وه‌ هه‌ڵويست، راسيه‌يل ده‌رئه‌كه‌فن

شفق نيوز

ژيان وه‌ هه‌ڵويست په‌يمانه‌ ئه‌كريه‌ێد، ئمجا هه‌رچه‌نى مليۆنه‌ها ساڵ له‌بان ژيان گوزه‌ر كردگه‌، وه‌لێ هويچ هه‌ڵويستيگ له‌لى نايه‌ێده‌ ياد مه‌گه‌ر بڕيگ هه‌ڵويست مه‌ردمانيگ ك مێژوو تۆمار كردنه‌ ئه‌را خوه‌يان و وڵاته‌يليان چ له‌ڕوى سياسى يا ئابوورى يا كومه‌ڵايه‌تى و ته‌نانه‌ت رووشنهويرى و فه‌لسه‌فى.

ملله‌ت كورديش جوور به‌شيگ له‌ ئنسانيه‌ت گوزه‌ر وه‌و هه‌ڵويسته‌يله‌ كرد ك مه‌ردمان تر وه‌پيه‌و گوزه‌ر كردنه‌و هه‌ر وه‌و خاتريشه‌ وه‌ ئه‌مه‌كدار و ئازا و گيانفيدا و هيز ئيراده‌ ناودارن و چشته‌يل فريه‌يگ له‌ناوچه‌يليان ئه‌نجام درياگه‌ وه‌ناو وناونيشان جياجيا له‌لايه‌ن ده‌وڵه‌ته‌يل و ميرنشينيه‌يل و كۆماره‌يل، وه‌لێ جارجاريگ بويانه‌ ئامانج ئه‌را ته‌مه‌ى ملله‌ته‌يل هيزدار.

له‌ مێژوو تازه‌مانيش ئى ملله‌ته‌ وه‌گشت ئازايه‌تييگه‌و وه‌رگرى له‌ مافه‌يل ره‌واى نه‌ته‌وه‌يى خوه‌ى كرد له‌ بنياتناين قه‌واره‌يگ سياسى ئه‌را خوه‌ى وه‌و خاتره‌ تا له‌ساى ئحساس وه‌ ئنسانيه‌ت و نه‌خشه‌يلى بكا له‌ دامه‌زرانن ژياره‌يل ئنسانى و هه‌ر له‌وه‌ر ئه‌وه‌يش ده‌سكرده‌ شووڕش و راپه‌ڕين و خاسترين نموونه‌يى ئازايه‌تى و فيداكارى تۆمار كردن.

ئمجا له‌وه‌ر پيشكه‌فتن و په‌ره‌سه‌ندن سياسى و ئابوورى و سه‌ربازى ك هاته‌ تويش گشت جه‌هان و خوه‌رهه‌ڵات ناوين وه‌تايبه‌ت، سه‌ركردايه‌تى سياسى كوردستان وه‌گشت توانايگه‌و ده‌سكرده‌ هه‌وڵداين ئه‌را وه‌رگرتن پشتگيرى ناوده‌وڵه‌تى وه‌خاتر ئاشكراكردن ئه‌زره‌ت سه‌روه‌خوه‌يى و يه‌يش بويه‌ هه‌ڵويستيگ و نويسيا له‌ مێژوو وه ‌پيته‌يليگ له‌ ته‌ڵا، وه‌لێ له‌لايگ تريشه‌و بڕيگ ده‌نگ ناڕه‌زايى به‌رزه‌و بوى له‌ناوخود به‌ره‌ى ناوخوه‌يى وه‌ ئه‌وه‌گ ئى ملله‌ته‌ هه‌ق نيه‌ له‌ى بار نه‌گونجياگه‌ ئاشكراى ده‌وڵه‌ت بكه‌ن، ئه‌ويش وه‌ مه‌هانه‌ى جوراوجوور، يه‌يش له‌وه‌ختيگ ك سه‌رۆك مه‌سعود بارزانى ئاشكراى ئاماده‌گى كرد ئه‌را ئه‌نجامداين راپرسى ياسايى وه‌خاتر بڕيار چاره‌نويس و ملله‌ت كورد كه‌فته‌ ده‌روازه‌ى ئاشكراكردن ده‌وڵه‌ت، وه‌لێ هه‌ڵويست بڕيگ له‌ لايه‌نه‌يل سياسى و كه‌سه‌يليگ راسيه‌يل ده‌رئه‌خه‌ن و مه‌سه‌له‌گه‌ ره‌ته‌و ئه‌كه‌ن و مه‌هانه‌يان ئه‌وه‌سه‌ بار ئيسه‌ گونجاگ نيه‌ ئه‌را بريار چاره‌نويس و ناين له‌يوا گاميگ، تا ئه‌وه‌ بوى مه‌سه‌له‌گه‌ ره‌سيه‌ ئه‌وه‌گ كه‌سه‌يليگ باس له‌وه‌ كرديان ك كورد بايه‌سه‌ له‌ چوارچيوه‌ى عراق بمينێد، وه‌لێ مێژوو ره‌حم ناكاو گشت هه‌ڵويستيگ تۆمار ئه‌كريه‌ێد و هه‌ر كه‌سيگيش خزمه‌ت ملله‌ته‌گه‌ى بكاو خه‌بات له‌وه‌ر خاتر مافه‌يلى بكا ناوى ئه‌چێده‌ ناو مێژوو له‌ ده‌روازه‌يل فراوانيه‌و، وه‌ل ئه‌وه‌يشا مه‌ردمان تريش مێژوو ياديان ئه‌كا، وه‌لێ وه‌ جياوازى له‌ مه‌زه‌نه‌كردن، دى وه‌و جووريشه‌ گشت راسييگ جوور ئه‌وه‌گ چوين ئاسنيگ وه‌ كوتان و فشار راسيه‌گه‌ى ده‌رئه‌كه‌فێد وه‌و جووريشه‌ ئاده‌ميزاد وه‌ هه‌ڵويست راسيه‌گه‌ى ده‌رئه‌كه‌فێد.

كيشه‌ى كورد ك بويه‌سه‌ باسيگ له‌ حاڵ حازر له‌بان ئاست ناوده‌وڵه‌تى و هه‌رێمى و وه‌رگرتن هه‌ڵويست له‌وه‌رانوه‌ر ئى كيشه‌، نوڕێد لايه‌نه‌يليگ ناوخوه‌يى و ده‌ره‌كى راسيه‌يليان له‌ى هه‌ڵويسته‌ ده‌رئه‌كه‌فێد له‌ناونى خاسى و خراوى، وه‌لێ ئه‌وه‌ مينێد ك ئه‌وه‌سه‌ چ لايه‌نيگ وه‌ ئيراده‌وه‌ له‌وه‌ر خاترى چاره‌نويسى خه‌بات ئه‌كا، يه‌يش وه‌ تايبه‌ت ك بنياتناين ده‌وڵه‌ت كوردستان له‌ سه‌ختى و هه‌ڵويسته‌يل جوراوجوور به‌تاڵ نيه‌، وه‌لێ وه‌گووره‌ى په‌يمانه‌سازى ناوده‌وڵه‌تى و ناوخوه‌يى ئى مه‌سه‌له‌ نزيكه‌ له‌ وه‌ديهاتن.

هه‌ر وه‌و خاتريشه‌ ئه‌تويه‌نيم بويشيم ئاو هه‌ر ڕى خوه‌ى شه‌ق ئه‌كا ك هه‌رچه‌نى گرفتيش له‌وه‌رده‌مى بدێ و هه‌ور وه‌ختى نواى شه‌وق خوه‌ر ناگرێد و خوه‌ر ده‌وڵه‌تيش ره‌سيه‌سه‌ ئاسوو و ئوميديش په‌يوه‌سه‌ وه‌ خه‌بات و ئيراده‌ى بته‌و و وه‌رگه‌گرتن سه‌ختيه‌يل، چوينكه‌ قه‌يرانه‌يل دارايى و سياسى راسى و ڕازه‌يل فريه‌يگ ئاشكرا ئه‌كا.

عه‌بدوڵڵا جه‌عفه‌ر كوفلى