كوردو جه‌نگ میدیایى

شفق نيوز

 

وه‌لى جى داخه‌ ئمڕوو دوینیم له‌جیاى جه‌نگ چه‌ك ك خوه‌شبه‌ختانه‌ كووتایى وه‌پى هات، جه‌نگ میدیایى كه‌فته‌سه‌ كار و پرش ئاگره‌گه‌ى روى كرده‌سه‌ گشت ماڵیگ و بڕیگ له‌ سیاسیه‌یل و وه‌رپرسه‌یل تازه‌ خودا وه‌پیداگ مه‌رامیان ئه‌وه‌سه‌ ماڵ و حاڵ كورده‌یل به‌سه‌زووان وه‌پى بسزنن.

بیگومان ئى دیارده‌ و یه‌كترى رسواكردنه‌ نه‌بایه‌د بڕه‌سیده‌ ئه‌و راده‌ ك ئى وه‌رپرسه‌گه‌ سووكایه‌تى وه‌ ئه‌واكه‌ بكاو هه‌ڕه‌شه‌ى ئاشكراكردن و نیشانداین دوكیۆمێنت له‌لى بكاو خوسه‌و كینه‌ت له‌ دڵ و ده‌روین هاووڵاتیه‌یل بكاڵید، چوینكه‌ مه‌رام له‌ى كرده‌وه‌یل ناپوخت و ناپه‌سه‌نه‌ به‌رپاكردن ئاگر جه‌نگ و كاره‌ساته‌، یه‌یش له‌وه‌ختیگ ك هیمان داڵگه‌یل جگه‌رسزیاگ كورد زه‌خمه‌یلیان ساڕیژ نه‌ویه‌و هیمان وه‌رگ ئازیه‌تى ها له‌وه‌ریان و كه‌س وكار ئه‌نفالكریاگه‌یل چه‌وه‌ڕى هاوردنه‌وه‌ى ته‌رم روڵه‌یلیان كه‌ن و بیجگه‌ ئه‌وه‌یش هیمان به‌شیگ تر له‌ خیزان و روڵه‌یل ملله‌ته‌گه‌مان له‌ ناوچه‌یل كوردستانى ده‌یشت هه‌رێم له‌ناو ئاگر و هه‌ڕه‌شه‌ى ترۆر ژیه‌ن و چاره‌نویس شاره‌یلیان یه‌كلاوه‌ نه‌ویه‌و كه‌سیگ له‌وانه‌ك ك خوازیار به‌رپاكردن ئاشوون له‌ناونى كورد دڵ ئه‌ڕایان نه‌كرده‌سه‌ خه‌م.

ئمڕوو دوینیم بڕیگ له‌ وه‌رپرس و حزبه‌یل وه‌ئاشكرا له‌ ره‌سانن و شاشه‌یل ته‌له‌فزیۆن كوردیه‌و هه‌ڕه‌شه‌و په‌لاماره‌یل فره‌یگ كه‌نه‌ بان یه‌كترى و بیجگه‌ له‌ناوزڕانن و قسه‌ى ناشرین هه‌وڵ ئه‌وه‌یش ده‌ن وه‌ به‌ڵگه‌و دوكیۆمێنته‌و ئاشناى مه‌ردم وه‌ كار و كرده‌وه‌یل یه‌كترى بكه‌ن، ك یه‌یش بیگومان رسواییه‌ ئه‌را ئه‌وانه‌ك خوه‌یان وه‌ گه‌وراو ده‌مچه‌رمگ زانن، چوینكه‌ مه‌ینه‌تیه‌یل كورد دى وه‌رگه‌ى فیشتر ناگریدو هیمان ئاره‌زووه‌یل گه‌وراى كورد وه‌ته‌واوى ناته‌سه‌ دى و هه‌ر له‌ساى چه‌وه‌ڕیكردن ژیه‌ن.

هه‌ر له‌وه‌ر ئه‌وه‌یش له‌ڕى قه‌ڵه‌م ئازاد و داواكارى نه‌ته‌وایه‌تى و نیشتمانیه‌و خوازیاریم له‌و كه‌س و لایه‌نه‌یله‌ واز له‌مه‌رام خراو بارن و ڕى دوسایه‌تى و برایى و خزمه‌تكارانه‌ بگرنه‌ وه‌ر ئه‌را سه‌رخستن كیشه‌ ره‌واگه‌مان و هاوردنه‌وه‌ى هه‌قه‌یلمان و ئومیده‌واریم هه‌ر حزب و لایه‌نیگ وه‌ گووره‌ى ده‌نگ و قورسایى خوه‌ى ره‌فتار بكاو به‌رژه‌وه‌ندى باڵاى ملله‌ت نه‌خه‌نه‌ وه‌ر مه‌ترسى و له‌ناوبردن.

جه‌ماڵ ئه‌ركه‌وازى