رى وڕه‌سم جاران ئه‌را واران

شفق نيوز

ئمجا يه‌كيگ له‌و نه‌ريته‌يل كويه‌ن و په‌يڕه‌وكرياگه‌ ك له‌لای مه‌ردم كورده‌واری جی باوه‌ڕ بويه‌ جوور ڕی وڕه‌سميگ جاران ئه‌را واران و په‌ڵه‌داين، ئه‌ويش ئه‌وه‌سه‌ ك وه‌خاتر واران وارين له‌ وه‌رز وه‌هار، كه‌سيگ وه‌ جنگ و سه‌ر وسيمای قرمزيگه‌و وه‌يلكانه‌ی قرمزيگ گرتياده‌ ده‌س و كويچه‌ وه‌ كويچه‌ گه‌ردياد و گوورانی چڕياد و مه‌ردميش پويل وه‌پی ديان و دوياخريش هه‌رچی پويل جه‌مه‌و بكردياد پيشكه‌شی كردياده‌ خيزانيگ لات ونه‌دار وه‌و ئوميده‌ ك خودا نزاو لاڵه‌يان قه‌بوول بكاو واران بواريد.

ئی ری وره‌سمه‌ له‌ شوونيگ ئه‌را شوونيگ تر جياوازی داشت، له‌ چه‌ن ناوچه‌يليگ له‌ خوه‌رهه‌ڵات كوردستان وه‌ تايبه‌ت له‌ چه‌ن ناوچه‌يگ له‌ كردماشان وه‌پی وتيان"هڵووكان"و ئه‌را ماوه‌ی چه‌ن رووژيگ وه‌رده‌وامی داشتگه‌و له‌وه‌ختيگ ك فه‌قير ره‌سيه‌سه‌ ئاره‌زوو خوه‌ی دی مه‌ردمه‌گه‌يش چه‌وه‌ڕی واران كردنه‌و له‌و باوه‌ڕه‌ بوينه‌ ك ئه‌يانيش ره‌سنه‌ ئاره‌زه‌ه‌ خوه‌يان.

له‌ ناوچه‌يل گه‌رمه‌سير جوور و به‌دره‌ و جه‌سان و قازانيه ‌و ‌مه‌نه‌لی و خانه‌قين و قۆره‌توو و ده‌ه‌ورگرديشی، مه‌ردمه‌گه‌ی له‌وه‌خت وشكه‌ساڵی و هه‌وه‌جه‌ ئه‌را شكانن تيه‌نگی زه‌وی وزار بڕيگ مناڵ جه‌مه‌و بويان و وه‌يلكانه‌يگ جوور ياساوڵ ئاسا كرديانه‌ قه‌ی داريگ و كويچه‌ وه‌ كويچه‌ گه‌رديان و ئی به‌يته‌ وتيان"هه‌لاران ومه‌لاران .. ياخودا بكاده‌ی واران .. ئه‌را فه‌قير و نه‌داران"، ئمجا ئی مناڵه‌يليشه‌ دويای وارين وارانه‌گه‌ گه‌رديانه‌ ماڵه‌يل و داوای پويل له‌ليان كرديان و له‌ناونی خوه‌يان به‌شيه‌و كرديان.

له‌ ناوچه‌ی "سيه‌سيه‌"ی شائاباد سه‌ر وه‌ پاريزگای كرماشان جوور ئه‌وه‌ك ئاكۆ جه‌ليليان له‌ كتاو"زه‌ڕينه‌و سيمينه‌"ى خوه‌ی باسی كردگه‌و ئويشيد: له‌ی ناوچه‌ له‌وه‌ختيگ ك واران كه‌مه‌، چه‌ن كه‌سيگ ك بايه‌سه‌ شماره‌يان له‌ ١٢ كه‌س كه‌متر نه‌دێ گرده‌و بوون و "په‌پك" گه‌ورايگ دروس ئه‌كه‌ن و مه‌يرگيگ له‌ناوی دانه‌ن و له‌ناو خوه‌ڵه‌كوو برشننه‌ی و دوياخر له‌ ناونی خوه‌يان به‌شی ئه‌كه‌ن و هه‌ر كه‌سيگ مه‌يرگه‌گه‌ بكه‌فتياده‌ به‌شی به‌سيانه‌ی قه‌ی داريگ و فه‌لاقه‌ی كرديان و ئه‌ويش هه‌ر هاوار ئه‌كردياد و له‌ خودا لاڵكياده‌و واران بواريد تا قورتار بدێ له‌ ده‌سيان، له‌ هه‌مان وه‌خت كه‌سيگ تر ك خاوه‌ن ريز و حورمه‌ت و خوداناسيش هاتياد تكا له‌و كه‌سه‌يله‌ كردياد ئه‌را خاتر ئه‌و واز له‌لی بارن و له‌بان زه‌مانه‌ت ئه‌و وه‌ری بيه‌ن و دوعا بكه‌ن واران بواريد، دی وه‌و جووره‌ ره‌سيانه‌ ئاره‌زوو.

وه‌لی ئيسه‌ له‌ی سه‌رده‌مه‌ ئه‌و باوه‌ڕه‌يل كويه‌ن كورده‌واريه‌ دياره‌ متمانه‌ی خوه‌يان له‌ده‌س دانه‌و ئه‌و نيه‌ته‌يل پاك وبيگه‌رده‌ وه‌و باوه‌ڕه‌و روی له‌ كه‌می كردنه‌و ته‌نانه‌ت جوور خورافه‌تيگيش شايه‌ت بنوڕنه‌ مه‌سه‌له‌گه‌و شايه‌ت هه‌زاران نزاو لاڵه‌ی ئيسه‌يش‌ جوور لاڵكيانيگ مه‌ردم جاران وه‌ ئاره‌زوو نه‌ڕه‌سيد و هه‌ر وه‌و خاتريشه‌ دوينيم فريه‌جار وشكه‌ساڵی ته‌نگ وه‌ ملله‌ت هه‌ڵچنيه‌و خاكيش تيه‌نگ وارانه‌.

ج . عه‌ليميری