ڕه‌سمه‌گه‌ كه‌ى ته‌مام بوود؟

شفق نيوز

نیسانیش، هه‌رچه‌نى ك مانگ وه‌هار و دووسى و ئاشتیه‌ له‌لاى زوورمى ملله‌ته‌یل جه‌هان، وه‌لى مانگیگ پڕژانه‌ ئه‌را كورد وه‌گشتى و كورده‌یل فه‌یلى وه‌شیوه‌یگ تایبه‌ت، چوینكه‌ له‌ى مانگه‌ هویر جینۆسایدكردن وه‌بان هه‌رچى هویره‌ زاڵ بوى و یه‌كیگ له‌ به‌رهه‌مه‌یلیشى قه‌ساوخانه‌گه‌ى ئه‌نفال بوى ك سه‌دان هه‌زار شه‌هید له‌لى كه‌فته‌و. ئیمه‌یش هیمان ئه‌وه‌ پرسیمن ك زاڵمه‌یل ئى هه‌مگه‌ زوڵم و تاوانكاریه‌ له‌كوو په‌یاكردنه‌؟و ئه‌راى چه‌ كاریگ كردنه‌، ك ته‌نیا ئه‌و كه‌سه‌یله‌ كه‌نه‌ى ك مینه‌ى له‌عنه‌ت وه‌رده‌وام كه‌ن ئه‌را خوه‌یان؟

ده‌سه‌واژه‌ى جینۆساید ك په‌یوه‌سه‌ وه‌ وجوود سه‌دان قه‌ورسان ده‌سه‌جه‌مى له‌ چوارقوڕنه‌ى عیراق، بویه‌سه‌ ده‌سه‌واژه‌یگ ئاسایى له‌لاى مه‌ردم وه‌گشتى، و كه‌س وكاره‌یل قوربانیه‌یل ڕووژانه‌ وه‌ل ورده‌كاریه‌یلیه‌و ژیه‌ن، له‌ چه‌وه‌ڕیكردنیگ هه‌تاهه‌تایى ك به‌نیگ باریك بڕه‌سنیده‌یانه‌ ئه‌وه‌گ وه‌سه‌ر ڕووڵه‌یلیان هات. و ملله‌ت عیراقیش وه‌گشتى له‌لایه‌ن زانیاریه‌و له‌ سایه‌ى ئه‌وه‌ ژیه‌ن ك كه‌ناڵه‌یل ڕه‌سانن و میدیاى ڕه‌سمى و بى لایه‌ن پیشكه‌شى وه‌پیان كه‌ن و یه‌یشه‌ هه‌وه‌جه‌ وه‌ قسه‌كردن نه‌یرى.

ئیمه‌ى كورد ته‌حه‌داى ئه‌نفالسازه‌یل كردیم و وه‌چه‌و خوه‌مان دیمنه‌یان چوین وه‌سزاى دادپه‌روه‌رانه‌ى خوه‌یان ڕه‌سین، له‌وه‌ختیگ ك مه‌ینه‌تیه‌یل فره‌یگمان مه‌ننه‌ و گرنگترینیان ئه‌و ناكووكیه‌سه‌ له‌ باوه‌ت تاریخ سه‌ره‌تاى ئه‌و جینۆسایده‌ وه‌ شیوه‌یگ واقعى ك وه‌رجله‌ به‌یاننامه‌یل سه‌ربازى پڕتاوان به‌رپا بویه‌.

ئیمه‌ى فه‌یلى به‌ڵگه‌یل حاشاهه‌ڵنه‌گریگ  فره‌ دیریم، ك ئه‌نفال له‌ ناوچه‌یل ئیمه‌ و دژ وه‌ چینه‌گه‌مان به‌رپا بویه‌، وئمجا په‌ره‌ سه‌نیه‌، و له‌وه‌یشه‌ دڵنیایم ك تاقیه‌وكردن چه‌ك كیمیاوى وه‌ جایڵ جوانه‌یل بى سه‌روشوونكریایمان ده‌س وه‌پى كردیه‌، وه‌رج له‌وه‌گ بدریه‌ید له‌ شار و ئاواییه‌یلمان، و ئاساییشه‌ له‌ ئاكاما، هه‌ر وه‌ختیگ ساڵیاد ئى كاره‌ساته‌ كه‌یمن، تویش كێشه‌ى ڕیزبه‌ندى زه‌مان قوناغه‌یل ئى تاوانه‌یله‌ تیه‌یمن، چوینكه‌ ئه‌گه‌ر وه‌و تاریخه‌یله‌ پشت بووه‌سیم ك زاڵمه‌یل چه‌سپاننه‌سه‌ى، زوڵمیگتره‌ سه‌ربار گشت زوڵمه‌یلیان، و له‌ شوون ئى هه‌مكه‌ ساڵه‌ مه‌عقوول نیه‌ ك ئیمه‌ نه‌ڕه‌سیمنه‌سه‌ دۆكیمه‌نتكردن و ئارشیفكردن تاریخى داداپه‌روه‌رانه‌ و شه‌فافیگ ئه‌را ده‌سنیشانكردن مه‌وقه‌ى ڕه‌سمییگ ك گشت كه‌سوكاره‌یل قوربانیه‌یل وه‌پى ڕازى بوون و ئاماژه‌ بیه‌یده‌ سه‌ره‌تاى ڕاسه‌قینه‌ى ئه‌و تاوانه‌یل گه‌ورا.

ئازادى هه‌س و شایه‌ت و به‌ڵگه‌ى فره‌تریش هه‌س و بڕیار دادگایش باس له‌ جینۆساید كه‌ید، ته‌نیا چشتیگ مه‌نوید ئه‌وه‌سه‌ ك بڕیاریگ سیاسى ئازایانه‌ دگان وه‌و ڕاسیه‌ بنه‌ید ك جینۆساید كورده‌یل؛ وه‌ كورد فه‌یلى ده‌س وه‌پى كردیه‌، و بایه‌تیشه‌ له‌وه‌ بیه‌یمنه‌ لا ك وه‌رده‌وام بویمن له‌ ده‌رخستن كێشه‌گه‌ وه‌شیوه‌یگ ك به‌شیگى زینیه‌و بكه‌ید و ئه‌و به‌شه‌ گه‌وراگه‌ى ترى بكوشید، ك نیه‌گونجیه‌ید وه‌ل ئه‌وه‌گ هه‌وڵ ئه‌راى دریه‌ید وه‌خاتر دابینكردن كه‌شوهه‌وایگ له‌یه‌ك نزیكه‌وكردن ئه‌و پیكهاته‌یله‌ ك ئى زوڵم گه‌ورا وه‌پیان ڕه‌سیه‌.