سه‌ركردایه‌تى كورد ها له‌وه‌رده‌م هه‌لیگ مێژوویى

شفق نيوز

 

وه‌ل ئه‌وه‌یشا له‌ مه‌رز باشوور هه‌رێمیشه‌و سه‌دان هه‌زار هاووڵاتى عراقى چ سنى یا مه‌سیحى له‌ ڕخ كوشتن و گرتن روى كردنه‌سه‌ هه‌رێم و ئه‌گه‌ریش شیعه‌ بوون له‌ده‌س بیكارى و كه‌مدرامه‌تى هاتنه‌سه‌ كوردستان. ئنجا هه‌رێم كوردستان هه‌رچه‌نیگ جوور قه‌واره‌یگ له‌ ده‌زگایه‌یل ناوده‌وڵه‌تى دگان وه‌پیا نه‌نریاگه‌، وه‌لى ئه‌را مه‌ردمان ده‌وروه‌رى بویه‌سه‌ ئۆرپا.

 

له‌یرا پرسیاریگ كه‌یم و ئویشیم: ئایا ئى قه‌ڵا" هه‌رێم كوردستان" له‌ناوه‌و ئه‌وه‌نه‌ بته‌وه‌ ك بتویه‌نید وه‌رگرى له‌ مه‌ترسیه‌یل ده‌یشت خوه‌ى بكا؟

 

جى داخه‌ قه‌یران ئى دویاخره‌ ئه‌وه‌ ده‌رخه‌ن ك هه‌رێم مه‌ترسى گه‌ورایگ دیریدو هه‌ل تاریخییش گشت جاریگ دوباره‌وه‌ نیه‌و. ئمڕوو گشت لایه‌نه‌یل كوردستانى هانه‌ وه‌رانوه‌ر وه‌رپرسیارێتى گه‌ورایگ ، ئایا گشت لایه‌نه‌یل ئاماده‌ن خزمه‌ت وه‌ى ملله‌ت فه‌قیره‌ بكه‌ن ك سه‌ده‌ها هه‌زار قوربانى دانه‌و ده‌یه‌ها ساڵیش له‌ جه‌وڵ خه‌بات كردنه‌؟ ئایا پاداش ئمڕوو خه‌ڵك كوردستان یه‌كسانه‌ وه‌ ئه‌وه‌ك وه‌خشانه‌سه‌ى؟

 

له‌یوا بزانیم یه‌كم قوناغ خاسسازى ئه‌را ده‌رچگن له‌ى قه‌یرانه‌ پاك و ئاشكراس، چوینكه‌ هیمان بڕیگ له‌ كه‌م و كوڕى وجوود دیرید و یه‌یش وه‌ شایه‌تى خود وه‌رپرسه‌یل، ئنجا ماناى ئه‌وه‌سه‌ نوره‌ى قوناغ دویه‌مه‌ ك ئه‌ویش ریزگرتن و گفتگوو راسكانى و راسه‌وخۆس وه‌ل یه‌كترى.

 

بیگومان خوداى گه‌ورایش سه‌ركه‌فتگمان ئه‌كاد ئه‌گه‌ر نیاز سه‌ركرده‌یل هه‌وڵداین جددى بوود ئه‌را چه‌سپانن دادگه‌رى و خزمه‌تكردن ملله‌ت سته‌مدیده‌و ئازادى راده‌رخستن.

 

وه‌ل ئه‌وه‌یشا ئویشیم: هویچ وه‌ختیگ قه‌یران له‌ قانجاز هویچ ملله‌تیگ نه‌ویه‌ بیجگه‌ زه‌ره‌د و دویاكه‌فتن، بیجگه‌ ئه‌وه‌یش هویچ لایه‌ن و هیزیگیش ئاسووده‌ نیه‌ود له‌ ئاكام ناكووكى و قه‌یران و هویچكامیان له‌و قه‌یرانه‌ قانجاز ناكه‌ن.

 

د. محه‌مه‌د به‌رزنجى

ج . أ