جووره‌يل كار دبلۆماسی

شفق نيوز

١- كار دبلۆماسی نهێنی: ئه‌ی جووره‌ دبلۆماسيه‌ته‌ له‌ سه‌ره‌تای كار دبلۆماسی په‌يڕه‌و كرياگه‌، چوينكه‌ له‌ سه‌رده‌مه‌يل كويه‌ن ته‌نيا سه‌ركرده‌ی سياسی و پاشاو ئمبراتۆره‌يل كار ده‌وڵه‌ت وه‌ڕيه‌و برديان و كاره‌يليش وه‌ شيوه‌يگ نهێنی و نائاشكرا ئه‌نجام درياگه‌، ك يه‌يش سه‌ره‌تايگه‌ ئه‌را ده‌ركه‌فتن كار دبلۆماسی.

٢- كار دبلۆماسی ئاشكرا: وه‌ل پيشكه‌فتن كاره‌يل سياسی و زيايبوين تيكڵايی ملله‌ت و نه‌ته‌وه‌يل و زيايبوين هه‌وه‌جه‌يل و زيايبوين به‌شداری مه‌ردم له‌ بواره‌يل سياسی و ئداره‌ی كار ده‌وڵه‌ت دبلۆماسيه‌تيش له‌ قوناغيگ نهێنيه‌و ئاڵشت كريا ئه‌را ئاشكراو ئه‌را گاميگ گه‌ورای پيشكه‌فتنی.

ئمجا ئه‌گه‌ريش ته‌ماشای دبلۆماسيه‌ت بكه‌يم له‌ڕوی ئه‌و لايه‌نه‌يله‌و ك به‌شداری له‌تی ئه‌كه‌ن، دوينيم يه‌يش چه‌ن شيوازيگ ئه‌گريده‌ خوه‌ی، له‌وانه‌يش:

* كار دبلۆماسی دولايه‌نی: له‌ سه‌ره‌تا كار دبلۆماسی ته‌نيا له‌ ناونی دو يه‌كه‌ی سياسی برياسه‌ رييه‌وه‌و گفتگووكردن و چاره‌سه‌ر كيشه‌يليش ته‌نيا له‌و دو لايه‌نه‌و بويه‌.

* كار دبلۆماسی گشتی: يه‌يش وه‌ل پيشكه‌فتن قوناغه‌يل ژيان و دروسبوين ريكخرياگه‌يل حكوومی و ناحكوومی و بڵاوبوينه‌وه‌ی كلتوور ديموكراسی و زيايبوين هه‌وه‌جه‌يل مه‌ردم بويه‌سه‌ هووكار ئه‌وه‌ك دبلۆماسيه‌ت بدێده‌ گشتی و فيشتر له‌ دو لايه‌ن به‌شداری له‌تی بكه‌ن.

* دبلۆماسی كۆنگره‌ی سه‌رۆكه‌يل: ئی جووره‌ كار دبلۆماسيه‌ ته‌نيا سه‌رۆك وڵاته‌يل به‌شداری له‌تی ئه‌كه‌ن و دويای ئه‌وه‌يش گشت سه‌ركرده‌يل جه‌هان يا كشوه‌ريگ دياريكرياگ و هه‌رێميگ دياريكرياگ به‌شداری ئه‌كه‌ن و هه‌ر وه‌و خاتريشه‌ وه‌ نك دبلۆماسيه‌ت تاريف ئه‌كريه‌يد، چوينكه‌ جوور ئه‌وه‌ك ئاماژه‌ وه‌پی كرديم ته‌نيا سه‌رۆك ده‌وڵه‌ته‌يل به‌شداری له‌تی ئه‌كه‌ن.

* دبلۆماسيه‌ت هه‌يمه‌نه‌: يه‌يش وه‌رده‌وامترين جووره‌يل دبلۆماسيه‌، ك هه‌رچه‌نی له‌ڕووی مێژووييه‌و كويه‌نه‌و چووده‌و ئه‌را وه‌خته‌يل وه‌كارهاوردن هيزه‌يل نهێنی، وه‌لی تائيسه‌يش وه‌رده‌وامی ديريد و هه‌ر وه‌ تازه‌ دانريه‌يد، چوينكه‌ ده‌وڵه‌تيگ جوور ئه‌مريكا په‌يڕه‌وی ئه‌كاو له‌ ناوه‌ڕووكه‌و وه‌كارهاوردن هيزه‌گه‌ی له‌يوا له‌ وڵاته‌يل تر ئه‌كا كاريگ بكه‌ن ك ئيراده‌يان له‌بانی نيه‌، وه‌لی له‌ سيماو روخساره‌و ئداره‌ی كاروبار دبلۆماسی ئه‌كا.

هێشوو ئبراهيم

ج . أ