سازان

شفق نيوز

 

ئى ئاوایه‌ ئه‌كه‌فیده‌ 11كم خوه‌رهه‌ڵات شار هه‌ڵه‌بجه‌و باشوور خوه‌رهه‌ڵات شار سلێمانى، جوور زوورم ئاوایه‌یل تر كوردستان له‌ ساڵ 1979 كه‌فته‌سه‌ وه‌ر په‌لامار جیوازكردن و چووڵكریاگه‌. ئاو وهه‌واى ئى ئاوایه‌ له‌ تاوسان وشكه‌و زمسانیشى كه‌میگ سه‌رده‌، وه‌لى له‌ هه‌ردوگ وه‌رز وه‌هار و پایز ئاو وهه‌واى فریه‌ خوه‌شیگ دیرید و ساڵانه‌ ریژه‌ى خاسیگ له‌ مه‌ردم ناوچه‌یل تر روى له‌لى ئه‌كه‌ن ئه‌را گه‌شتكردن و بویه‌سه‌ ناوچه‌یگ گه‌شتیارى، یه‌یش بیجگه‌ ئه‌وه‌ك هه‌ر یه‌كیگ له‌ باخه‌یلى جوور سه‌یرانگایگه‌و گه‌شتیار روى له‌لى ئه‌كه‌ن.

ناوناین ئى ئاواییه‌ له‌یوا باس ئه‌كه‌ن و ئویشن گوایا شێخ" مومن " سازانى ك یه‌كیگ بویه‌ له‌ خه‌لیفه‌یل شێخ ئسماعیل ولیانى ك زانایگ ناوچه‌ى به‌رزنه‌ بویه‌، ناوچه‌ى به‌رزنجه‌ هیلیده‌ جى و روى ئه‌كاده‌ ئى ناوچه‌، ئمجا دویاى ماوه‌یگ كه‌س و كار و ناسریاگه‌یلى شێخ مومن دویننه‌وه‌و ئویشنه‌پى شێخ مومن چه‌ كردید و له‌ كوورا نیشته‌جى بوید؟ ئه‌ویش له‌ جواو ئه‌و پرسیاره‌ ئویشید شوونیگ ئه‌را خوه‌م سازانم، دى دویاخر خوه‌ى و نه‌وه‌یلى ئه‌و ناوچه‌ ئاوه‌دانه‌و ئه‌كه‌ن و ناوى نریه‌ید سازان.

ئى ئاوایه‌ ناوداره‌ وه‌ نیشتمان ئه‌نار، جوانترین و ئاودارترین ئه‌نار تیه‌ریه‌یده‌ به‌رهه‌م، ئى ئاوایه‌ خاكه‌گه‌ى فریه‌ گونجیاگه‌ ئه‌را ئى میوه‌و هه‌ر وه‌و خاتریشه‌ ئى ناوچه‌ شماره‌ى فریه‌یگ باخه‌ ئه‌نار دیرید ك ساڵانه‌ سه‌دان ته‌ن ئه‌نار له‌لى ئه‌یاده‌ به‌رهه‌م و جیواز ئه‌كریه‌ید ئه‌را ناوچه‌یل تر هه‌ڵه‌بجه‌و سلێمانى و ناوچه‌یل تر كوردستان.

تویه‌نیم بویشیم ئى ئاوایه‌ بیجگه‌ ئه‌ناریش، باخه‌یل تر میوه‌جاتیش دیرید جوور" ئه‌نجیر و ئه‌نگویر و قه‌یسى و هه‌ڵووژه‌و قووخ...هتد". وه‌ل ئه‌وه‌یشا بیجگه‌ وجوود باخه‌یلیش، ده‌یشت پڕ پیت و به‌ره‌كه‌تیگیش دیرید و ئیسه‌یش مه‌ردمه‌گه‌ى گه‌نم و جویه‌ له‌تى كاڵن.

ویكیپیدیاى كوردى

ج . أ