعى و دیموكراسى چه‌ن؟ چوینكه‌ ئه‌یه‌ كاره‌ساتیگ دڵته‌زنه‌و دژ هه‌قه‌یل ئاده‌میزاده‌و ژیان هه‌زاران كورد بیتاوان كه‌فیده‌ مه‌ترسیه‌و.

ئى مه‌سه‌له‌ له‌ ناوه‌نده‌یل ناوده‌وڵه‌تى خوازیار ئه‌وه‌سه‌ چاره‌سه‌ر سیاسى ئه‌راى بوینیده‌و، وه‌ل ئه‌وه‌یشا له‌ناوخود كوردستانیش بایه‌سه‌ كار ئه‌راى بكریه‌ید و لایه‌نه‌یل سیاسى كوردستانیش بایه‌سه‌ هاوڕا و هاوده‌نگ و هاوهه‌ڵویست بوون له‌ روى وه‌ڕوى بوینه‌وه‌ى كیشه‌و داناین به‌رنامه‌ى دویاڕووژ ئى به‌ش كوردستانه‌و ڕى نه‌دریه‌یده‌ كووچكردن و كاریگ بكریه‌ید هاووڵاتیه‌یل كورد له‌ شوونه‌یل خوه‌یان بمینن و ڕى نه‌دریه‌ید ژیان و چاره‌نویس ئى هه‌زاران كورد په‌نابه‌ره‌ جوور كارتیگ سیاسى ئه‌را ركابه‌رى ناوخوه‌یى باریه‌یده‌ كار.

هه‌ر له‌وه‌ر ئه‌وه‌یش تویه‌نیم بویشیم دیوار ناونى باشوور و خوه‌رئاواى كوردستان رمیاو هه‌ر وه‌و خاتریشه‌ بوود یه‌یش بكریه‌یده‌ سه‌ره‌تاى یه‌كێتى نه‌ته‌وه‌یى وه‌ل ئه‌و هه‌مگه‌ ئازار و ناڕه‌حه‌تیه‌ ك هاته‌سه‌ تویشمان و بووده‌ سه‌ره‌تایگ گامناین وه‌ره‌و قوناغیگ تاریخى تازه‌ له‌ كوردستان.

غازى حه‌سه‌ن

ج . أ