چاره‌سه‌ر بنه‌ڕه‌تى نه‌ك هه‌ڵمژین ناڕه‌زایى

شفق نيوز

 

گرفت سه‌ره‌كى عراق، جیوه‌جى نه‌كردن ده‌ستوور و فه‌رامووشكردن ئه‌و ریككه‌فتنه‌یله‌سه‌ ك له‌وه‌ر خاتر قورتاربوین له‌ قه‌یران ئمزا كریانه‌، جوور ریككه‌فتننامه‌ى هه‌ولێر له‌ 2010، ك ته‌نیا ئه‌و به‌شه‌ له‌لى جیوه‌جى كریا ك په‌یوه‌سه‌ بوى وه‌ دامه‌زرانن حكوومه‌ت عراق، وه‌یه‌یش ته‌نیا شیعه‌ به‌ش خوه‌ى له‌ ده‌سكه‌فت ریككه‌فتن هه‌ولێر هاورده‌ ده‌س و كورد و سنیه‌یلیش له‌لى بیبه‌ش بوین.

 

ئه‌و ریككه‌فتننامه‌ جاریگ تر پیكهاته‌یل عراق له‌بان بنه‌ماى ته‌وافق و هاوبه‌شى گرده‌و كردوید، ك رووژ 7/3/2013 په‌رله‌مان عراق وه‌بى ئاماده‌بوین كورد بودجه‌ى ساڵ 2013 په‌سه‌ن كرد، یه‌یش له‌وه‌ختیگ ك خه‌ڵك كوردستان خه‌ریك ساڵیاد 22ساڵه‌ى راپه‌ڕین و 25 ساڵه‌ى پرووسه‌ى جه‌مكوشى و له‌ناوبردن كورد بوى. ئنجا ره‌فتار به‌غدا پرسیار له‌لاى كورد دروس ئه‌كا، ئه‌و پرسیاریشه‌ رووژ 14/ 3/ 2013 سه‌رۆك هه‌رێم كوردستان له‌ كۆنگره‌ى ناوده‌وڵه‌تى ئاشناكردن جینۆساید كورد له‌ هه‌ولێر  كرده‌ى و وت: ئایا كورد هاوپه‌یمان و شه‌ریكه‌؟ ئه‌گه‌ر جواوى وه‌ به‌ڵى بوود، ئه‌وه‌ هاوپه‌یمانێتى له‌یوا نیه‌ود، چوینكه‌ ئه‌وه‌ك له‌به‌غدا وه‌دى كریه‌ید ئه‌وه‌سه‌ ك هاوپه‌یمانێتى ته‌نیا ئه‌را تاكیگ وه‌كار تیه‌رن، دید ئه‌وان ئه‌را كورد هیمان وه‌چه‌و شه‌ریكایه‌تى نیه‌.

 

كورد ئه‌كته‌ریگ سه‌ره‌كى چاره‌سه‌ركردن كیشه‌یل عراق بویه‌، وه‌ختیگ به‌غدایش خوه‌ى له‌ جیوه‌جیكردن ده‌ستوور دزیده‌و ریز له‌و ریككه‌فتننامه‌یله‌ ناگرید ك وه‌ل هه‌رێم كوردستانا ئمزاى كردگه‌. كورد هه‌میشه‌ ئه‌وه‌ خسته‌سه‌ هویر به‌غدا ك بایه‌سه‌ له‌ڕى گفتگووكردنه‌و قسه‌ له‌و گرفته‌یله‌ بكریه‌ید، وه‌لى سه‌رۆك وه‌زیره‌یل عراق پشت له‌ ده‌ستوور كردگه‌و ئه‌وه‌ له‌هویره‌و بردگه‌ ك ئیسه‌ سه‌رده‌م عراقیگ تازه‌سه‌و په‌نا برده‌سه‌ وه‌ر هیزه‌یل جوور فه‌رمانده‌یى دجله‌و جه‌زیره‌و بادیه‌، ك یه‌یش نموونه‌ى پشتكردنه‌ له‌ ده‌ستوور و روى وه‌ڕوى ناڕه‌زایى بویه‌و.

 

رووژ 12/ 3/ 2013 جه‌عفه‌رى و مالكى و حه‌كیم ئه‌را قسه‌كردن له‌باوه‌ت بار سه‌خت عراق دانیشتنیگ به‌رپا كردن، ئنجا رووژیگ دویاى ئه‌وه‌یش عه‌مار حه‌كیم ئاشكراى ئه‌وه‌ كرد ك ته‌كڕه‌وى له‌ ده‌سڵات مه‌ترسیداره‌، یه‌یش له‌ى وه‌خته‌یله‌ هس وه‌پى كریه‌یدو عراق وه‌پیا گوزه‌ر ئه‌كا، وه‌لى پرسیاره‌گه‌ ئه‌وه‌سه‌ ئایا هسكردن وه‌و مه‌ترسیه‌ له‌لایه‌ن بڕیگ لایه‌ن هاوپه‌یمان شیعه‌ ئه‌را دعایه‌ى هه‌ڵوژاردنه‌ یا وه‌ڕاسى بانگه‌وازیگه‌ ئه‌را له‌یه‌كه‌وداین و شیه‌وكردن له‌ حوكمڕانى؟ ترس ها له‌وه‌ جاده‌ى سنى و دژایه‌تیكردن هه‌قه‌یل كورد و بڕیگ قسه‌ى نه‌رم و لێدوان شایه‌ت كوچگیگ بوود دو مه‌لویچگ وه‌پى بكوشیه‌ید! له‌لایگیشه‌و ئه‌را هه‌ڵمژین ناڕه‌زایى كورد و سنى و ئه‌و لایه‌نه‌یل سیاسیه‌ ك گله‌یى له‌ ته‌كڕه‌وى حكوومه‌ت عراق دیرن و له‌لایگ تریشه‌و ئه‌گه‌ر دعایه‌یگه‌ ئه‌را هه‌ڵوژاردن، ئه‌وه‌ له‌ هه‌ردوگ حاڵه‌ته‌گه‌ وه‌هویچ شیوه‌یگ چاره‌سه‌ر قه‌یرانه‌یل عراق ناكه‌ن و ئه‌و ئه‌قڵیه‌ت ئیسه‌ى حكوومه‌ته‌ خوه‌ى له‌ چاره‌سه‌ر دزیده‌وه‌و هه‌ر له‌ئیسه‌وه‌ چه‌نه‌ها قه‌یران گرده‌و ئه‌كاو ئه‌كاده‌ى دیارى ئه‌را نه‌وه‌یل ئاینده‌.

 

دڵشاد مسته‌فا وه‌سانى

ج. ا