كی برده‌و ، كی داينا !

شفق نيوز

زوورمينه‌س ؟ وه‌ چ شيوازيگ بريه‌يگه‌ رييه‌وه‌ ؟ گشت ئه‌يانه‌يش چنه‌وه‌ ئه‌را ئه‌و پيكهاته‌يله‌ ناو عراقه‌و تا ئيسه‌يش له‌بان شوناسنامه‌ی ئی وڵاته‌ يه‌كده‌نگييگ نيه‌ .

هه‌ر يه‌ك له‌ (عه‌ره‌ب شيعه‌و عه‌ره‌ب سونی و كورد) ستايل تايبه‌تيگ وه‌خوه‌يان نه‌يرن و شايه‌ت يه‌يش كاريگ شروشتی بووگ ئه‌گه‌ر وه‌شيوازيگ ديموكراسيانه‌ ئی ئه‌ڕای چوين و شيوازه‌يل جياجيا گفتوگوو له‌بانيان بكريه‌يگ و گشت لايگ ديموكراسی بكه‌نه‌ ئامانجيگ له‌كاره‌يليان ، وه‌لی جوير ئه‌وه‌ك ئاشكراس له‌لای گشتمان ، زوورم وه‌خته‌يل هه‌ر له‌دامه‌زرانن ده‌وڵه‌ت عراقه‌وه‌ ئی زه‌مينه‌ی خاسه‌ وجوود نه‌ياشتگه‌ ، هه‌ر له‌وه‌ر ئه‌وه‌يش په‌نا برياسه‌ وه‌ر شيواز ناديموكراسی و دكتاتۆريه‌ت و كار زوڵم و زوور و سته‌مكاری له‌لايه‌ن ده‌سڵاتدار ئی وڵاته‌وه‌ ئه‌را يه‌كلاكردنه‌وه‌ی ئی ئه‌ڕای چوين و هويروڕايه‌يل جياوازه‌ ، بيگومان هه‌ر يه‌يش له‌يوا كردگه‌ عراق هه‌ر له‌سه‌ره‌تای دروسبوينيه‌وه‌ تا ساڵ (٢٠٠٣)و رميان دكتاتۆريه‌ت سه‌قامگيری و ئارامی وه‌خوه‌يه‌وه‌ نه‌وينيگ و زوورم مه‌ردميش له‌ژير سايه‌ی ترس جووراوجوور بژيه‌ن . ديار و ئاشكرايشه‌ له‌شوون رميان دكتاتۆريه‌تيش له‌نيسان ٢٠٠٣ قوناغ تازه‌يگ له‌ عراق ده‌سكرده‌پی و پيكهاته‌يل سه‌ره‌كی ئی وڵاته‌ دوباره‌ كه‌فتنه‌ وه‌رده‌م دو ئاراسته‌و دو ئه‌ڕای چوين جياوازه‌وه‌ ، ئاراسته‌و ئه‌ڕای ئه‌ڕای چوينيگ له‌ليان ك نا ئاقڵانی و نامه‌نتقيه‌ وه‌هه‌مان هه‌ناسه‌و مه‌نتق دكتاتۆريه‌ت خوه‌ی ده‌رخست ئه‌ويش ئه‌وه‌سه‌ ك بايه‌سه‌ وه‌ڕيگه‌ی ناديموكراسيه‌وه‌ ئه‌ڕای چوينه‌گه‌ی خوه‌ی بچه‌سپنيگ له‌بان ئه‌ڕای چوينه‌يل تر ، جوير ئه‌وه‌يش ك ئاشكراس له‌لای گشتمان ئی ئاراسته‌يشه‌ له‌لايه‌ن قاعيده‌و پاشمه‌نده‌ی به‌عسيه‌يل و گرووپه‌يل تونڕه‌و بريه‌يگه‌ رييه‌وه‌و هه‌ميشه‌ كار ئه‌ڕای كريه‌يگ . ئه‌نجام ئی سياسه‌ت چه‌فتيشه‌ بويه‌سه‌ سه‌به‌ب رشانن خوين هه‌زاران هاووڵاتی بيتاوان و عراقيش فره‌ برده‌سه‌ دوياوه‌ . وه‌لی له‌وه‌رانوه‌ر ئه‌وه‌يش تويه‌نيم خوه‌شبه‌ختانه‌ بويشيم : ئی ئاراسته‌و ئه‌ڕای چوينه‌يله‌ وه‌ره‌و كزی چووگ ، ئمجا له‌وه‌رانوه‌ر ئه‌وه‌يش ئاراسته‌و ئه‌ڕای چوينيگ تر په‌يا بويه‌و داوای وه‌ڕيه‌وبردن وڵات كه‌ن وه‌شيوه‌يگ ديموكراسيانه‌ ، ئی ئاراسته‌يشه‌ سه‌ركردايه‌تی سياسی كوردستان رابه‌رايه‌تيی ئه‌كاو له‌يواسه‌ وه‌پی ك بايه‌سه‌ دوباره‌ وه‌هه‌ناسه‌يگ تره‌وه‌ عراق بوريه‌يگه‌ رييه‌وه‌ ، ئه‌ڕا يه‌يش داوای يه‌كسانی ناونی پيكهاته‌يل كه‌يگ وه‌شيوه‌يگ هه‌ق گشت لايگ زامن بووگ و وه‌رده‌واميش كار ئه‌را ئه‌يه‌ كه‌يگ . ئمجا وه‌خوه‌شحاڵيه‌وه‌ ئه‌را يه‌كمجار له‌تاريخ عراق ده‌ستووريگ هه‌ميشه‌يی و ديموكراسی نويسرياو ملله‌ت عراقيش وه‌ زوورم ده‌نگ له‌ ريفراندۆميگ سه‌ركه‌فتگ و بی وينه‌ ده‌نگ ئه‌ڕای دان ، بيگومان ئی ده‌ستووريشه‌ ئوميد وئاره‌زوو زوورم عراقيه‌يل بوی وه‌ ملله‌ت كورديشه‌وه‌ . هه‌ر له‌و وه‌ختيشه‌وه‌ قوناغ تازه‌يگ په‌يا بوی و دی بايه‌سه‌ گشت له‌ عراق فه‌رمانڕه‌وا بوون و گشتمانيش خوه‌شحاڵ بويمن وه‌ ڕيگه‌ی ديموكراسی و ده‌ستووری ، وه‌لی وه‌ل ئه‌وه‌يشا نيه‌وگ مركه‌و به‌يمن و بويشيم دی تازه‌ گشت چشتيگ چه‌سپياو كاره‌يلمان وه‌ ئاسانی و بی كيشه‌وگرفت چنه‌ رييه‌وه‌ ، چوينكه‌ قوناغه‌گه‌ فره‌ نازگه‌و لايه‌ن ناحه‌ز و دژه‌ ديموكراسی هه‌ميشه‌ مينه‌ی ده‌رفه‌تيگ كه‌ن ئی وه‌زع ئارامه‌ بشيونن و عراق بووه‌نه‌وه‌ ئه‌را دكتاتۆريه‌ت و ته‌كڕه‌وی ، له‌وه‌ر ئه‌وه‌ ئويشيم قوناغ ئيسه‌ فره‌ سه‌خت و هسياره‌ و بايه‌سه‌ هه‌ميشه‌ وه‌ل لايه‌نه‌يلا گفتوگوو بكه‌يم و هه‌وڵ ئه‌وه‌ به‌يم ئی چشته‌ له‌لايان جيگير بكه‌يم ك ئه‌و سه‌رده‌م كويه‌نه‌ نه‌مه‌ند و تازه‌ نيايگه‌ دوياوه‌ ، وه‌ل ئه‌وه‌يشا له‌كيشه‌و گرفته‌يليش وه‌ليانا بڕه‌سيمنه‌ بنه‌مای دروسيگ ئه‌را چاره‌سه‌ركردن كيشه‌يل و له‌هه‌مان وه‌خت له‌ خه‌باتيش وه‌رده‌وام بويمن ئه‌را روی وه‌ روی بوينه‌وه‌ی گرووپه‌يل تيرورسی و شۆڤێنی ك وه‌هويچ هه‌قيگ ملله‌ته‌گه‌مان رازی نيه‌ون و خوه‌يان دانانه‌ ئه‌را دوشمنايه‌تيكردن كورد و هه‌قه‌يل ديموكراسی ملله‌ته‌يل عراق .