خاك و نیشتمان له‌وژدان ده‌سڵاتداره‌یل عراق

شفق نيوز

 

هه‌ر له‌سه‌رده‌م وه‌رجه‌ ئسلام و بگر تا سه‌رده‌م ئمپراتۆریه‌ت و ئیسه‌یش وه‌لیا، سیاسه‌ت داگیركردن خاك و نیشتمان هه‌وڵیگ بویه‌ ئه‌را ده‌سكه‌فتن و چه‌سپانن ده‌سڵات داگیركارى وه‌شیوه‌یگ فراوانتر، یا لكانن خاك وه‌ جوگرافیاى ده‌وڵه‌ته‌یل تر داگیركه‌ر وه‌بى خواست و ئیراده‌ى مه‌ردمه‌گه‌ى جوور ئه‌وه‌ك ده‌رهه‌ق وه‌ خاك كوردستان رویداو له‌ساى وڵاته‌یل گه‌وراهیز به‌شبه‌شه‌و كریا له‌بان وڵاته‌یل ئیران و سوریاو توركیاو عراق.

مه‌رام باسه‌گه‌ له‌یرا ئى خاك عراقه‌سه‌ ك جى داخه‌ هه‌رێم كوردستان له‌لى بترازیه‌ید، خه‌مخوه‌ریگ راسكانى نه‌یرید ك وه‌راسى خه‌م ئى نیشتمانه‌ بخوه‌یدو له‌ى قه‌یرانه‌یل پڕ كاره‌سات و خویناویه‌ قورتارى بكاو له‌جیاى دڕگ گوڵ له‌تى بكاڵید.

دیاره‌ ئنتما ئه‌را نیشتمان خوازیار هه‌وڵ و خه‌بات جددیه‌ نه‌ك ته‌نیا قسه‌ى ده‌م و گوزارش بى كرده‌وه‌، چوینكه‌ نیشتمان بایه‌سه‌ مقه‌یه‌تى له‌لى بكریه‌یدو هه‌وڵ ئاوه‌دانى و سه‌قامگیرى له‌تى بدریه‌ید له‌بان بنه‌ماى وه‌یه‌كه‌وه‌ژیانیگ پڕ ئاسووده‌یى و دڵنیایى، هه‌ر له‌وه‌ر ئه‌وه‌یش نه‌بایه‌د ڕى وه‌ كاولكار و خراوه‌كار بدریه‌ید دوزه‌خ و ئاگر مه‌رگ له‌بانى دروس بكا.

راسه‌ عراق ده‌خاڵه‌ت ده‌ره‌كى و به‌رژه‌وه‌ندى وڵاتیگ جوور ئه‌مریكا ك هووكار قورتاركردنى بوى له‌ده‌س گه‌وراترین سته‌مكار سه‌رده‌م ك رژیم خوینمژ سه‌دام حسێن بوى و ئه‌را ماوه‌ى فیشتر له‌ 35ساڵ جڵه‌و ده‌سڵات ته‌كڕه‌وى و دیكتاتۆریه‌ت له‌ده‌سى بوى و ئى نیشتمانه‌ له‌ روڵه‌یلى كردویده‌ دوزه‌خ، وه‌لى وه‌ل ئه‌وه‌یشا نه‌بایه‌د ده‌سڵاتداره‌یل دویاى ئازادكردن عراق جوور ریواریگ ته‌ماشاى وڵاته‌گه‌ بكه‌ن و دڵ ئه‌را ئاوه‌دانى و سه‌قامگیرى و ئاسایشه‌گه‌ى نه‌كه‌نه‌ خه‌م، چوینكه‌ خوه‌شه‌ویسى وڵات راسه‌وخۆ په‌یوه‌سه‌ ك مقه‌یتیكردنى له‌گشت بواریگه‌و.

ئمڕوو له‌ساى ده‌وڵه‌ت و ده‌سڵات دیموكراسى له‌ى عراقه‌ ئه‌وه‌ك راسى بوود هویچ دڵخوه‌شییگ تائیسه‌ وه‌دى ناتگه‌ بیجگه‌ كوشتار و كیشمه‌یكش ناونى لایه‌ن و حزبه‌یل و جه‌نگ وه‌رده‌وام تایفه‌گه‌رى و ته‌قینه‌وه‌و كاولكردن، یه‌یش ماناى ئه‌وه‌سه‌ ك ئنتماى ده‌سڵاتدار و سه‌ركرده‌ى حزبه‌یل ئه‌را خاك و نیشتمان دویره‌ له‌وژدان و خوه‌شه‌ویسى.

ئه‌وه‌ك ئمڕوو روى ده‌ید و گوزه‌رید له‌رویداگ و كاره‌ساته‌یل جوراوجوور، ئاكام نه‌گونجیان و نه‌ڕسینه‌وه‌ى ناونى ده‌سڵاتداره‌یله‌، ك له‌تى هاووڵاتى بیتاوان كریاسه‌ ئاگردوى و خوه‌یانیش نیشتنه‌ گیرفان پڕ كه‌ن و خشتیگ نه‌نانه‌سه‌ بان خشتیگه‌و تا مه‌ردم عراقیش جوور باقى مه‌ردم وڵاته‌یل تر دونیا روى له‌ خوه‌شگوزرانى بكا، هه‌ر له‌وه‌ر ئه‌وه‌یش دونید زه‌خم ئى نیشتمانه‌ ئه‌وه‌نه‌ قویله‌ مه‌گه‌ر ره‌حمه‌ت خودا چاره‌سه‌ر و ده‌رمانى بوود.

ج . أ