ئۆباما ڕى نه‌يا بايدن ماڵه‌گه‌ى بفرووشێد! وه‌رپرسه‌يل ئيمه‌يش نيشتمانه‌گه‌يان فرووشن!

شفق نيوز

بو تويش نه‌خوه‌شى شيرپه‌نجه‌ هات و ئه‌را ماوه‌ى فريه‌يگ هامشوو نه‌خوه‌شخانه‌يل ئه‌مريكى وه‌پى كرياو په‌نا برده‌ وه‌ر ئه‌و زه‌مانه‌ت ته‌ندروسيه‌ ك ده‌وڵه‌ت ئه‌راى جوور هاووڵاتييگ ئه‌مريكى دابينى كرد، ئمجا هه‌رچه‌نى نه‌خوه‌شى شيرپه‌نجه‌ سه‌خته‌و بوى و زيايكرد له‌ لاشه‌ى بو كوڕه‌ گه‌وره‌ى بايدن و هه‌وه‌جه‌ وه‌ بنبڕكردن داشت و دوياخريش بو مووچه‌گه‌ى له‌ده‌س ئه‌ياد ئه‌گه‌ر مرد يا ئه‌گه‌ر ده‌س له‌كار كيشاوه‌، ك يه‌يش وه‌ ئه‌زره‌ت بايدن نيه‌، چوينكه‌ مووچه‌ى كوڕه‌گه‌ى گريگنگه‌و ناتويه‌نن واز له‌لى بارن، چوينكه‌ سه‌رچه‌وه‌يگ تر دارايى ئه‌را خيزانه‌گه‌يان نه‌يرن بيجگه‌ ئه‌و مووچه‌يليانه‌ ك وه‌گووره‌ى كاره‌يليان ئه‌كه‌فێده‌ ده‌سيان.

دوياخريش بايدن بڕياردا ماڵه‌گه‌ى بفرووشێد وه‌خاتر چاره‌سه‌ركردن كوڕه‌گه‌ى و وه‌رده‌وامبوينى له‌ كار و مه‌ندنى له‌بان مووچه‌گه‌ى، رووژيگ دوياتر له‌ دانيشتنيگ ئۆباما سه‌رۆك ئه‌مريكا هه‌واڵپرسى بو كرد له‌بايدن باوگى وه‌ بوونه‌ى نه‌خوه‌شيه‌گه‌ى، بايدنيش وته‌پى بڕيار دامه‌ ماڵه‌گه‌م بفرووشم وه‌خاتر چاره‌سه‌ر كوڕه‌گه‌م به‌شكه‌م قورتارى بوود له‌و شيرپه‌نجه‌ى پيسه‌ ك سه‌ر كرده‌سه‌ لاشه‌ى.

ئۆباما هه‌ناى ك ئى خه‌وه‌ره‌ ژنه‌فت ده‌س له‌ نانخواردنه‌گه‌ى هه‌ڵگرت و فريه‌ ناڕه‌حه‌ت بوى و تكاو ڕجا له‌ بايدن كرد ئه‌و ماڵه‌ نه‌فرووشێد چوينكه‌ ماڵيگ پڕ يادگاريه‌ و وه‌ته‌پى (من پويل وه‌پێد ئه‌يه‌م به‌س ئه‌و ماڵه‌ مه‌فرووش و قه‌وڵ بيه‌پيم نه‌فرووشێده‌ى).

بيگومان هه‌ركه‌سيگ له‌يوا باوه‌تيگ بخوه‌نێده‌و وه‌تايبه‌ت له‌ناونى سه‌رۆكه‌يل گه‌وراترين و بته‌وترن و ده‌وڵه‌مه‌نترين ده‌وڵه‌ته‌يل له‌ جه‌هان تويش شۆك ئه‌دێ و هوير له‌وه‌ ناكا ك ئه‌و كه‌سايه‌تيه‌يل گه‌ورا له‌ وڵاته‌يل خوه‌يان ته‌نيا كارمه‌ندن و تواناى چاره‌سه‌ر و شفاى خوه‌يان و رووڵه‌يليان نه‌يرن و هويچ چشتيگ شك ناوه‌ن بيجگه‌ مووچه‌يليان و شايه‌ت ماڵ و موڵكيان له‌وه‌ر چاره‌سه‌ر بفرووشن و له‌ هه‌مان وه‌خت مكوڕنيش له‌بان ده‌سميه‌تداين يه‌كترى جوور سياسى له‌وه‌ر خاتر ده‌وڵه‌ته‌گه‌يان و هويچكاميان شاكامى وه‌ ئه‌واكه‌يان ناوه‌ێد و ئه‌زره‌ت مردنى يا زيندانيبوينى يا كوشتنى ناكا جوور ئه‌وه‌گ له‌ عراق ئه‌كه‌فێده‌ وه‌رچه‌و، يه‌يش ئاشكراسه‌و وه‌رپرسه‌يل عراقيش وه‌ شيوه‌ى خاسيگ وه‌رپرسه‌يل ئه‌مريكى ناسن و ئى روێداگيشه‌ په‌لكيشمان ئه‌كا ئه‌را به‌راورديگ له‌ناونى ئه‌و ئه‌مريكيه‌يله‌و ناونى وه‌رپرسه‌يل عراقى وه‌گشتى و بى جياوازى، چوينكه‌ وه‌ دريژايى دوانزه‌ ساڵه‌ كه‌سيگ نه‌يمه‌ وه‌و جووره‌ له‌ناونى وه‌رپرسه‌يل عراقى، ئمجا ئايا چه‌ روى ئه‌ياد ئه‌گه‌ر ئى حاڵه‌ته‌ بهاتياده‌ تويش وه‌رپرسيگ عراقى يا جيگريگ يا وه‌زيريگ يا داواكارييگ گشتى يا وه‌ڕيه‌وبه‌ريگ گشتى يا سه‌رۆك وه‌زيره‌يل، ك ئايا ماڵه‌گه‌ى خوه‌ى ئه‌فرووشێد له‌وه‌ر نه‌ياشتن پويل چاره‌سه‌ر ئه‌را يه‌كيگ له‌ مناڵه‌يلى و ئايا نموونه‌يگ وه‌ ئاست بايدن ديريم له‌و پۆسته‌و هويچ چشتيگ له‌خوه‌ى شك نه‌وه‌ێد بيجگه‌ ماڵه‌گه‌ى و شايه‌ت ئه‌و بفرووشتياد له‌لاى يه‌كيگ له‌ خوه‌يشكه‌يلى بنيشتياد؟

جى داخه‌ ئه‌وه‌گ روى ئه‌ياد له‌ وڵاتيگ موسڵمان و خاوه‌ن خێر فريه‌يگ جوور عراق له‌ وڵاتيگ تر روى نايه‌ێد، ك ئه‌ويش ئه‌وه‌سه‌ سياسيه‌يلى خوه‌ڵ زه‌ويه‌گه‌يشى فرووشتن و هه‌ر وه‌ رووژ نيمه‌ڕوو دزينه‌ى و مامڵه‌ وه‌ل دوشمنه‌يلى كردن و ده‌س گرتنه‌ بام گشت خێر و به‌يره‌گه‌ى و ئه‌وه‌گ له‌ليان تويش ئه‌نفلوه‌نزايگ باێد ئه‌چێد ئه‌را ئۆرپا وه‌خاتر چاره‌سه‌ر و له‌بان ماڵ و دارايى ملله‌ت و وه‌ ئمزاى سه‌رۆك په‌رله‌مان و ئه‌وكيش تويش مايه‌سيرى باێد ده‌يان هه‌زار دۆلار ئه‌ڕاى خه‌رج كريه‌ێد له‌ ده‌يشت وڵات و پويليگيش ئه‌را ئه‌ندامه‌يل په‌رله‌مان خه‌رج كريه‌ێد بى ڕاده‌.

بيگومان نه‌بايه‌د به‌راورد له‌ناونى وه‌رپرسه‌يل ئسلام عراقى و وه‌سيحيه‌ت ئۆباما و بايدن جيگرى بكريه‌ێد ك گيرست له‌وه‌رده‌م سه‌رۆك وڵاته‌يل يه‌كگرتگ ئه‌مريكى له‌وه‌ر ئه‌وه‌گ پويل چاره‌سه‌ر رووڵه‌گه‌ى نه‌ياشت ك تويش ئه‌و نه‌خوه‌شى شيرپه‌نجه‌ هاتوێد و ئه‌وه‌ بوى له‌ ته‌مه‌ن 46 ساڵان وه‌و نه‌خوه‌شى شيرپه‌نجه‌وه‌ مرد.

هه‌ر وه‌و خاتريشه‌ حه‌سره‌ت و ژانيگه‌ ئه‌را گشت هاووڵاتييگ شه‌ره‌فدار ك له‌ى عراقه‌ ژيه‌ن و له‌ وڵاتيگ ك چه‌ته‌يل و مافيايه‌يل گشت خێر و بێره‌گه‌ى وه‌تاڵان بردنه‌.

حه‌مزه‌ ئه‌لجه‌ناحى