رويوه‌ر ناوچه‌يل داوڕياگ پاريزگاى كووت

شفق نيوز

له‌ ئاكام له‌يه‌كه‌ودانيش ده‌ركه‌فتگه‌ ك رويوه‌ر هه‌رێم كوردستان نزيكه‌ى 77268 كم2، ئمجا له‌ى رويوه‌ره‌ ك هه‌رێم كوردستان ديرێده‌ى ريژه‌ى 43178 كم2، يه‌يش ماناى ئه‌وه‌سه‌ ك نزيكه‌ى 55،88% له‌لى داوڕياگه‌.

له‌ يه‌يشه‌و ئه‌ڕامان ده‌رئه‌كه‌فێد ك فيشتر له‌ نيمه‌ى ئه‌و هه‌رێمه‌ ك ديرێمنه‌ له‌ليمان داوڕياگه‌، ك يه‌يش رويوه‌ر يه‌كجار فريه‌يگه‌، له‌يرايش پرسياريگ هه‌س، ك ئه‌ويش ئه‌وه‌سه‌ ئايا وه‌ هاوردنه‌وه‌ى ئه‌و رويوه‌ره‌ ئه‌را بان هه‌رێم كوردستان، هه‌رێم چه‌ وه‌ده‌س ئه‌يه‌رێد؟ يا چه‌ له‌ده‌سى ئه‌چێد؟

ئه‌گه‌ر ئيمه‌ له‌ ديد زانستى سياسى و جيوپۆليتيكيه‌و ته‌ماشاى ئى پرسياره‌ بكه‌يم، ئه‌وه‌ ئه‌ڕامان ده‌رئه‌كه‌فێد ك گشت يه‌كه‌يگ سياسى، يا ده‌وڵه‌ت، له‌وه‌ر ئه‌وه‌گ هيز سياسى و ئابوورى بته‌ويگ داشتوود، ئه‌وه‌ هه‌وه‌جه‌ى فريه‌يگ وه‌ رويوه‌ر گه‌ورايگ يا نمچه‌ گه‌ورايگ ديرێد، ئمجا جوور ئه‌وه‌گ ئاشكراس وه‌ هاوردنه‌وه‌ى ئه‌و رويوه‌ره‌ ئه‌را بان هه‌رێم كوردستان ماناى ئه‌وه‌سه‌ هه‌رێمه‌گه‌ رويوه‌رگه‌ره‌گه‌ى ئه‌دێده‌ نيمچه‌ گه‌ورايگن ك يه‌يش ئه‌دێده‌ به‌رهه‌مهاوه‌ر هيزيگ گه‌وراى سياسى ئه‌را هه‌رێم كوردستان.

رويوه‌ر ته‌نيا زه‌وى نيه‌ ك خالى بوود، به‌ڵكوو ئى زه‌وى فراوانه‌ چه‌نه‌ها چشت گرينگ ها له‌تى و ئه‌دێده‌ هووكاريگ ئه‌را بته‌وبوين ده‌وڵه‌ت، ماناى ئه‌وه‌سه‌ ئه‌دێده‌ هيز سياسى ئه‌را هه‌رێم كوردستان له‌بان ئاست ده‌يشت و ناوخوه‌يى، ئه‌را نموونه‌ ئى زه‌وى فراوانه‌ گرينگى ديرێد ئه‌را بوار سه‌ربازى و ئه‌دێده‌ ناوچه‌يگ ئه‌را جموجويل سه‌ربازى، چوينكه‌ بۆشايى يه‌كجار فراوانيگه‌ ك سرشته‌گه‌ى ده‌سميه‌تده‌ره‌ ئه‌را ئى گرينگييه‌، يه‌يش ماناى ئه‌وه‌سه‌ وه‌ هاوردنه‌وه‌ى ئى رويوه‌ر فراوانه‌ ئه‌را بان هه‌رێم كوردستان هيز سه‌ربازى بته‌و ئه‌دێن يا ئه‌تويه‌نيم بويشيم ئه‌و تواناى خودييه‌ ئه‌ڕاى دروس ئه‌دێ ك هيزيگ گه‌وراى سه‌ربازى دروس بكا.

ئمجا ئه‌و ناوچه‌يله‌ له‌وه‌ر ئه‌و رويوه‌ره‌يل فريه‌ ك ديرنه‌ى بوونه‌ وه‌ربه‌سيگ له‌وه‌رده‌م داگيركارى وڵاته‌يل هاوسا له‌وه‌ختيگ مه‌يل ئه‌و كاره‌ داشتوون يا بخوازن په‌لامار هه‌رێم كوردستان بيه‌ن، وه‌و مانا ك بوونه‌ ريگر له‌وه‌رده‌ميان و بوونه‌ مقه‌يه‌تيكه‌ر هه‌رێم كوردستان.

يه‌كيگ تر له‌ چشته‌يل تر جيوپۆليتيكى ئى ناوچه‌يله‌، مه‌ردمه‌گه‌يانه‌، يه‌يش وه‌و مانا ئه‌و مه‌ردمه‌ ك له‌ى ناوچه‌يله‌ وجوود ديرن، يه‌يش ريژه‌يگ تر مه‌ردمه‌ له‌ى ناوچه‌يله‌.

فه‌همى مهدى