كورده‌یل فه‌یلى له‌مه‌یدان وه‌رزش

شفق نيوز

بوى، له‌ دیداریگى وه‌ل شه‌فه‌ق،  جه‌میل فه‌یلى باس له‌وه‌ كرد ك كورده‌یل فه‌یلى له‌گشت جووره‌ وازیه‌یل وه‌رزشى وجوود دیرن، وه‌لى ئه‌وه‌ك هه‌وه‌جه‌ وه‌پى دیرن ئه‌وه‌سه‌ نه‌خش یا ده‌ور وه‌پیان بدریه‌یگ له‌ڕوى وه‌ڕیه‌وبردن و سه‌ركرده‌ییه‌وه‌، ك یه‌یش داواكارى وه‌رزشكاره‌یل كورد فه‌یلیه‌ له‌ وه‌رپرسه‌یل وه‌رزش له‌ وڵات. ئنجا ئه‌را زیاتر ئاشنابوین وه‌ى وازیزانه‌ راسه‌وخۆ جواو ئى پرسیاره‌یله‌ ده‌یگه‌وه‌:

* جه‌میل ئبراهیم فه‌یلى كییه‌؟

- وازیزان كاراتى وه‌رین له‌ئاست ناوده‌وڵه‌تى جه‌میل ئبراهیم سه‌مین مووسا فه‌یلى، خاوه‌ن چوار مناڵ، عومرم 50 ساڵه‌، ئاماده‌یى پیشه‌سازى(صناعه‌) ته‌واو كردمه‌، سه‌رتاى كاروانم وه‌ل یانه‌(نادى) میساق وه‌رزشى له‌شار سه‌وره‌(سه‌در ئیسه‌) ده‌س وه‌پیكردم له‌ساڵ 1976، یه‌كیگ بویم له‌ ئه‌ندامه‌یل هه‌ڵوژارده‌ى عراقى له‌ساڵه‌یل 1987 / 1988، ساڵه‌یل 1998 / 1999 پۆست سه‌رۆك ناوجیوانه‌یل(الحكام)گرتمه‌ ده‌س، وه‌ سه‌رپه‌رشى (كیم هى سام) شاره‌زاو خه‌ڵك كۆریاى باشوور ك له‌لایه‌ن یه‌كێتى تایكۆاندۆ جه‌هانیه‌وه‌ ده‌سنیشان كریا پله‌ى یه‌كم له‌ ده‌سنیشانكردن هه‌ڵوژارده‌ى نیشتمانى 1987/1988 هاورده‌مه‌ ده‌س، ئه‌یه‌ بیجگه‌ پله‌ى یه‌ك له‌ پاڵه‌وانیه‌تى عراق ساڵ 1933 و بیجگه‌ پله‌ى یه‌كم له‌ پاڵه‌وانیه‌تى جه‌نگ  درووكانى(القتال الوهمى) له‌ هه‌مان ساڵ و پله‌ى دویه‌م له‌ پاڵه‌وانیه‌تى به‌غدا ساڵ 1985و پله‌ى سێیم له‌ساڵ 1987.

* ئه‌و ره‌فیقه‌یل وازیزانه‌ ك كى بوین وه‌لدا؟

- ئبراهیم قاسم، عه‌بدولزه‌هره‌ توعمه‌، حه‌یده‌ر یوسف، عماد جابر، محسن زه‌بون، جواد نه‌جم و .....وازیزانه‌یل تر.

* ئه‌و مه‌شقده‌ره‌ خاوه‌ن خاسیه‌ له‌باند كییه‌؟

- شاره‌زاو مامۆستا سه‌ڵاح حه‌یده‌ر مه‌حموود فه‌یلى.

* ئه‌و چشته‌یل خراو هه‌ڵكه‌فت وه‌رزشیه‌ له‌ى وه‌خته‌یله‌ وه‌ ڕاى جه‌نابد چه‌ن؟

- وه‌ باوه‌ڕ من له‌ى وه‌خته‌یله‌ كه‌م وكوڕى له‌ڕوى رووشنهویرى وه‌رزشیه‌وه‌ كریه‌یگه‌دى.

* ئایا ئه‌و گامه‌یله‌ چه‌ن ك بایه‌سه‌ بنریه‌ن له‌وه‌ر خاتر په‌ره‌داین وه‌ وازى تایكواندۆ؟

- ئیسه‌ ئیمه‌ هه‌وه‌جه‌ وه‌ شوون تایبه‌تیگ دیریم ئه‌را یانه‌ تا گرینگى یا ئه‌همیه‌ت بدریه‌یگه‌ وازى تایكواندۆ، وه‌ل ئه‌وه‌یشا هه‌وه‌جه‌ى فره‌یگ وه‌ هۆڵ یا قاعه‌ى وه‌رزشى تایبه‌ت دیریم ئه‌را ئى وازیه‌، ك بایه‌سه‌ له‌هه‌مان وه‌خت چه‌ودیرى ئه‌وه‌ بكریه‌یگ  ك تا چه‌نیگ وه‌رپرسه‌یل وه‌رزشى جى وه‌جى قه‌وڵه‌یلیان كه‌ن.

* ئیسه‌ جه‌میل ئبراهیم فه‌یلى ها له‌كوورا؟

- هویچ كاریگ وه‌رزشى له‌ى وه‌خته‌یله‌ نیه‌ ده‌سمه‌وه‌، ئه‌ویش له‌وه‌ر نه‌وین یانه‌یگ وه‌رزشى ك جواو داواكارى و ئاره‌زوو وه‌رزشكاره‌یل جایه‌ڵ جوان كورده‌یل فه‌یلى به‌یگه‌وه‌ له‌مه‌یدان وازى تایكواندۆ.