كینه‌ت له‌ سیاسه‌ت

شفق نيوز

جارجاریگ له‌ئاكام تیكه‌ڵ نه‌وین سیاسیه‌یل و جارجاریگیش له‌باسنه‌كردن ئه‌و مه‌سه‌له‌یل سیاسیه‌ په‌یا بوون و فره‌جاریش وه‌ سووك ته‌ماشاكردن  سیاسه‌ت خوه‌ى وه‌ك شیوازیگ تایبه‌ت له‌چللاكى كوومه‌ڵایه‌تى خه‌ێده‌ ڕوى.

له‌دونیاى ئیمه‌ كینه‌ت له‌سیتسه‌ت دیارده‌یگ تازه‌ نیه‌، به‌ڵكوو بنه‌ماى قویلیگ له‌رووشنهویرى باو ناوچه‌گه‌ دیرێد. سیاسه‌ت له‌دید بڕیگ  له‌ خوه‌نه‌واره‌یل ئسلام شوون كه‌منرخ و خراو دیرێد، وه‌ك دیارده‌یگ مه‌ترسیدار و رووژانه‌ مامڵه‌ كریه‌ێد. فره‌یگیش له‌ خوه‌نه‌واره‌یل ئه‌و ناوچه‌یله‌ حه‌ز كه‌ن ره‌سم كه‌سیگ ئه‌را خوه‌یان درس بكه‌ن ك گوایا وه‌ مه‌سه‌له‌و پرسیار و باوه‌ته‌یل بى كووتاوه‌ خه‌ریكن نه‌ك وه‌و رویداگه‌یل سیاسیه‌و ك رووژانه‌ رویده‌ن ك هه‌رچه‌نى ئه‌و رویداگه‌یله‌ كاریگه‌رى گه‌وراو قویلیگ له‌بان ژیان به‌ش فره‌یگ له‌ ئاده‌میزاد ئه‌و كوومه‌ڵگایه‌یله‌ بیلنه‌جى و هه‌وه‌جه‌ وه‌ ئه‌وه‌ داشتوون وه‌ وه‌رده‌وامى شیه‌و بكریه‌ن.

له‌ڕاسى كینه‌ت له‌سیاسه‌ت له‌دونیاى ئیمه‌ وه‌پله‌ى یه‌كه‌م بنه‌ڕه‌تیگ دینى دیرێد. ئه‌ڵڵاجه‌وى ها له‌ورا ئى ره‌سینه‌وه‌ له‌ سیاسه‌ت له‌وه‌زعیگ درووس بوود ك له‌تى نابه‌شدارى سیاسى یه‌كیگه‌ له‌كیشه‌یل فره‌ سه‌ره‌كى ئى كوومه‌ڵگایه‌یله‌. با بزانیم له‌یرا ئه‌رك رووشنهویر چه‌س؟ ئایا ئه‌رك رووشنهویر ئه‌وه‌سه‌ روى وه‌ر ناسیاسه‌ت گه‌وراوه‌ بكا و هه‌وڵ نایاساییكردن زیاتر كوومه‌َگا به‌ێد، یا وه‌چه‌واشه‌و؟ ئایا ئه‌رك رووشنهویر پیكهاتگه‌ له‌ بته‌وكردن ره‌سمه‌یل خراو سیاسه‌ت یا وه‌رگیریكردنه‌ له‌و راسیه‌ ك ئاده‌میزاد هه‌ر له‌بنه‌ڕه‌ته‌و جویر ئه‌وه‌ك ئه‌رستۆ ئویشێد" ئاژه‌ڵیگ سیاسیه‌"؟

ئى دیده‌ ئه‌را رووشنهویر  دیدیگ نیه‌ رووشنهویر وه‌ك یه‌كیگ له‌ ئه‌نجامده‌ر كوومه‌ڵایه‌تى ناو رووژگار تاریخى و ماریفى دیاریكریاگ به‌رهه‌م بارێد، به‌ڵكوو دیدیگه‌ ره‌سم په‌یامبه‌ر و فریشته‌و سوپه‌رمان به‌خشێده‌ رووشنهویر.

سیاسه‌تترین كاریگ ئه‌وه‌سه‌ رووشنهویر خوه‌ى وه‌ نوێنه‌ر كوومه‌ڵگاو تاریخ و ئنسانیه‌ت و جوانى و پاكى و ئى جووره‌ چشته‌یله‌ بزانێد. له‌ هه‌ر شوونیگ رووشنهویر وه‌ زووان نوێنه‌رایه‌تى قسه‌ كرد، ئه‌وه‌ بیگومان له‌ورا نه‌ك ته‌نیا سیاسه‌ت ئه‌كا، به‌ڵكوو سیاسه‌تیگ فره‌ مه‌ترسیدارو خراویش ئه‌كا، ك هه‌رچه‌نى وه‌ئاشكرایش هه‌ڵگر وتاریگ ناسیاسى و دژ وه‌ سیاسه‌تیش بوود. ئنجا له‌ى وه‌زعه‌ رووشنهویر نه‌ك سیاسه‌ت ناكا، به‌ڵكوو روى وه‌ر سیاسه‌ت خراو له‌كوومه‌ڵگا گه‌ورا ئه‌كا.

له‌باوه‌ت نوێنه‌رایه‌تیكردن ئه‌رك رووشنهویر ئه‌وه‌سه‌ كار ئه‌را ئه‌وه‌ بكا هیز و گرووپ و لایه‌نه‌یل جیاواز بتویه‌نن خوه‌یان قسه‌ بكه‌ن و خوه‌یان نوێنه‌رایه‌تى خوه‌یان بكه‌ن و باس دونیاى خوه‌یان بكه‌ن، نه‌ك كه‌سه‌یلیگ تر له‌جیاى ئه‌وان قسه‌ بكه‌ن.

مه‌ریوان وریا