دويای هه‌ڵوژاردنه‌يل

شفق نيوز

 

له‌وه‌رگرتن ڕی وشوونه‌يل كومسيۆن له‌ ناوه‌ند نيشتمانی خوه‌ی له‌ به‌غدا بی گومانه‌و هه‌ر وه‌ ئاشكرايش كاره‌يلی ئه‌نجام ئه‌ياد له‌وه‌ر وجوود نوێنه‌ره‌يل له‌لايه‌ن نه‌ته‌وه‌يل يه‌كگرتگ و چه‌وديره‌يل ناوده‌وڵه‌تی و ناوچه‌يی بيجگه‌ چه‌وديره‌يل له‌ فراكسيۆنه‌يل سياسی وه‌خاتر زه‌مانه‌ت ته‌مام مه‌سه‌له‌گه‌و دوير له‌ غه‌ڵه‌تكردن له‌ شماره‌ی ده‌نگه‌يل، ئمجا هه‌ر وه‌و خاتريشه‌ بايه‌سه‌ له‌بان ئه‌و ١٠٧ فراكسيۆنه‌يل به‌شداره‌ ك به‌شداری هه‌ڵوژاردنه‌يل كردنه‌ وه‌ گيان پڕ وه‌رپرسيارێتی نيشتمانيه‌و ئاكامه‌يلی قه‌بول بكه‌ن.

له‌گشت حاڵه‌تيگيش سه‌ركه‌فتگ و سه‌رنه‌كه‌فتگيش له‌ی هه‌ڵوژاردنه‌يله‌ هه‌ر بايه‌سه‌ بوود، وه‌نا هه‌ڵسووكه‌فت و ره‌فتاره‌يليگ ناوه‌رپرسانه‌ روی ئه‌يادو كوومه‌ڵگای سه‌بردار عراقی باجه‌گه‌ی ئه‌يادو عراقيه‌يليش خاس زانن له‌وه‌ختيگ ك ناكووكی ئه‌كه‌فيده‌ ناونی سياسيه‌يل دی چه‌ك بيده‌نگ ئه‌كه‌فيده‌ كار و ميليشيايه‌يل تايفه‌گه‌ری ده‌ركه‌فن و ته‌قينه‌وه‌يل فيشتره‌و بوون و ته‌نيا خوين هاووڵاتی عراقی له‌تی زه‌ره‌دمه‌ن ئه‌دێ، هه‌ر له‌وه‌ر ئه‌وه‌يش بايه‌سه‌ له‌بان كومسيۆن راسگوو بوود له‌ ئاكامه‌يلی و هه‌ڵه‌په‌ڵه‌ بكا له‌ ئاشكراكردن ئاكام ئی هه‌ڵوژاردنه‌يله‌ له‌ واده‌ی دياريكرياگ خوه‌ی تا ده‌رفه‌ت نه‌ياده‌ گومانداره‌يل قسه‌ی خوه‌يان سوار بكه‌ن و رويداگه‌يل تون وتيژی بارنه‌ وجوود و عراق وه‌ره‌و په‌لكيش بكه‌ن وه‌ره‌و قه‌يران تازه‌ی دريژماوه‌.

ئه‌نجامداين هه‌ڵوژاردنه‌يل له‌ واده‌ی دياريكرياگ خوه‌ی دوير له‌ هه‌ر گوزاره‌يگ سياسی يا نه‌ته‌وه‌يی يا ئايينی، جوور ده‌سوه‌شاننيگه‌ له‌ دوشمنه‌يل نيشتمان و سه‌ركه‌فتن ئازادی و ديموكراسی و سه‌ركه‌فتن حكوومه‌ت و كومسيۆن، ئمجا بايه‌سه‌ له‌بان گشت فراكسيۆنه‌يل حورمه‌ت ئاكامه‌يل ده‌نگداين بگرن، چوينكه‌ وه‌ ئيراده‌ی هاووڵاتيه‌يل هاتگه‌ ك وه‌گشت ئازادييگ ده‌نگ داسه‌ ئه‌و كانديده‌ ك باوه‌ڕی ئه‌وه‌سه‌ له‌ژير گومه‌ز په‌رله‌مان خزمه‌تيان ئه‌كاو ئاره‌ووز ئه‌وه‌ له‌لی ديرن بار ئيسه‌ وڵاته‌گه‌ ئاڵشت بكا ئه‌را خاستر.

ئيمه‌ ئيسه‌ قسه‌و پيشبينيه‌يل جوراوجووريگ ژنه‌فيم له‌باوه‌ت ئاكام هه‌ڵوژاردنه‌يل ك له‌لايه‌ن فراكسيۆنه‌يله‌و باس ئه‌كريه‌ن ئه‌را بته‌وكردن به‌خت خوه‌يان، وه‌تايبه‌ت ئه‌و فراكسيۆنه‌يله‌ ك به‌ختيان كزه‌و ترس ئاكامه‌يل له‌ليان نيشتگه‌، وه‌لی پيشبينيمان ئه‌را ئی هه‌ڵوژاردنه‌يله ئه‌وه‌سه‌ ك سه‌ركه‌فتن يه‌كجارييگ ئه‌را هويچ ليستيگ وه‌پی نيه‌و ته‌نيا جياوازی كه‌ميگ هه‌س له‌ناونی ركابه‌ره‌يل.‌

ئمجا هه‌رچه‌نی هه‌ڵوژاردنه‌يل ئيجاره‌ سه‌ركه‌فت، وه‌لی خاڵه‌يل خراويگ گرته‌ خوه‌ی و تومار كريا، له‌وانه‌يش مه‌سه‌له‌ی ده‌نگداين كووچبه‌ره‌يل وه‌تايبه‌ت ئه‌وانه‌گ شوونه‌يل خوه‌يان هيشتنه‌جی له‌وه‌ر كاره‌يل تون وتيژی و ترۆر. وه‌ل ئه‌وه‌يشا هه‌زاران عراقی له‌ ده‌يشت عراقيش له‌ی ده‌نگداينه‌ بيبه‌ش بوين له‌وه‌ر ئه‌و به‌ڵگه‌و مه‌رجه‌يله‌ ك له‌لايه‌ن كومسيۆنه‌و دياری كريا ئه‌را ده‌نگده‌ره‌يل.

دوياخريش له‌ جه‌م نزيكه‌ی(٧٦٠)هه‌زار، ته‌نيا(١٦٥،٥٣٢)ده‌نگده‌ر ده‌نگدا، يه‌يش وه‌و مانا ك 80% له‌ليان به‌شداری نه‌كرد و جه‌م گشتی به‌شداربويه‌يل له‌ هه‌ڵوژاردنه‌يل خول ئيسه‌ی سێيه‌م ره‌سيه‌(١٢)مليۆن و(١٠١)هه‌زار و(٩٦٥)ده‌نگه‌ر له‌جه‌م ٢١ مليۆن و ٥٩٢هه‌زار و ٨٨٢كه‌س ك هه‌ق ده‌نگداين داشتن.

دی ريژه‌ی به‌شداری له‌ناونی(٦٠ تا ٧٠%)بوی، وه‌لی ريژه‌گه‌ له‌ساڵ ٢٠١٠ره‌سيه‌(٦٢%)و له‌ خول يه‌كه‌ميش له‌ساڵ ٢٠٠٥ره‌سيه‌(٥٩%)، ئمجا دويای كووتاييهاتن هه‌ڵوژاردنه‌يل بايه‌سه‌ له‌بان كومسيۆن باڵای سه‌روه‌خوه‌ی هه‌ڵوژاردنه‌يل پلانيگ نيشتمانی و گشتگير له‌ قوناغ ئاينده‌ په‌يا بكا ئه‌را چاره‌سه‌ر مه‌سه‌له‌ی ده‌نگداين گشت عراقيه‌يل چ له‌ناوخود يا له‌ده‌يشت عراق.

حه‌ميد موراد

ج . أ