ئاینده‌ى دووسایه‌تى كورد وه‌ل ملله‌ته‌یل جه‌هانا

شفق نيوز

جه‌هانا، وه‌ل ئه‌وه‌یشا دووسایه‌تى خاسیگ دیریگ وه‌ل گشت ملله‌ته‌یلا له‌ى دونیاو له‌هه‌مان وه‌خت جویر ئه‌وه‌ك چوین خوه‌ى توایگ  گشت ئومید و ئاره‌زووه‌یلى بایگه‌ دى، هه‌ر وه‌و جووریشه‌ توایگ گشت ملله‌ته‌یل ئنسانى هه‌مان ئاره‌زووه‌یلیان بایگه‌دى.

هه‌ر له‌ى ڕویه‌وه‌ كورد هویر له‌وه‌ كرد ك په‌یوه‌ندیه‌یل خاسیگ  داشتووگ و هه‌وڵ بیه‌ن له‌وه‌ر خاتر بته‌وكردنى وه‌ل ملله‌ته‌یلا و ئه‌و په‌یوه‌ندیه‌ په‌ره‌ بسینیگ و بووگه‌ دووسایه‌تیگ  تاریخى وه‌ ئامانج دروسكردن ژیار، چوینكه‌ قانجاز له‌و ژیار یا حزاره‌ ئه‌وه‌سه‌ ك له‌دروسكردن به‌شدارى ئه‌كاو هه‌واڵه‌ى وجوودى ئه‌كا ئه‌را گشت ئاده‌میزاد له‌وه‌ر خاتر خزمه‌تكردن و دروسكردن ژیان خاستر و ئاینده‌یگ جوانتر.

بیگومان مه‌یل ملله‌ت كوردمان له‌ پیشكه‌فتن و بته‌وكردن دووسایه‌تى وه‌ل ملله‌ته‌یل بان گووشه‌ى زه‌ویا له‌وه‌ر خاتر نزیكه‌وبوین و كار هاوبه‌ش وه‌ل ده‌سه‌یل رووشنهویر و فكرمه‌نا ئه‌را چه‌سپانن ریڕه‌و دیموكراسى و مه‌سه‌له‌ى ئازادى و گوزارش وه‌ ئاشكراو نیشانداین ڕاى و هه‌ق بڕیار چاره‌نویس ملله‌ته‌یل جویر ریڕه‌ویگ  ئنسانى و خواستیگ  نه‌چه‌كیاگ له‌گشت وه‌زع وحاڵه‌تیگ ، چوینكه‌ ریڕه‌و هه‌ق بڕیار چارنویس ملله‌ته‌یل ئه‌وه‌سه‌ ك كوومه‌ڵه‌(جه‌معیه‌)یه‌یل ناوده‌وڵه‌تى و ریكخریاگه‌یل جه‌هانى جویر ده‌سه‌ى نه‌ته‌وه‌یل یه‌كگرتگ  و ریكخریاگ ناوده‌وڵه‌تى هه‌ق ئاده‌میزاد بڕیارى داگه‌. ئمجا كورد تویه‌نست كوومه‌ڵه‌یه‌یلیگ  بوینیگه‌وه‌ ئه‌را دووسایه‌تیكردن وه‌لیانا له‌ فره‌یگ  ده‌وڵه‌ته‌یل جه‌هان وه‌ك(كوومه‌ڵه‌ى دووسایه‌تى كوردى و ئه‌مازیغى- كوومه‌ڵه‌ى دووسایه‌تى كوردى و ئه‌ڵمانى- كوومه‌ڵه‌ى دووسایه‌تى كوردى و فنله‌ندى- كوومه‌ڵه‌ى دووسایه‌تى كوردى و عه‌ره‌بى). گشت ئى كوومه‌ڵه‌یله‌ هه‌وڵ هوشیارى خاسیگ  ده‌ن ئه‌را باوه‌ته‌یل نیشتمانى و گه‌شه‌داین وه‌ رووشنهویرى دیموكراسى و رووح خه‌بات و زیایكردن ده‌رفه‌ت په‌یوه‌ندى و نزیكه‌وبوین له‌ناونى ملله‌ته‌یل، وه‌ل ئه‌وه‌یشا ده‌سڵاته‌یل فه‌رمانڕه‌وا خه‌یگه‌ وه‌رده‌م فشاره‌یل ڕاى گشتى ناوده‌وڵه‌تى.

له‌ ئه‌نجام گفتوگوو كوردى و عه‌ره‌بى ك سه‌رۆك مه‌سعود بارزانى داواى كرد ساڵ 2004 ئه‌وه‌ بوى كوومه‌ڵه‌ى دووسایه‌تى كوردى عه‌ره‌بى گه‌ردینه‌ شوون پیشینه‌یگ  هاوبه‌ش ئه‌را فراوانكردن ئاینده‌یگ  فكرى و داناین تاریخیگ  هاوبه‌ش هه‌ردوگ نه‌ته‌وه‌ى عه‌ره‌ب و كورد، ئه‌یه‌ له‌لایگه‌وه‌، له‌لایگ  تریشه‌وه‌ له‌وه‌ر خاتر په‌خشكردن رووشنهویرى هاوكارى نیشتمانى و ڕه‌سینه‌وه‌ى راسه‌قینه‌ له‌ مه‌سه‌له‌ى فیدراڵیه‌ت و لاوردن مه‌سه‌له‌ى ره‌گه‌زى و شۆڤێنى، ك گشت ئى كاره‌یله‌ بنه‌ڕه‌تیگ  دروسكرد و بویه‌ هووكار دووسایه‌تى كوردى عه‌ره‌بى و بیجه‌ ئه‌وه‌یش كوومه‌ڵه‌گه‌ داواى وه‌دیكردن زه‌مینه‌یگ  وه‌رده‌وام و گه‌وراتر كرد ئه‌را فراوانتركردن مه‌سه‌له‌ى گفتوگووكردن و هاوكارى خاس و ئاینده‌یى له‌ عراق له‌بان ئاست عه‌ره‌بى و كوردى. هه‌ر له‌وه‌ر ئه‌وه‌یش كوومه‌ڵه‌ یا جه‌معیه‌گه‌ چالاكیه‌یل جووراو جووریگ  پیشكه‌ش كرد جویر كۆنگره‌و دانیشتن هاوبه‌ش و به‌شداریكردن له‌ ریكخریاگه‌یل كوومه‌ڵگاى مه‌ده‌نى، وه‌ل ئه‌وه‌یشا كوومه‌ڵه‌گه‌ گووڤاریگیش وه‌ناو( دووسایه‌تى) ده‌ركرد.

 

محه‌مه‌د عه‌لى سه‌ماوى