ڕێ سێوم كوردستان جور ده‌وڵه‌تێگ نیمچه‌ سه‌روه‌خوه‌ێ

شفق نيوز

ئه‌و گیچه‌ڵ سیاسی و ئابووری و سه‌ربازیه‌یله‌ ك هه‌رێم كوردستان توێشێ تیه‌ێگ وه‌خاتر عراقه‌ ، ئه‌گه‌ر كوردستان له‌ چوارچێوه‌ێ عراق نه‌ویاتاگ ، شاێه‌د پرشنگ ئه‌و گیچه‌ڵه‌یله‌ فه‌ره‌ وه‌كه‌می یه‌خه‌ێ كوردستان بگرتاگ ، هاوڵاتیه‌یل هه‌ریم ماوه‌ێ نزیكه‌ێ ساڵ و نیمێگه‌ باج قه‌یران دارایی ده‌ن و له‌ جه‌نگ داعش قوربانی پێشكه‌ش نیشتمان كردنه‌ ، هوكار یا سه‌به‌ب ئه‌و قه‌یرانه‌یلیشه‌ ئه‌وه‌سه‌ ك هه‌مرای هه‌رێم كوردستان به‌شێگه‌ له‌ عراق.

دویایین قه‌یرانیش قه‌یران فروشتن نه‌فت و هاتن بووجه‌س ، له‌یه‌یش حكومه‌ت هه‌رێم نه‌توێه‌نستگه‌ قه‌یران ئابووری وه‌پێ چاره‌سه‌ر بكه‌ێگ ، ئیسه‌ حكومه‌ت هه‌رێم خوه‌ێ له‌ ناو دو ئه‌گه‌ر هیشتگه‌سه‌و ، سه‌روه‌خوه‌یی یان دریژه‌ داین وه‌مه‌نن له‌ چوارچێوه‌ێ عراق.

بێگومان هاوپه‌یمانه‌یل وه‌سه‌روكاێه‌تی ئه‌مریكا هان وه‌ل مه‌نن له‌ عراق و دژ سه‌روه‌خوه‌یین ، له‌ێ ناوه‌ باێه‌د هه‌رێم كوردستان ، بگه‌ردێگه‌ شوون ڕێ سێوم ، ڕێگه‌ێگ ئه‌ڕا ئێ قوناغه‌ ك نه‌ سه‌ر وه‌خوه‌یی بووگ و نه‌یش سه‌ر وه‌ عراق ، ئه‌ویش ڕێ نیمچه‌ سه‌روه‌خوه‌ییه‌ له‌ چوار چێوه‌ێ جوغرافیه‌ێ عراق ئیسه‌ ، ك ئه‌یه‌ گام گرنگێگه‌ و له‌ ئاینده‌ سه‌روه‌خوه‌یی ته‌واو وه‌پێ تێه‌یگه‌دی.

ئێ جور سه‌روه‌خوه‌ییه‌ كاردانه‌وه‌ێ توند له‌ وه‌راوه‌رێ نێه‌كریه‌ێ ، بێگومان ئی جور ئه‌زمونێگ له‌ چه‌ن وڵاتێگ جه‌هان ڕوی داس و تائیسه‌ وه‌رده‌وامه‌ ، سه‌ره‌ڕای هوكار و بارودوخه‌ جیاوازه‌گان، جور هونگ كونگ و فلستین و قوبرس باكوور و چه‌ن ده‌وڵتێگ نیمچه‌ سه‌روه‌خوه‌ێ جور ئه‌بخازیا له‌ یه‌كیه‌تی سوڤێه‌ت جاران.

وه‌ێ خاتره‌ ، ئێ ڕێگه‌ێ سێومه‌ ئه‌ڕا ئێ قوناغه‌ فه‌ره‌ گونجیاگه‌ ، ئه‌ڕا ئه‌وه‌گ سه‌روه‌خوه‌یی ئابووری و سه‌ربازی و دبلوماسی ته‌واو له‌ ناو جوغرافیه‌ی هه‌رێم له‌ چوارچێوه‌ێ عراق بووگ ، قوناغ نیمچه‌ سه‌روه‌خوه‌یی باێه‌د له‌ بان بنه‌ماگان ده‌وڵه‌ت دروس بكرێه‌ن و نمونه‌ێگ دیموكراسی پێشكه‌فتگ بووگ و ئابووری نیشتمانی و وه‌رگری نیشتمانی و دبلوماسی نیشتمانی له‌تێ دامه‌زرێه‌ێ و ئازایانه‌ له‌ێ قوناغه‌ ده‌س بورێه‌ێ ئه‌ڕا نیشتمانی كردن گشت جومگه‌یل ده‌سه‌ڵات ، نموونه‌ێگ حوكمڕانی خاس گه‌ره‌نتی ئعتراق وه‌پێكردن ده‌وڵه‌ته‌ پێشكه‌وتگه‌گان جه‌هان له‌لێ كه‌فێگه‌و.

دلشاد حوسێن

ج ك