ئى گه‌شتیشه‌ ته‌واو، دى چه‌؟

شفق نيوز

 

له‌ گه‌شت ئى دویاخر هه‌ڵوژاردنه‌یله‌ هویروڕاى جووراوجووریگ ده‌ركه‌فت جوور هه‌رجار له‌باوه‌ت مه‌سه‌له‌ى ده‌نگداین وه‌ كه‌س شایسته‌و مه‌زڵومیه‌ت زه‌ره‌دمه‌نه‌یل و باس له‌وه‌ كردیان كى خاسه‌و كى خزمه‌ت وه‌ پێكهاته‌ى كورد فه‌یلى ئه‌كا له‌و كه‌سه‌یله‌ ك ناویان ئاشكرا بوى ئه‌ڕامان و ئویشیم: چه‌ن هه‌زار ناویگ جوور دویا ئه‌نجام وه‌ل كۆتا ئه‌وه‌ له‌بانمان چه‌سپنێ هویر له‌ڕاسى بكه‌یم ك دویره‌وخستن بازى سیاسى ته‌نیا به‌شدارییگ ته‌واو نییه‌، به‌ڵكوو فه‌رز ئه‌وه‌ ئه‌كاد ك بایه‌د ئه‌و كه‌سه‌ كاریگه‌رییگ سیاسى و كوومه‌ڵایه‌تى داشتوود و رێژه‌ى به‌شداریكردن كه‌میگ وه‌شیوه‌ى گشتى و به‌شداریكردن فه‌یلیه‌یل وه‌تایبه‌ت ئسبات ئه‌وه‌ ئه‌كا ك باوه‌ڕ وه‌ دیمۆكراسیه‌ت جوور ته‌نیا رێیگ ئه‌را ئاڵشتكارى له‌ئاست ئاره‌زوو نییه‌.

 

ئویشمه‌ ئه‌وانه‌ك خوو گرتن له‌بن ره‌خنه‌گرتن كه‌سه‌یل تر، چه‌تر كۆتا ده‌رفه‌تیگ ئه‌را وجوودمان له‌ ئه‌نجوومه‌ن پارێزگاى واست و به‌غدا دابین كرد، وه‌لى گرنگ ئه‌وه‌سه‌ ئى ئاماده‌گیه‌ چه‌ ئه‌ڕامان پێشكه‌ش بكا، چوینكه‌ له‌ گشت ساڵه‌یل گوزه‌یشته‌ وه‌و شێوه‌ نه‌ڕه‌سیمنه‌سه‌ ئه‌و هه‌قه‌یلمانه‌ ك شایسته‌ى بویمن و ئاره‌زووى كردیایم، هووكاره‌گه‌یشى ئه‌و غه‌ڵه‌ته‌یل دوباره‌كریاگه‌ بوى له‌ شێوه‌ى ده‌رخستن كێشه‌یلمان وه‌ل سسى ئاماده‌بوین سیاسیمان وه‌شیوه‌یگ فه‌رمى له‌و هه‌ڵوژاردنه‌یل ساڵه‌یل وه‌رینه‌.

 

من ئیچنه‌ دوینم ك نووڕستنیگ ئاسایى و نایه‌كسان و مه‌سه‌له‌ى سووزدارى نا لۆژیكى بویه‌ هووكار وه‌دیكردن بۆشایى له‌ به‌رژه‌وه‌ندى نائومیدى و خود وه‌ده‌سه‌وداین و ده‌رخستن رووشنهویرى تاوانباركردن.

 

هه‌ڵوژاردنه‌یل ته‌واو بوى و لیسته‌یلیگ سه‌ركه‌فتن و بڕێگ زه‌ره‌دمه‌ن بوین، ئیمه‌یش ئویشیم ئیمه‌ گشتمان سه‌ركه‌فتیمنه‌و ته‌نیا ئاماده‌گیمان سه‌ركه‌فتنیگه‌، وه‌لى له‌ هه‌مان وه‌خت مادام تواناى چه‌سپانن داواكاریه‌یلمان نه‌یریم وه‌ هێز سیاسى و هووزایه‌تى و ئابوورى، بایه‌د هه‌وڵیگ تر بیه‌یم و له‌ڕێ هێز مه‌نتقه‌و ئاشكراى بكه‌یم وه‌ شێوازیگ كاریگه‌ر و بایه‌د ته‌قالا بكه‌یم ئه‌را یه‌كه‌وگرتنمان و له‌باوه‌ش گرتن دووس و خوه‌شه‌ویسه‌یلمان و متمانه‌یان باریمنه‌ ده‌س.

 

هه‌ر له‌وه‌ر ئه‌وه‌یش ئومیدوارم له‌ هه‌ڵوژاردنه‌یل ئاینده‌ى په‌رله‌مان كوردستانیش ئاماده‌گى كه‌سایه‌تى فه‌یلى چ ژن چ پیاگ له‌تێ له‌وه‌رچه‌و بگیریه‌ێد، ئمجا ئه‌وه‌ك چووده‌ په‌رله‌مان و ده‌سڵات جیوه‌جیكردن یا بووده‌ پیاو دوڵه‌ت بایه‌د ته‌ماشاى دویر بكا له‌وه‌رانوه‌ر كێشه‌گه‌مان و هویر له‌وه‌ بكا دڵئارامى و سه‌قامگیرى بارێد ئه‌را هاووڵاتیه‌یلى و بایه‌سه‌ ئه‌وه‌یش له‌ هویرى نه‌چوود ك باوه‌ڕ و هویر وڕاى جووراوجوور ئیچنه‌ وه‌پى ئه‌كا نه‌تویه‌نێد رازى گشت كه‌سیگ بكا، بیگومان ئى ئاره‌زووه‌یلیشه‌ نایه‌نه‌دى ئه‌گه‌ر متمانه‌ى قه‌واره‌یل سیاسى وه‌ده‌س ناریم، ك یه‌یش دژ داواكارى هه‌قه‌یلمان نییه‌و دژ ئه‌وه‌ نییه‌ ڕێ فیشتر واز بكه‌یم ئه‌را به‌شداریكردن فیشتر.

 

عه‌لى حسێن فه‌یلى

ج . أ