كابينه‌ی مالكی چه‌ پيشكه‌شكرد ؟

شفق نيوز

ئه‌وه‌يشا مه‌زه‌نه‌كردن حكوومه‌تيگ بايه‌سه‌ وه‌گووره‌ی چه‌ن په‌يمانه‌يگ زانستی و ستاندارد شيه‌وكردن دروسيگ ئه‌ڕای بكريه‌يگ ، ئيمه‌ وه‌پيمان له‌يواسه‌ ئاست سه‌ركه‌فتن هه‌ر حكوومه‌تيگ تا ئه‌و راده‌ وه‌ سه‌ركه‌فتگ زانريه‌يگ ك تا چه‌نيگ تويه‌نستگه‌ ئامانج به‌رژه‌وه‌ندی گشتی كوومه‌ڵگا له‌ناو و له‌ده‌يشت وڵات باريگه‌دی ، ئمجا با بزانيم حكوومه‌ت مالكی چه‌ كردگه‌ ئه‌را كوردستان و عراق ؟ جاريگ له‌سه‌ره‌تاوه‌ پرسيم ئايا مالكی له‌وه‌خت ده‌سڵاتيه‌وه‌ له‌كابينه‌گه‌ی نه‌خشه‌و ستراتيجيه‌گه‌ی چه‌ بويه‌ ئه‌را مه‌سه‌له‌يل جووراوجوور سياسی ، ئه‌منی ، ئابووری ، گه‌ناته‌كاری ؟ نه‌خشه‌ی ئه‌را ره‌سين وه‌و ئامانجه‌يله‌و مامڵه‌ی وه‌ل رويداگ و ، وه‌زع رويداگه‌يل چوين بويه‌ ؟ ئيسه‌يش ك ها له‌كووتايی دوياسه‌عاته‌يل كابينه‌گه‌ی له‌ی ماوه‌ تويه‌نيگ چه‌ بكه‌يگ و چه‌ له‌و ره‌فتار وه‌رجه‌ خوه‌يه‌ گويڕيا و چ چشتيگ جی وه‌جی كرد وه‌تايبه‌ت مه‌سه‌له‌يل گرنگ ياموهم كوردستان و جی وه‌جيكردن مادده‌يل ده‌ستووری ؟ بيگومان له‌و وه‌خته‌وه‌ ك مالكی پۆست سه‌رووك وه‌زيره‌يل وه‌رگرت له‌سه‌رتاوه‌ روی وه‌ روی چه‌ن گرفتيگ بويه‌وه‌ ك وه‌سه‌به‌ب خودكيشاننه‌وه‌ی چه‌ن وه‌زيريگ له‌ به‌ره‌ی يا جه‌بهه‌ی ته‌وافق و حزب فه‌زيله‌ له‌ حكوومه‌ته‌گه‌ی و جيابوينه‌وه‌ی به‌شيگ له‌مه‌ردمان حزب ده‌عوه‌ ك دوياخر وه‌پشتگيری ليست هاوپه‌يمانی كوردستان تويه‌نريا له‌و ته‌نگه‌وه‌ريه‌ قورتاری بووگ .

١- حكوومه‌ت مالكی له‌ڕوی سياسيه‌وه‌ .. مالكی چ ده‌وريگ داشتگه‌ له‌ سه‌رخستن پرووسه‌ی ديموكراسی له‌عراق ؟ تا چه‌نيگ باوه‌ڕ وه‌ سستم فيدراڵی و ده‌سڵات هه‌ريمه‌يل داشتگه‌و كار ئه‌ڕای كردگه‌ ؟ چ ده‌وريگ داشتگه‌ له‌ (دووسی نيشتمانی) ناونی لايه‌نه‌يل و تاچه‌نيگ تويه‌نستگه‌ خوه‌ی له‌كاريگه‌ری تايفی دويره‌و بخه‌يگ ؟ تاچه‌نيگ جی وه‌جی مادده‌يل ده‌ستووری كردگه‌ ؟ په‌يوه‌نديه‌يل دبلۆماسيی وه‌ل وڵاته‌يلا له‌ چ ئاستيگ بويه‌و تا چه‌نيگ تويه‌نستگه‌ ئه‌و په‌يوه‌نديه‌يله‌ بخه‌يگه‌ خزمه‌ت مه‌سه‌له‌يل گرنگ ياموهم عراق ؟

٢- حكوومه‌ت مالكی له‌ڕوی ئه‌منيه‌وه‌ .. له‌جه‌نگ دژه‌ تيرۆر مالكی وه‌بی پشتبه‌سانن وه‌هيزه‌يل ئه‌مريكا تويه‌نستگه‌ چ چشتيگ ئه‌را ئارامی و سه‌قامگيری مه‌ردم عراق ده‌سه‌وه‌ر بكا ؟ تا چه‌نيگ تويه‌نستگه‌ له‌ڕوی ده‌س ده‌ره‌كی بوسيه‌يگ و مقه‌يه‌تی له‌ سه‌روه‌ری عراق بكه‌يگ شوونه‌وار به‌عسيه‌يل له‌ناو ده‌زگايه‌يل ئه‌منی پاكه‌و بكا ؟

٣- حكوومه‌ت مالكی له‌ڕوی ئابووريه‌وه‌ .. وه‌گووره‌ی ئه‌وه‌ك تائيسه‌ بودجه‌ی عراق زياتر له‌ ٩٠% له‌داهات نه‌فته‌ ، له‌ی باوه‌ته‌وه‌ مالكی چ پرووژه‌و ستراتيجيه‌تيگ ئه‌را گه‌شه‌وه‌پيداين ئابووری وڵات داناگه‌ و كار له‌بانی كردگه‌و چه‌ كردگه‌ ئه‌را وڵاتيگ بيكار و پڕ له‌ گه‌ناته‌كار و چ گاميگ ناگه‌ ئه‌را بنبڕكردن گه‌ناته‌كاری و چه‌نيگ له‌نسبه‌ی گه‌ناته‌كاری كه‌مه‌و كردگه‌ ؟ بيگومان ئه‌وه‌ك له‌وه‌زع عراق تائيسه‌ دوينريه‌يگ ، له‌ڕوی سياسيه‌وه‌ عراق ئه‌را راده‌ی پيشخستن پرووسه‌ی ديموكراسی هيمان نيه‌وگ بويشيم ها له‌سه‌ره‌تای ريگه‌ ، چوينكه‌ هوير ناسيۆناليست عه‌ره‌بی شۆڤێنی تائيسه‌ كارا يا فه‌عاله‌و خه‌ريك جه‌نگيگ ده‌سه‌و يه‌قه‌سه‌ وه‌ل ديموكراسيه‌تاو دژ سستم فيدراڵييشه‌ ، ك ئه‌و سياسه‌ته‌يله‌ گشتی چه‌واشه‌ی ده‌ستووره‌ ، ئمجا ئايا هه‌ڵويست مالكی له‌وه‌رانوه‌ر ئه‌و سياسه‌ته‌يله‌ چه‌ بويه‌ وه‌كرده‌وه‌ نه‌ك وه‌قسه‌ ؟ وه‌ل ئه‌وه‌يشا ئه‌را دووسی نيشتمانييش بيجگه‌ كورد پيكهاته‌يل تر له‌ژير كاريگه‌ری وڵاته‌يل ده‌ره‌كی تا ئيسه‌ متمانه‌ وه‌ يه‌كتری نه‌يرن و باوه‌ڕيش وه‌ برايه‌تی و ژيان هاوبه‌ش نه‌يرن و له‌ناونی خوه‌يان و له‌وه‌رانوه‌ر كورد هه‌ميشه‌ وه‌ ده‌سيگ ته‌وقه‌ كه‌ن و ئه‌و ده‌سه‌گه‌يانيش له‌پشته‌وه‌ خه‌نجه‌ر ژه‌هراوی بويه‌ . ئی راسييشه‌ ك له‌ ٢٠٠٧ له‌جه‌نگيگ تايفی خود وه‌خود شيعه‌و سونی رويدا ك دوياخر ئه‌مريكا وه‌ پلانيگ يا خوته‌يگ ئه‌منی تويه‌نست كۆنترۆڵ جه‌نگه‌گه‌ بكا ، ئه‌گه‌ريش ئه‌مريكاو ئه‌قڵ كورد نه‌وياتاگ ئه‌وه‌ ئه‌وان تواسيان كورديش بكيشنه‌ ناو جه‌نگيگ ناوخوه‌ييه‌وه‌ . وه‌ هه‌ر حاڵ پرووسه‌ی ته‌عريبيش تا ئيسه‌ له‌قه‌يريگ له‌شاره‌يل هه‌ر وه‌رده‌وامه‌و هويچ گاميگيش نه‌نرياگه‌ له‌ی باوه‌ته‌وه‌و له‌باوه‌ت مه‌سه‌له‌يل چاره‌سه‌رنه‌كرياگ ناونی به‌غداو هه‌ولێر ، ئمجا ئه‌وه‌ك له‌باوه‌ت كزی و شكه‌سته‌يل حكوومه‌ت مالكی باسكريا گشت ئه‌وانه‌ مشتيگ بوين له‌ خه‌رواريگ .