ئاده‌میزاد جوور دڕنده
هه‌رچه‌نى ئاده‌میزاد وه به‌راورد وه‌ل گشت گیانله‌وه‌ریگ له‌بان ئى گووشه‌ى زه‌ویه ها له‌پله‌ى یه‌كه‌م له‌گشت روییگه‌و، وه‌لى له كرداره‌یل فریه‌یگ ئه‌وه‌نه پله‌ى نزمه روخسار ره‌فتار و كاره‌یلى داوه‌زیده خوار دونیاى ئاژه‌ڵه‌یل.
كرده‌وه‌ى یه‌كتر كوشتن و یه‌كتر خواردن له‌ناو ئاژه‌ڵه‌یل وه شیوه‌یگ سروشتى وجوود دیرید، ئه‌وه‌گ له دونیاى ئه‌وان گوزه‌رید چشتیگ نیه هاوشیوه‌ى دونیایى ئاده‌میزاد بوود، به‌ڵكوو كاره‌گه ها له‌چوارچیوه‌ى خوه‌راك و ژیان و مه‌ندن.
لایتمان باوه‌ڕى ئه‌وه‌سه ك ئاده‌میزاد و تراژیدیایى ئاده‌میزاد له‌و وه‌خته‌و ده‌س وه‌پى ئه‌كا ك نه‌تویه‌نست گوزه‌یشت و ئاینده بڕه‌سنیده یه‌ك، یه‌یش ماناى ئه‌وه ده‌ید ك كیشمه‌كیش ده‌روین ئاده‌میزاد ئه‌را داگیركردن گوزه‌یشت و ئاینده بووده هووكار كاره‌سات، هه‌ر وه‌و خاتریشه ئاده‌میزاد فیشتر هه‌وڵ مه‌ندنه‌وه ده‌ید.
جۆزیف ستالین پیاویگ بوى گشت ئامانجى ئه‌وه بوى بڕه‌سیده ده‌سڵات، وه‌ختیگیش ره‌سیه ده‌سڵات گشت چشتیگ ئه‌نجامدا له‌وه‌ر خاتر مه‌ندنه‌وه‌ى خوه‌ى، ئنجا له یه‌كیگ له قسه‌یلى ئویشید: مردن كه‌سیگ تراژیدیاییه، وه‌لى له‌وه زیاتر بووده ئامار.
ئى قسه چه‌نه‌ها مانا له‌لى كه‌فیده‌و، ئنجا سه‌دان و هه‌زاران و ملیۆنه‌ها كه‌س فه‌وتیان و قسه‌یش له‌ى باوه‌ته‌و فره هه‌س، وه‌لى قسه‌كردن له‌باوه‌ت ئاده‌میزادو ره‌فتارى كانییگه پڕ له ئاو وه‌رده‌وام.
ئاده‌میزاد دولایه‌نه‌س، هه‌م خوه‌ى جوور فریشته‌و مهره‌بان نیشان ئه‌یاد، هه‌م جوور شه‌یتان و دڕنده. لایه‌نه مهره‌بانیه‌گه‌ى ئاده‌میزاد له ئاستیگ جیگیر نیه، وه هه‌مان شیوه لایه‌نه دڕه‌نده‌یه‌گه‌یشى جیگیر نیه.
گشت ئى قسه‌له سایه‌كى راسكانى ئاده‌میزاد نیشانمان ئه‌یاد، رویداین كیمیاواران و ئه‌نفال و جه‌نگ و جه‌مكوشى چه‌نه‌ها ساڵه‌ى خاك میزۆپۆتامیا، ك زوورم كورد ئه‌و پایه‌ى جوگرافیه ئه‌را ژیارى وه‌كار هاوردگه، جى گرینگى و نوڕستنه، كاره‌ساته‌یل یه‌ك له‌شوون یه‌ك كورد له‌گشت پارچه‌یل هاوشیوه‌ى كاره‌سات ملله‌ت و نه‌ته‌وه‌یل تر جه‌هانه، بنه‌مایه‌یل جه‌هانى ئه‌و كرده‌وه‌یله ئه‌وه‌سه ك كردار تراژیدیا له هه‌ر شوونیگ بوود گرینگ نیه، به‌ڵكوو كرده‌وه جى باسكردنه و ته‌نانه‌ت نه‌ته‌وه‌و ره‌نگ و شماره‌یش گرینگ نیه، ك له‌یرا مه‌راممان ئه‌وه‌سه ك بویشیم كاره‌سات جه‌مكوشى كورده‌یل ئه‌نفال و كیمیاواران كوردستان باشوور رویداگ تراژیدى گه‌وراو پڕ ئازارن، كرده‌وه‌ى له‌ناوبردن ئاده‌میزاد له‌لایه‌ن ئاده‌میزاده‌و كرده‌وه‌یگه دڕندانه.
هه‌ر له‌وه‌ر ئه‌وه‌یش بایه‌سه هه‌وڵ ئه‌را ئه‌وه بدریه‌ید قسه له‌بان ناوه‌ڕه‌ووك تراژیدیا بكریه‌یدو كار ئه‌را ئاشناكردن ئه‌و كاره‌ساته‌یل نائنسانیه بكریه‌ید ك تویش ئاده‌میزاد هاتگه، ئه‌ویش وه‌خاتر نیشانداین دڕه‌نده‌یى ئاده‌میزاد ده‌رهه‌ق خود ئاده‌میزاد.
ئارام شێخوه‌سانى
ج . أ
