گومان ها ئيوه‌ له‌ مه‌زڵوميه‌ت ئيمام حسێن نيه‌

عه‌لى  حسێن فه‌يلى

شه‌فه‌ق نيوز/ عراق گير كردگه‌ له‌ناو كيشمه‌كيش سياسى و مه‌زه‌وى و نه‌ته‌وه‌يى و ئاده‌ميزاديش هه‌وه‌جه‌ وه‌ نيشانداين هويچ به‌ڵگه‌يگ نه‌يرێد له‌بان زه‌ره‌د و قوربانيه‌يل ك ئه‌گه‌ر ده‌س بكه‌يمنه‌‌ ره‌فتاره‌يليگ ئه‌را‌ گوزه‌ركردن له‌ليان له‌ى ريڕه‌و پڕ كاره‌سات خه‌ته‌رناكه‌.

 

وه‌ گووره‌ى ديد و باوه‌ڕ كورد، جه‌نگ سياسى و سه‌ربازى وه‌ وكاله‌تى ئه‌را ئه‌ى و ئه‌و و وه‌ په‌رچه‌م تايفيه‌گه‌ى و ئه‌جندا ده‌ره‌كيه‌گه‌ێ هويچ شانازييگ ئه‌را حكومه‌ت عراقى و هيزه‌يله‌ چه‌كداره‌گه‌ێ نه‌مه‌نده‌سه‌و.

 

كورد له‌ سه‌ره‌تاى بيس و يه‌ك و له‌ناو قه‌يرانه‌يل و مه‌ترسيه‌يل خوه‌رهه‌ڵات ناوين روى له‌ به‌غدا كردن وه‌ بڕ فريه‌يگ له‌ زه‌خم و كيشه‌يل ناچاره‌سه‌ر كرياێ و له‌وه‌ر فريه‌يى ئه‌و قه‌وڵ و واده‌يل جوراوجووره‌ ك وه‌پيان درياو باوه‌ڕيان ئه‌وه‌ بوى ك عراق دوياى رميان ديكتاتۆريه‌ت له‌ مه‌يل و ماف و خواسته‌يليان ره‌سێده‌وه‌و واز له‌و گشته‌ قوناغه‌يله‌ ئه‌يه‌رن، وه‌لێ ئه‌وه‌ ده‌ركه‌فت ك ميرات ئه‌و باوه‌ڕ و ريڕه‌وه‌ هيمان له‌ حوكم مه‌ندگه‌ و مه‌رجه‌يل زاڵبوينيان فريه‌س تا راده‌يگ هويچ رووشناييگ له‌ ئاسوو نايلێده‌و ئه‌را چاره‌سه‌ر ئه‌و كيشه‌يله‌.

 

كه‌س پرسيار ئه‌وه‌ ناكا باج ئه‌و په‌لاماره‌يله‌ چه‌نيگه‌و زه‌ره‌ده‌يل مه‌رزبڕين چه‌نيگه‌ ك له‌ى دوياخره‌ ئه‌نجام دريا ئه‌را بان هه‌رێم كوردستان، بيگومان ئه‌وه‌گ حكومه‌ت ناوى نه‌ێد سه‌ركه‌فتن  بڕ فريه‌يگ له‌و ئاشتى و ژيان هاوبه‌ش ك مه‌ندوێد كه‌مه‌و كرد.

 

په‌لامارداين كوردستان وه‌رجه‌ ئازادكردن راوه‌و قائم ئه‌وه‌ له‌لى فاميه‌ێد ك دژايه‌تى كورد له‌لاى حكومه‌ت ئه‌ولاتره‌ له‌ دژايه‌تى داعش، وه‌لێ تاكه‌ى ده‌سڵات وه‌ هيز چه‌ك بچه‌سپيه‌ێد له‌ وه‌ختيگ ك نه‌وه‌ێ ئيسه‌ى كورد جموجويل سه‌ربازى حكومى وه‌ى شيوه‌ دوينێد ك داگيركاريه‌ نه‌ك چه‌سپانن ئاسايش؟.

 

ئاشكراس ك هويچ كه‌سيگ له‌ى وڵاته‌ و له‌ى جووره‌ مه‌نتقه‌ ئحساس وه‌ راحه‌ت ناكا، چوينكه‌ ئه‌و هه‌ڵه‌ێ گه‌ورا ك حكومه‌ت ئه‌نجامى دا ئه‌وه‌ بوى ك چاره‌سه‌ر سه‌ربازى هاورده‌ كار و هويچ ئوميديگ ئه‌را كورد له‌تى نه‌مه‌ند له‌ عرا بمينێد، ك يه‌يش هه‌ڵه‌په‌ڵه‌ دا گامه‌يل سه‌روه‌خوه‌يى له‌ عراق.

 

له‌ وه‌ختيگ ك قسه‌ له‌بان مه‌ترسيه‌يل سه‌روه‌خوه‌يى ئه‌كريه‌ێد هويچ كه‌سيگ ته‌كليف خوه‌ى ناكا پرسيار له‌ عه‌ره‌ب سنى بكا ك ماڵويران كريان و پشتگووش خريان و خوه‌سه‌و دريا خوه‌رديان، هويچ كه‌سيگيش باس له‌ كووچكردن بى هاتنه‌وه‌ى دو كوتى مه‌سيحيه‌يل ناكاو ئه‌را باقى پيكهاته‌يل تر نه‌ته‌وه‌يى و ئايينى وه‌هه‌مان شيوه‌، وه‌ل ئه‌وه‌يشا دويريش نيه‌ گه‌رده‌لويل جيايى هه‌ڵبكا له‌ هه‌ر شوونيگ له‌ عراق، چوينكه‌ گشت چشتيگ له‌ى وڵاته‌ قابله‌ ئه‌را ئاڵشتكارى‌ ته‌نيا ئه‌و ئه‌قڵيه‌ته‌ له‌لى بتارزيه‌ێد ك دوشمنايه‌تى و ده‌سدريژى ئه‌را بان مافه‌يل وه‌ كاريگ خواست و شه‌رعى دوينێد.

 

ته‌ئكيديشه‌ ك هيمان جه‌نگ راسكانى ده‌س وه‌پى نه‌كردگه‌، وه‌لێ ئه‌گه‌ر به‌رپايش بوێ سه‌ركه‌فتگ له‌تى نيه‌و هويچ كه‌سيگيش قوربانيه‌يل لايه‌ن تر ده‌فن ناكا!!

 

كورديگ نيه‌ گومان له‌ مه‌زڵوميه‌ت ئيمام حسێن بكا، وه‌لێ متمانه‌ وه‌ راسگوويى نيازه‌يل حكومه‌ت و ئه‌و چه‌كداره‌يله‌ نه‌يرن ك په‌لامار كوردستان دان و په‌رچه‌م حسه‌ينى به‌رزه‌و كردن و مه‌ردم بيتاوان راو ئه‌نه‌ن.

عه‌لى حسێن فه‌يلى