رووژ ئه‌وه‌ر كردن جنگ نه‌ته‌وه‌يی و پێشنيارێگ

شفق نيوز

كه‌متر له‌ زووان و به‌يداخ و خاك و مێژوو هه‌ر نه‌ته‌وه‌ی نيه‌. وه‌ل قه‌درگرتن و رێزنان له‌ جنگ نه‌ته‌وه‌يی، ئشاره‌ی ئه‌را بوين هه‌ست نه‌ته‌وه‌يیه‌. دڵنگ ئه‌و وه‌ركردن نه‌ته‌وه‌يی، هه‌ چوی جيا بوين ناسنامه‌ی نه‌ته‌وه‌يل جياوازه‌ له‌ يه‌كه‌و ئيچنه‌ ئه‌و نه‌ته‌وه‌ ئه‌ناسنێد.

هه‌ر ئه‌وچنه‌ ك وه‌زاره‌ت په‌روه‌رده‌ی حكومه‌ت هه‌رێم كوردستان وه‌ بڵاوكريایگ، بڕيار دايه‌ رووژ هه‌شت مارس ئه‌مساڵ بكا وه‌ رووژ ئه‌وه‌ر كردن دڵنگ نه‌ته‌وه‌يی، جی ده‌س خوه‌شی كردن له‌ی وه‌زاره‌ته‌ ديرێدو ئه‌كريه‌يديش ئه‌ی پرۆژه‌يانه‌ وه‌ چه‌ن پێشنيارتر ده‌وڵه‌مه‌ن تره‌و بكريه‌يد.

هه‌رچه‌ن ئه‌وسا له‌ سه‌ره‌تای راپڕين بايه‌د يه‌ بكرياد، وه‌ل ئيسه‌يش بكريه‌يد هه‌م خاسه‌. ئه‌رايه‌ پيشنيار ئه‌كه‌م وه‌ حكومه‌ت هه‌رێم كوردستان و پارته‌يل ده‌سڵاتدار ئه‌را وه‌گ فره‌تر قه‌در نه‌ته‌وه‌ و ره‌سمه‌يل و كلتور كوردی و كورد و كوردستان بگيريه‌يد، ته‌قڵا بكه‌ن ئه‌را وه‌گ بڕيارێگ په‌سه‌ن بكريه‌يد تا وه‌ ره‌سمی دڵنگ كوردی له‌ فه‌رمانگه‌و دامه‌زريايل فه‌رمی حكومه‌ت، فه‌رمانبه‌ره‌يل وه‌ ژن و پياو دڵنگ كوردی بكه‌نه‌ وه‌ر خوه‌يان.

نه‌ يه‌گ ته‌نيا ئه‌را چه‌ن رووژ يا چه‌ن بوونه‌ی نه‌ته‌وه‌يی و كۆمه‌ڵايه‌تی و چه‌ژنه‌يل، پۆشاك كوردی وه‌ كار باريه‌يد، به‌ڵكو دڵنگ و جنگ كوردی ئه‌را هه‌ر وه‌ختێگ بوود. چوين ك ئيسه‌ جنگ كوردی به‌شێگ له‌ دڵنگ ره‌سمی نيه‌و وه‌ ئه‌ساس رێنماييه‌يل حكومی تا ئيرنگه‌ ئه‌و ده‌يشت له‌ ئه‌و دڵنگه‌يله‌سه‌ ك رووژانه‌ فه‌رمانبه‌ره‌يل له‌ وه‌خت ده‌وام ره‌سمی خوه‌يان ئه‌كه‌نانه‌ وه‌ر.

يه‌يشه‌ له‌ وه‌ختێگه‌ دوينيمن، عه‌روه‌يل و زورم نه‌ته‌وه‌يل تر، فره‌ شانازی وه‌ دڵنگ‌ نه‌ته‌وه‌يی خوه‌يان كه‌ن و  وه‌ جنگ ره‌سمی ده‌وڵه‌ت خوه‌يان له‌ قه‌لمێ ئه‌ده‌ن و له‌ بوونه‌و كۆڕ و  كۆوه‌وبوينه‌يل جه‌هان، فره‌جار سه‌ركرده‌و شه‌خسيه‌ته‌يليان وه‌ دڵنگ نه‌ته‌وه‌يی خوه‌يان چن و  ئاماده‌ له‌ ناو ئه‌ی نيشتنه‌يله‌ بوون.

هه‌قه‌ حكومت هه‌رێم كوردستانيش گامێگ ئيچنه‌يی ئه‌ڵگبرێدو دڵنگ كوردی چوی پۆشاك ره‌سمی حكومه‌ت وه‌ هساو باريده‌ی.

دانا ته‌یب مه‌نمی