مه‌ردم(خورماتوو)یش داواى پێشمه‌رگه‌ كردنه‌، دیاره‌ ئى خه‌ویره‌ ئاو فره‌ كیشێد

شفق نيوز

مادده‌ى(140)ده‌ستوور جیوه‌جى نه‌كریاو چه‌ن جاریگیش ماوه‌ى دریژتر وه‌پى دریا ئه‌را جیوه‌جیكردنى وه‌شیوه‌یگ ده‌ستووریانه‌؟ دیاره‌ جواو ئى پرسیاره‌ ئاشكراس له‌لاى مه‌ردم كوردستان و حكوومه‌ت به‌غدا.

بیگومان دویاخستن په‌یڕه‌وكردن مادده‌و به‌نده‌یل ده‌ستوور هویچ وه‌ختیگ له‌به‌رژه‌وه‌ندى ملله‌ت نیه‌و كیشه‌و گرفت زیاتر له‌لى كه‌فێده‌و. وه‌لى ئایا مادده‌یگ له‌ده‌ستوور ك وه‌ ده‌نگ زوورمینه‌ په‌سه‌ن كریاوید، كى ڕیگره‌ له‌وه‌رده‌مى؟ ئیمه‌ى كورد گشت عه‌ره‌ب دوشمنمان نین، دوشمنه‌یلمان هه‌ر ئه‌وانه‌ن تا دویه‌كه‌ ته‌عریب و ته‌هجیر كورد كردن، چوینكه‌ تائیسه‌یش له‌ناو ده‌زگایه‌یل وڵات ده‌ور باڵایگ دیرن و هه‌ر مه‌ندنه‌و هه‌ر ئه‌وانن بوینه‌سه‌ وه‌ربه‌س له‌وه‌رده‌م گه‌شه‌كردن و پیشكه‌فتن و ئاوه‌دانى و ئاسووده‌یى خه‌ڵك ئى وڵاته‌و هیمان خوین شۆڤێنیه‌ت ده‌ماره‌یلیان جموجویل ده‌ێده‌ هس ره‌گه‌زپه‌رسى و عرووبه‌تیان و له‌ئاست ملله‌ت كورد هه‌ر دوشمنه‌گه‌ى جارانن.

ناوچه‌یل داوڕیاگ له‌ هه‌رێم كوردستان چه‌وه‌ڕى ئه‌وه‌ له‌لیان كریا وه‌بى كیشه‌و گرفت بانه‌و ئه‌را بان خاك كوردستان، وه‌لى رویداگه‌یل جه‌له‌ولا و سه‌عدیه‌ و ئاوایه‌یل ده‌وریان دڵخوه‌شكه‌ر نه‌وین و نسبه‌ى فره‌یگ له‌ كورده‌ماڵه‌یل له‌ئه‌نجام ترس و ڕخه‌وبردن و كاره‌یل تیرۆریستى شوونه‌یل ره‌سه‌نیان ك شوون باوگ و باپیره‌یلیانه‌ هیشتنه‌جى و زوڵم و زوور فره‌یگ له‌لیان كریا و فره‌یگیش له‌ ڕوڵه‌یل كورد ئه‌و ناوچه‌یله‌ وه‌ بیتاوان كوشیان و ده‌س تیرۆر گرته‌یانه‌ ئامانج. لایه‌ن كوردى بایه‌سه‌ زویتر پیشبینى ئى جووره‌ رویداگیگ بكردیاد و له‌هه‌مان وه‌خت حكوومه‌ت هه‌رێم كوردستان جویر ئه‌وه‌ك له‌شوونه‌یل تر باره‌گا و هێز تایبه‌ت دیریگ ، وه‌هه‌مان شیوه‌ له‌و ناوچه‌یلیشه‌ پیشبینى ئى جووره‌ رووژیگ بكردیادو خوه‌ى ئاماده‌ بكریاد له‌ رویوه‌ڕوى بوینه‌وه‌ى هه‌ر هه‌وڵ و ته‌قلایگ نائسانى دژ وه‌ كورده‌یل ناوچه‌گه‌، وه‌لى حكوومه‌ت هه‌رێم هه‌ر له‌سه‌ره‌تا خوه‌ى كه‌مته‌رخه‌م بوى و ئه‌وه‌نه‌ گرنگى یا ئه‌همیه‌ت نه‌یا ئه‌و ناوچه‌یله‌ تا مه‌سه‌له‌گه‌ ڕه‌سیه‌ ئى راده‌و نسبه‌ى كورد له‌وه‌ر كووچ وه‌پیكردن زووره‌ملى و ناچارى داوه‌زیگ ئه‌را ئاست فره‌ كه‌میگ .

وه‌لى دیاره‌ ئى خه‌ویره‌ ئاو فره‌ كیشیگ و ئه‌وه‌سه‌ مه‌ردم قه‌زاى(خورماتوو)یش وه‌گووره‌ى خه‌وه‌ر تازه‌ى ره‌ساننه‌یل، داواى پێشمه‌رگه‌ كردنه‌، یه‌یش ماناى ئه‌وه‌س ك خورماتوویش داگیر كریاگه‌و حاڵى ره‌سیه‌سه‌ ته‌نگ و ئه‌ویش جویر جه‌له‌ولاو سه‌عدیه‌ نیشتن كورده‌یل له‌تى سه‌خت و سته‌مه‌و ئه‌گه‌ر وه‌ هێز پێشمه‌رگه‌ مقه‌یه‌تى نه‌كریه‌ێد، ئه‌وه‌ بیگومان هه‌ر وه‌ختى بوود له‌ورایش هه‌مان رویداگ وكاره‌سات كه‌فێده‌ وه‌رچه‌و، ك هه‌رچه‌نى بار ئاسایش خورماتوو جویر بار ئاسایش سه‌عدیه‌و جه‌له‌ولا نیه‌و كه‌متر مه‌ترسى داشت، وه‌لى ئه‌گه‌ر حكوومه‌ت هه‌رێم له‌لى كه‌مته‌رخه‌م و غافڵ بوود، ئه‌وه‌ دویر نیه‌ ئاینده‌ى خراویگ چه‌وه‌ڕیى بكا. چوینكه‌ كورد ئه‌و ناوچه‌یشه‌ له‌یوا هویره‌و كه‌ن ك ته‌نیا ناوچه‌یگ داوڕیاگ كوردستان نیه‌، به‌ڵكوو ناوچه‌یگ داگیركریاگه‌و هه‌وه‌جه‌ وه‌پێشمه‌رگه‌ دیرن ئه‌را مقه‌یه‌تیكردن له‌لى وه‌ل هیزه‌یل عراقیا، ئنجا حكوومه‌ت هه‌رێم هه‌رچى زویتر هه‌وڵ و ته‌قلا  بیه‌یگ  له‌وه‌ر خاتر دابینكردن ئاسایش و ریگرتن له‌ڕویداگ خراو، ئه‌وه‌ بیگومان خاستره‌و زاڵتریش بوود له‌بان ناوچه‌گه‌.

 

جه‌ماڵ ئه‌ركه‌وازى