ژن فه‌یلى... كویه‌یگ له‌ خه‌مه‌یل

شفق نيوز

سته‌مه‌ دو ئه‌وه‌نه‌ى ئه‌وه‌ بوى، چوینكه‌ تویش دڕه‌نده‌ترین كاره‌ساته‌یل زوڵم و جیاوازى و دویره‌وخستن هات و هه‌میشه‌ له‌ناو خه‌م و خفه‌ت و نیگه‌رانى له‌ئاینده‌ ژیان و بیبه‌ش بوین له‌ به‌خته‌وه‌رى و ژیان خوه‌ش وئارام. وه‌ل ئه‌وه‌یشا ژن فه‌یلى ده‌رفه‌ت ئه‌وه‌ وه‌پى نه‌دریا خوه‌ندن خوه‌ى ته‌واو بكا و بچووگه‌ زانكۆ یا جامعه‌یل و كار وه‌پى بدریه‌یگ له‌ ده‌زگایه‌یل ده‌وڵه‌ت.

هه‌ر له‌وه‌ر ئه‌وه‌یش ك ژن فه‌یلى خه‌باتكه‌ر و نیشتمانپه‌روه‌ر بوى، بویه‌ یه‌كه‌مین قوربانى كاره‌سات وه‌حشیانه‌و كه‌فته‌وه‌ر كووچ وه‌پیكردن زووره‌ملى وه‌ مه‌هانه‌ى تبه‌عیه‌ى ئیرانى و گشت جووره‌ شوناسنامه‌یگ له‌لى سه‌نیاوه‌و گشت به‌ڵگه‌یگ ك ئسپات عراقیه‌تبوینى كرد له‌لیان زه‌فتكریا.

بیجگه‌ ئه‌وه‌یش كه‌س وكارى و مناڵه‌یل و براو خوه‌یشكه‌یلى خریانه‌ زندانه‌یل و دویاخریش له‌ناوبریان. ئنجا بیجگه‌ ئه‌وه‌یش گشتمان زانیم ك مه‌سه‌له‌ى ته‌ڵاق و جیابوینه‌وه‌ بوغزترین چشته‌ له‌لاى خودا، وه‌لى له‌وه‌خت رژیم رمیاگ وه‌رین چشت ئاساییگ بوى ك ناچار پیاوه‌یل كردیان ته‌ڵاق ژنه‌یلیان بیه‌ن وه‌تایبه‌ت ئه‌وانه‌ك سه‌رباز بوین یا ئه‌وانه‌ك پله‌ى به‌رز داشتیان له‌حاڵه‌تیگ ئه‌گه‌ر ژنه‌یلیان له‌ چین كورده‌یل فه‌یلى بویاتاگ!!!

بیگومان سیاسه‌ت سته‌مكارانه‌و خوسه‌و خه‌م دڵ ژنه‌یل فه‌یلى داڕزان وه‌تایبه‌ت دڵ داڵگه‌یل، چوینگه‌ ژیان وه‌خه‌م و گیرستن و سه‌رگه‌ردانى و به‌دبه‌ختى بردیانه‌سه‌ر. بیجگه‌ ئه‌و هه‌مگه‌ به‌دبه‌ختییشه‌، ژیان له‌ غوربه‌ت و دویر له‌وڵات جوانى ساڵه‌یل عومر ژنه‌یلى فه‌یلى دزى، وه‌لى وه‌ ئه‌وه‌یشه‌وه‌ جویر كویه‌ى به‌رز وه‌رگه‌ى گشت به‌دبه‌ختى و ده‌رد وهاواریگ گرتن و فره‌یگیش له‌لیان وه‌ دڵ پڕ له‌خه‌م و ژانه‌وه‌ ماڵئاوایى له‌ژیان كردن. ئنجا له‌یرا پرسیار ئه‌وه‌ كه‌یم چ ژنیگ وه‌ك ژن فه‌یلى وه‌رگه‌ى ئه‌و جه‌ور و سته‌م و زوڵمكارى و جیاوازیه‌ گرت و توانایى خوه‌ى ئسپات كرد؟

بیگومان ژن فه‌یلى ئه‌فسانه‌یگه‌و شایسته‌ى ریز و حورمه‌تن له‌وه‌ر ئه‌و هه‌مگه‌ سه‌بر و تواناییه‌ ك داشته‌ى له‌وه‌رانوه‌ر ئه‌و كاره‌ساته‌یل نائنسانیه‌ ك هاته‌ تویشى له‌سه‌رده‌م رژیم وه‌رین سته‌مكار.

 

نه‌سرین میرزا خه‌نجه‌ر