ئه‌‌را چه‌‌ كوردستان خریاسه‌‌ ژێر فشار..؟!

شفق نيوز

ده‌‌سوه‌‌پى كردنه‌‌سه‌‌و و هه‌رێم كوردستان خستنه‌‌سه‌‌ ژێر فشار و هه‌‌وڵ ده‌‌ن ئى هه‌رێمه‌‌ ك ته‌نیا ده‌‌روازه‌ى ئومید ملله‌ت كورده‌‌ جوور ئامرازێگ ئه‌‌را كه‌‌مه‌‌وكردن فشاره‌‌یل ناوخوه‌‌یى و ده‌‌ركى خوه‌‌یان بارنه‌‌ كار و له‌ لایگ تریشه‌‌و دریژه‌‌ بیه‌‌نه‌‌ جه‌‌نگ چه‌‌ن ساڵه‌‌ى دژ وه‌‌ كورد. حكوومه‌‌ت عراق وه‌‌ سه‌‌رۆكایه‌‌تى نورى مالكى و فراكسیۆنه‌‌گه‌‌ى له‌ وه‌‌ختیگ ك خوه‌‌ى تویش چه‌‌نه‌‌ها كێشه‌‌ى ناوخوه‌‌ییه‌ ته‌قالا ئه‌‌كا وه‌‌دروس كردن كێشه‌‌ له‌ ناوچه‌‌یل داوڕیاگ و دژایه‌‌تى كردن كورد له‌و ناوچه‌‌یله‌ فشار بارێده‌‌ بان سه‌‌ركردایه‌‌تى سیاسى كورد ك وه‌‌ى دویاخره‌‌ له‌ لیست عراقیه‌‌ وه‌‌ سه‌‌رۆكایه‌‌تى ئه‌‌یاد عه‌‌لاوى نزیكه‌‌و بوى، ك وه‌‌باوه‌‌ڕم په‌‌یڕه‌‌وكردن ئى سیاسه‌‌تیشه‌‌ وه‌‌ ڕه‌‌زامه‌‌ندى واشنتۆنه‌‌ ك هویچ هه‌‌ڵوێست ڕه‌‌سمییگ نه‌‌یاشت له‌باره‌‌ى كێشه‌‌یل وه‌‌دیهاتگ له‌ ناوچه‌‌یل داوڕیاگ، له‌ لایگتریشه‌‌و حكوومه‌‌ت عراق گڵۆبیگ سه‌‌وز نیشان ئیران و توركیا داس ئه‌‌را ئه‌‌وه‌‌گ ئه‌‌وانیش له‌لاى خوه‌‌یانه‌‌و هه‌رێم كوردستان بكه‌‌نه‌‌ ئامانج و ده‌‌سدریژى بكه‌‌نه‌‌ بان سنووره‌‌یل هه‌رێم كوردستان و وه‌‌ تووپواران كردن ئه‌‌و ناوچه‌‌یله‌ فشاره‌‌یل ناوخوه‌‌یى خوه‌‌یان جیواز بكه‌‌ن ئه‌‌را بان هه‌رێم كوردستان، ئه‌وه‌یش وه‌بێده‌نگبوین حكوومه‌ت به‌غدا له‌وه‌رانوه‌ر ئه‌و ده‌سدریژیه‌یله‌ ك له‌ لایه‌ن ئه‌و وڵاته‌یله‌ كریه‌ێده‌ بان هه‌رێم كوردستان ك ئیسه‌ به‌شێگه‌ له‌ خاك عراق. ئمجا له‌شوون وازبوین كونسۆڵخانه‌‌ى ئه‌‌مریكا له‌ هه‌رێم كوردستان، ئیران وه‌‌بڕین ئاو ئه‌‌ڵوه‌‌ن و تووپواران كردن سنووره‌‌یل هه‌رێم كوردستان وه‌‌ بیانگ ده‌‌سوه‌‌شانن له‌ گریلایه‌‌یل PJAK، په‌‌یامیگ ئه‌‌را سه‌‌ركردایه‌‌تى سیاسى كورد داشت ك ئه‌‌وه‌‌یش كارتیگ قرمز هه‌‌ڕه‌‌شه‌‌كردن بوى، وه‌‌لى ئه‌‌وه‌‌گ جى سه‌‌ر سڕمه‌‌نینه‌‌ هه‌‌ڵوێست ولایه‌‌ته‌یل یه‌‌كگرتگ ئه‌‌مریكاس ك وه‌‌ هه‌‌ڵوژانن بێده‌‌نگى له‌وه‌‌رانوه‌‌ر ده‌‌سدریژیه‌‌یل ئیران ئه‌‌را بان خاك عراق گڵۆبیگ سه‌‌وز نیشان ئیران دا تا دریژه‌‌ بیه‌‌ێده‌‌ تووپواران كردن ئاوایه‌‌یل سنوورى هه‌رێم و كاره‌‌گه‌‌ بڕه‌‌سێده‌‌ جییگ ك بانه‌‌ ناو خاك هه‌رێم كوردستان و ئۆپه‌‌راسیۆنه‌‌یل سه‌‌ربازى خوه‌‌یان له‌ناو خاك عراق ئه‌‌نجام بیه‌‌ن و بیجگه‌‌ له‌ جه‌‌نگ پژاك هاووڵاتیه‌‌یل مه‌‌ده‌‌نى هه‌رێم كوردستانیش بكه‌‌نه‌‌ ئامانج. وه‌‌باوه‌‌ڕم ئیران له‌ڕێ فشارهاوردنه‌‌ بان هه‌رێم كوردستان تواێد وه‌‌ یه‌‌ك تیر چه‌‌ن نیشان بكۆتێد:

1-         سه‌‌ركردایه‌‌تى سیاسى له‌ هه‌رێم كوردستان ناچار بكه‌‌ێد فشار بارێده‌‌ بان ئۆپۆزسیۆن كوردى ڕووژهه‌ڵات كوردستان وه‌‌گشتى و (PJAK  و (PKK  وه‌‌تایبه‌‌تى.

2-         ئه‌‌را ئه‌‌وه‌‌گ فشاره‌‌یل ناوخوه‌‌یى خوه‌‌ى ئه‌‌را ده‌‌یشت ئیران جیواز بكا مه‌‌ترسى ئه‌‌و چاره‌‌نویسه‌‌ ك له‌ وه‌‌هار عه‌‌ره‌‌بى تویش وڵاته‌یل ناوچه‌‌گه‌‌ هات له‌ خوه‌ى دویره‌‌و بخه‌‌ێد.

3-         نواگرتن له‌ پارته‌یل كوردى ئه‌‌را ئه‌‌وه‌‌گ ده‌‌سمه‌‌یه‌‌ت ئۆپۆزسیۆن كوردى له‌ سوریا نه‌‌یه‌‌ن و پشتگیرى له‌ كورده‌‌یل باشوور بویچگ كوردستان نه‌‌كه‌‌ن ئه‌‌را وسیان له‌ دژ ڕژیم ئه‌‌سه‌‌د.

4-         ناچار كردن لایه‌‌ن كوردى له‌ عراق ئه‌‌را نزیكه‌‌وبوین له‌ مالكى و دویره‌‌وكه‌‌فتن له‌ عه‌‌لاوى و له‌ ئاكام یه‌‌یش كه‌‌مه‌‌وكردن فشاره‌‌یلیگ ك هانه‌‌ بان حكوومه‌‌ته‌گه‌‌ى مالكى.

5-         ڕێگرى كردن له‌ به‌‌سانن كۆنگره‌‌ى نه‌‌ته‌وه‌‌یى له‌ كوردستان.

 

ئمجا ئه‌‌گه‌‌ر بایم و باس سیاسه‌‌ت دژ وه‌‌ كورد ئه‌‌ى دویاخره‌‌ بكه‌‌یم له‌ لایه‌‌ن ڕژیم توركیا، بایه‌‌د سه‌‌ره‌‌تا ئاماژه‌‌ وه‌‌ نه‌‌خش ئه‌‌مریكا بكه‌‌یمن له‌ مه‌‌سه‌‌له‌گه‌‌ ك وه‌‌ پشتگیرى ره‌‌سمى له‌ توركیا ئیجازه‌‌ وه‌‌ سوپاى ئه‌‌و وڵاته‌ ده‌‌ێد ك له‌ڕێ ئاسمانیگ ك ئه‌‌مریكا كۆنترۆڵى كه‌‌ێد سنووره‌‌یل هه‌رێم كوردستان تووپواران بكا و هاووڵاتیه‌‌یل بى تاوان و باره‌‌گایه‌‌یل PKK  وه‌‌یه‌‌كه‌‌و بكه‌‌ێده‌‌ ئامانج. فشاره‌‌یل توركیایش ئه‌‌را بان هه‌رێم كوردستان بیجگه‌‌ له‌ ده‌‌سوه‌‌شانن له‌ PKK ئه‌‌را ئه‌‌وه‌‌سه‌‌ ك فشارێگ بخه‌ێده‌‌ بان كورد ئه‌‌را ئه‌‌وه‌‌گ له‌ى بارودوخ ناوچه‌‌یل داوڕیاگه‌‌ بڕێگ پوان سیاسى بیه‌‌ێده‌‌ پارته‌یل توركمان عراق له‌ ناوچه‌‌یل داوڕیاگ ك له‌ لایه‌‌ن حكوومه‌‌ت تورك پشتگیرى له‌لیان ‌كریه‌‌ێد. بیجگه‌‌ له‌وانه‌‌یش ك باس كریا لێوا دیاره‌‌ ك پیلانیگ هه‌رێمى وه‌‌ ڕه‌‌زامه‌‌ندى ئه‌‌مریكا ها له‌ ئارا ئه‌‌را ئه‌‌وه‌‌گ جه‌‌نگێگ براكوژى له‌ناو كورد بنریه‌‌ێده‌‌و و پارته‌یل كوردستانى له‌ هه‌رێم بنه‌‌نه‌‌ وه‌‌راێوه‌‌ر PKK و  PJAKو كارێگ بكه‌‌ن ك ماڵ كورد یه‌‌ك نه‌‌گرێ، چوینكه‌‌ وه‌‌له‌وه‌‌رچه‌‌وگرتن بارودوخ ناوچه‌‌گه‌‌ و ئه‌‌و خاڵه‌‌یله‌ ك له‌ بان باس كریان سه‌‌رگرتن ده‌‌وڵه‌‌ت سه‌‌روه‌‌خوه‌‌ى كوردى له‌ى وه‌‌خت ئیسه‌‌مانه‌‌ بویه‌‌سه‌‌ ترسیگ گه‌‌ورا و چیه‌‌سه‌‌ ناو جه‌‌سه‌‌ى وڵاته‌یل ناوچه‌‌گه‌‌ وه‌‌ تایبه‌‌ت ده‌‌وڵه‌‌ته‌یل داگیركه‌‌ر كوردستان؛ یه‌‌یش له‌ وه‌‌ختیگه‌‌ ك سه‌‌رۆك بارزانى وه‌‌ وه‌‌رده‌‌وامى له‌ بان ئه‌‌وه‌‌ جه‌‌خت ئه‌‌كا ك مه‌‌حاڵه‌‌ جاریگ تر خوین كورد وه‌‌ده‌‌س كورد بڕشیه‌ێد و وه‌‌ هویچ شیوه‌‌یگ ئجازه‌‌ نیه‌‌ن جه‌‌نگ براكوژى له‌ كوردستان ڕوى بیه‌‌ێد و بایه‌‌د ماڵ كورد یه‌‌كبخریه‌‌ێد.

 

ئاراس جه‌‌واد