جايه‌ڵه‌يل وڵات من جياوازن

شفق نيوز

ئه‌وه‌ك جى شانازى و سه‌ربه‌رزيه‌ له‌ گشت ئه‌و شوونه‌يله‌ ك وه‌رگرى و جه‌نگ له‌تيان ئه‌كريه‌يد دژ ترۆريسته‌يل، ئه‌وه‌سه‌ ك جايه‌ڵ جوان كورد فريه‌ وه‌ مه‌ردانه‌ هه‌ڵسووكه‌فت ئه‌كه‌ن، ته‌نانه‌ت وه‌ل ته‌رم دوشمنه‌يل و ئه‌و ترۆريسته‌يليشه‌ ك وه‌ زينگى ده‌سگير ئه‌كريه‌ن له‌لايه‌ن هيزه‌يل پێشمه‌رگه‌.

هه‌ڵسووكه‌فت‌ ئه‌و جايه‌ڵ جوانه‌يل مه‌رد كوردستانمانه‌ ره‌سم جوانيگ نيشان گشت دونيا ئه‌ياد ك جايه‌ڵ كورد دووس ئنسانيه‌ت و ژيانه‌ ك هه‌رچه‌نى دوشمنه‌يليشى خوينريژيش بوون، هه‌ر وه‌و خاتريشه‌ ئه‌وه‌سه‌ له‌ى چه‌ن رووژ گوزه‌يشته‌ دوياى ئه‌وه‌ك ناوچه‌يگ له‌ژير ده‌سڵات ترۆريسته‌يل پاكه‌و كريا ره‌سميگ تر مه‌ردانه‌ى شيره‌ كوڕه‌يل كوردمان كه‌فته‌ وه‌رچه‌و بيجگه‌ شه‌كه‌تى جه‌نگ و ئه‌و هه‌ڵسووكه‌فته‌ ك له‌لايه‌ن بريگ ئاواينشين عه‌ره‌ب وه‌رانوه‌ريان ئه‌نجام درياويد، وه‌ل وه‌ل ئه‌وه‌يشا ئه‌و پێشمه‌رگه‌يل كوردستانه‌ خواردن و ئاو و ميوه‌جاتيش پيشكه‌ش كردوينه‌ ئه‌و عه‌ره‌به‌يله‌ ك زويتر له‌ژير ده‌س داعش بوين و وه‌ هه‌وڵ قاره‌مانه‌يل كورد ئازاد بوين له‌ژير ده‌س ترۆريسته‌يل.

بيگومان يه‌يش ئه‌وه‌ ده‌رخست ك رووڵه‌يل وڵات من فريه‌ جيازا و ئاده‌ميزاد دووسن و له‌ ره‌گه‌ز و زووان ناپرسن ك هه‌رچه‌نى رووژه‌يليگ عه‌ره‌به‌يل غه‌دريش له‌ كورد كردوين، وه‌لى ئه‌وان له‌ مه‌ردايه‌تى و كوردبوين خوه‌يان په‌شيمانه‌و نيه‌ون و هه‌ر وه‌ هه‌مان هه‌ناسه‌ى باوگ و باپيره‌يليان هه‌ڵسووكه‌فت وه‌ل گشت كه‌سيگ ئه‌كه‌ن ك هه‌رچه‌نى غه‌يره‌ كورديش بوون.

له‌لايگ تريشه‌و له‌ شوونه‌يل جياجيايگ رووژانه‌ ئه‌وه‌ ژنه‌فيم ك گوايا پيشنياريگ هه‌س ئه‌را دروسكردن قه‌ورسانيگ تايبه‌ت ئه‌را ترۆريسته‌يل داعش، ك وه‌ باوه‌ڕم يه‌يش غه‌در گه‌ورايگه‌ له‌ خاك و ئاو كوردستان ئه‌كريه‌يد ئه‌گه‌ر ته‌رم ئه‌و ترۆريسته‌يله‌ تيكه‌ڵ وه‌ خاك كوردستان بكريه‌ن و وه‌و شيوه‌ جه‌ميانه‌و بكه‌يم له‌ شوونيگ تايبه‌ت، چوينكه‌ ئه‌وان نه‌هاتنه‌ كاريگ خه‌يرخوازى بكه‌ن له‌بان خاك ئيمه‌، ئه‌وان هاتنه‌ خاكمان داگير بكه‌ن، ئمجا با مردگيش بوود وه‌لى با تيكه‌ڵ وه‌ خاك ئيمه‌ نه‌كريه‌ن وه‌ جه‌م و شوون تايبه‌ت ئه‌رايان ته‌رخان نه‌كريه‌يد، وه‌ل ريز و حورمه‌تمان ئه‌را ئى جووره‌ پيشنياره‌.

ئارى حاجى ره‌مه‌زان

ج . أ